ມີເດຍລາວແຂວງສາລະວັນ ພາບ-ຂ່າວ: ສິດຕາ ເພັດວົງສາ ເພື່ອເປັນການປະກອບສ່ວນເຂົ້າໃນວຽກງານສະກັດກັ້ນ, ຄວບຄຸ້ມ,ແລະແກ້ໄຂການແຜ່ລະບາດຂອງເຊື້ອພະຍາດໂຄວິດ-19 ຢູ່ແຂວງສາລະວັນ, ໃນວັນທີ 18 ພຶດສະພາ 2021 ນີ້ ແຂວງກວ້າງຈີ້ ສສ ຫວຽດນາມໄດ້ປະກອບສ່ວນມອບເຄື່ອງຊ່ວຍເຫຼືອໃຫ້ອົງການປົກຄອງແຂວງສາລະວັນ ເຊິ່ງປະກອບມີຄື: ຊຸດແພດ PPE 630 ຊຸດ, ຜ້າອັດປາກ 6630 ອັນ, ນໍ້າຢາຂ້າເຊື້ອ 600 kg, ເຄື່ອງຜົນນໍ້າຢາຂ້າເຊື້ອ 3 ເຄື່ອງ ແລະ ເຈວລ້າງມື 330 ກ່ອງ ລວມມູນຄ່າ 300 ລ້ານກວ່າດົ້ງ ພິທີມອບ-ຮັບໄດ້ຈັດຂື້ນທີ່ດ້ານຊາຍແດນສາກົນລະໄລເມືອງສະໝ້ວຍ, ມອບໂດຍທ່ານ ຮວ່າງນາມ ຮອງປະທານຄະນະກຳມະການປະຊາຊົນ ແຂວງກວ້າງຈີ້, ຮັບໂດຍທ່ານ ສົມໃຈ ອຸນຈິດ ຮອງເຈົ້າແຂວງໆສາລະວັນ ຫົວໜ້າຄະນະສະເພາະກິດໂຄວິດ-19 ແຂວງສາລະວັນ ພ້ວມດ້ວຍຄະນະເຂົ້າຮ່ວມເປັນສັກຂີພິຍານ.

ໃນໂອກາດດຽວກັນນັ້ນທ່ານ ຮອງເຈົ້າແຂວງ ກໍ່ໄດ້ມອບໃບຍ້ອງຍໍ ເພື່ອສະແດງເຖິງຄວາມຂອບໃຈທີ່ແຂວງກວ້າງຈີ້ ສສ ຫວຽດນາມທີ່ໄດ້ປະກອບສ່ວນຊ່ວຍເຫຼືອເຂົ້າໃນວຽກງານປ້ອງກັນ ແລະຄວບຄຸ້ມ, ສະກັດກັນ ແລະແກ້ໄຂການລະບາດຂອງພະຍາດໂຄວິດ-19 ຢູ່ແຂວງສາລະວັນ, ພ້ອມດຽວກັນນັ້ນ ອຳນາດການປົກຄອງແຂວງສາລະວັນ ກໍ່ໄດ້ມອບຕໍ່ໃຫ້ອຳນາດການປົກຄອງເມືອງສະໝ້ວຍ ເປັນຜູ້ປົກປັກຮັກສານຳໄຊ້ໃນຂັ້ນຕອນຕໍ່ໄປ.

ການມອບເຄື່ອງຊ່ວຍເຫຼືອຂອງແຂວງກວ້າງຈີ້ ສສ ຫວຽດນາມ ໃຫ້ແຂວງສາລະວັນຄັ້ງນີ້, ເຊິ່ງສະແດງໃຫ້ເຫັນເຖິງຄວາມເປັນຫວງ, ເປັນໄຍ, ທັງເປັນການເສີມຂະຫຍາຍມູນເຊື້ອຮ່ວມມືສາມະຄີແບບພິເສດລະຫ່ວາງ 2 ຊາດຫວຽດນາມ-ລາວ ໃຫ້ນັບແໜ້ນແຟ້ນຫຍິ່ງຂື້ນ.