ມີເດຍລາວແຂວງໄຊສົມບູນ ບ.ກ ຂ່າວ: ພາພອນ ນະວົງໄຊ ພິທີ ເຊັນບົດບັນທຶກຄວາມເຂົ້າໃຈ MOU ເພື່ອຊອກຄົ້ນ, ສໍາຫຼວດ ແລະ ສຶກສາຄວາມເປັນໄປໄດ້ ທາງດ້ານເສດຖະກິດ-ເຕັກນິກແຮ່ຄໍາ, ແຮ່ເຫຼັກ ແລະ ແຮ່ຕິດພັນ ຢູ່ເຂດບ້ານນໍ້າຊານ ເມືອງລ້ອງແຈ້ງ ແຂວງໄຊສົມບູນ ລະຫວ່າງ ອົງການປົກຄອງ ແຂວງໄຊສົມບູນ ກັບ ບໍລິສັດ ເອທີໂອໂຕ ກໍ່ສ້າງ ຈໍາກັດຜູ້ດຽວ ແລະ ບໍລິສັດ ລຸກຢາວ ຈໍາກັດ ໄດ້ຈັດຂຶ້ນໃນຕອນເຊົ້າຂອງວັນທີ 21 ພຶດສະພາ 2021 ທີ່ສະໂມສອນກອງບັນຊາການທະ ຫານແຂວງ. ໂດຍການໃຫ້ກຽດເຂົ້າຮ່ວມຂອງທ່ານ ພົຕ ຄໍາລຽງ ອຸທະໄກສອນ ເຈົ້າແຂວງໄຊສົມບູນ, ມີປະທານສະພາປະຊາຊົນແຂວງ, ຮອງເລຂາພັກແຂວງ, ຮອງເຈົ້າແຂວງ ແລະ ທ່ານ ສາຍຄໍາ ພິລາວົງ ປະທານບໍລິສັດ ເອທີໂອໂຕ ກໍ່ສ້າງ ຈໍາກັດຜູ້ດຽວ, ທ່ານ ຫງວຽນແມ໋ງເຢິນ ປະທານບໍລິສັດ ລຸກຢາວ ຈໍາກັດ ພ້ອມດ້ວຍເຈົ້າເມືອງລ້ອງແຈ້ງ, ພະແນກການຂອງແຂວງ ແລະ ພາກສ່ວນທີກ່ຽວຂ້ອງ ເຂົ້າຮ່ວມ ເປັນສັກຄີພິຍານ.

ໃນພິທີ ໄດ້ຮັບຟັງລາຍງານກ່ຽວກັບເນື້ອໃນບົດບັນທຶກຄວາມເຂົ້າໃຈ MOU ເພື່ອຊອກຄົ້ນ, ສໍາຫຼວດ ແລະ ສຶກສາຄວາມເປັນໄປໄດ້ ທາງດ້ານເສດຖະກິດ-ເຕັກນິກແຮ່ຄໍາ, ແຮ່ເຫຼັກ ແລະ ແຮ່ຕິດພັນ ໃນເນື້ອທີ່ 8.200 ກິໂລຕາແມັດ ຢູ່ເຂດບ້ານນໍ້າຊານ ເມືອງລ້ອງແຈ້ງ ແຂວງໄຊສົມບູນ. ຊຶ່ງເນື້ອໃນດັ່ງກ່າວ ໄດ້ກໍານົດສິດ, ໜ້າທີ່ ແລະ ພັນທະຕ່າງໆ ຂອງຄູ່ຮ່ວມສັນຍາ ໃນການຊອກຄົ້ນ-ສໍາຫຼວດ, ສຶກສາຄວາມເປັນໄປໄດ້ ທາງດ້ານເສດຖະກິດ-ເຕັກນິກ ແລະ ຜົນກະທົບຕໍ່ສິ່ງແວດລ້ອມ-ສັງຄົມ ໂດຍໄດ້ກໍານົດໄລຍະເວລາໃນການຈັດຕັ້ງປະຕິບັດແມ່ນ 24 ເດືອນ.

ໂອກາດດັ່ງກ່າວ ທ່ານ ພົຕ ຄໍາລຽງ ອຸທະໄກສອນ ໄດ້ມີຄໍາເຫັນຕໍ່ພິທີ ຊຶ່ງທ່ານໄດ້ຍົກໃຫ້ເຫັນເຖິງຄວາມໝາຍ-ສໍາຄັນ ຂອງການພັດທະນາແຂວງ ໄປຕາມທ່າແຮງທີ່ມີຢູ່ນັ້ນ ພ້ອມທັງຮຽກຮ້ອງໃຫ້ບໍລິສັດ ແລະ ພາກສ່ວນທີ່ກ່ຽວຂ້ອງ ຈົ່ງເອົາໃຈໃສ່ໃນການຈັດຕັ້ງປະຕິບັດວຽກງານໄປຕາມສິດ ແລະ ໜ້າທີ່ ທີ່ໄດ້ລະບຸໄວ້ໃນບົດບັນທຶກ ດ້ວຍຄວາມຮັບຜິດຊອບສູງ ເພື່ອເຮັດໃຫ້ໂຄງການດັ່ງກ່າວ ໄດ້ດໍາເນີນໄປຕາມຂັ້ນຕອນ ແລະ ຖືກຕ້ອງ ຕາມລະບຽບຫຼັກການ.

ຈາກນັ້ນ, ທັງສອງຝ່າຍໄດ້ລົງນາມເຊັນບົດບັນທຶກຮ່ວມກັນ ລະຫວ່າງ ທ່ານ ໄຊຍະເດດ ວົງສາຣະວັນ ຫົວໜ້າພະແນກແຜນການ ແລະ ການລົງທຶນແຂວງ ຊຶ່ງໄດ້ຕາງໜ້າອົງການປົກຄອງ ແຂວງໄຊສົມບູນ ແລະ ທ່ານ ສາຍຄໍາ ພິລາວົງ ປະທານບໍລິສັດ ເອທີໂອໂຕ ກໍ່ສ້າງ ຈໍາກັດຜູ້ດຽວ, ທ່ານ ຫງວຽນແມ໋ງເຢິນ ປະທານບໍລິສັດ ລຸກຢາວ ຈໍາກັດ ພ້ອມດ້ວຍເຊັນພະຍານທັງສອງຝ່າຍ ໂດຍຊ້ອງໜ້າການນໍາແຂວງ ແລະ ພະແນກການ ເຂົ້າຮ່ວມເປັນສັກຂີພິຍານ.

ໂອກາດດັ່ງກ່າວ ບໍລິສັດ ຍັງໄດ້ມອບເງິນສົດ ຈໍານວນ 2.500.000.000 ກີບ, ມອບລົດຣີໂວ ຈໍານວນ 3 ຄັນ ມູນຄ່າ 141.000 ໂດລາສະລັດ ຫຼື ເທົ່າກັບ 1 ຕື້ສາມຮ້ອຍລ້ານກ່ວາກີບ ເພື່ອຊຸກຍູ້ການພັດທະນາ ແຂວງໄຊສົມບູນ ພ້ອມທັງມອບເງິນສົດ ຈໍານວນ 121.200.000 ກີບ ແລະ ອຸປະກອນປ້ອງກັນໂຄວິດ 19 ອີກຈໍານວນໜຶ່ງ ລວມມູນຄ່າທັງໝົດ ຈໍານວນ 190.000.000 ກີບ ເພື່ອປະກອບສ່ວນເຂົ້າໃນວຽກງານປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ 19 ຢູ່ແຂວງໄຊສົມບູນ ຕື່ມອີກ.