ມີເດຍລາວແຂວງເຊກອງ ໂດຍ: ແກ້ວໄຊຍະວົງ
ໃນລະຫວ່າງວັນທີ 20-22 ພຶດສະພາ 2021 ນີ້, ຄະນະບໍລິຫານງານພັກແຂວງເຊກອງໄດ້ຈັດກອງປະຊຸມເຊື່ອມຊຶມ ແລະຜັນຂະຫຍາຍມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI ຂອງພັກ, ໂດຍໃຫ້ກຽດເຂົ້າຮ່ວມໂອ້ລົມຂອງສະຫາຍ ເຫຼັກໄຫຼ ສີວິໄລ ກໍາມະການສູນກາງພັກ, ເລຂາພັກແຂວງ, ເຈົ້າແຂວງໆເຊກອງ ເຊິ່ງສະຫາຍໄດ້ເນັ້ນໜັກໃຫ້ພະນັກງານການນໍາຂອງແຂວງ, ພະແນກການ ແລະເມືອງເປັນເຈົ້າການຜັນຂະຫຍາຍມະຕິ XI ຂອງພັກຕິດພັນກັບມະຕິ X ຂອງອົງຄະນະພັກແຂວງໃຫ້ເປັນແຜນງານ, ເປັນໂຄງການ ແລະແຜນການເຄື່ອນໄຫວລະອຽດເພື່ອຈັດຕັ້ງປະຕິບັດ ແນໃສ່ການສ້າງການຫັນປ່ຽນຢ່າງແຂງແຮງຕໍ່ການນໍາພາ-ຊີ້ນໍາ, ປົກປັກຮັກສາ ແລະສ້າງສາພັດທະນາປະເທດຊາດ ກໍຄືແຂວງເຊກອງ.

ການຈັດຕັ້ງກອງປະຊຸມເຊື່ອມຊຶມຄັ້ງນີ້ ກໍເພື່ອແນໃສ່ເຮັດໃຫ້ຄະນະບໍລິຫານງານພັກແຂວງ, ພະນັກງານນໍາພາ-ຄຸ້ມຄອງແຕ່ລະຂັ້ນໃນທົ່ວແຂວງເຊກອງຮັບຮູ້ເຂົ້າໃຈຢ່າງເລິກເຊິ່ງ ແລະກໍາແໜ້ນເນື້ອໃນມະຕິ XI ຂອງສູນກາງພັກ ໂດຍສະເພາະແມ່ນເນື້ອໃນສໍາຄັນຕົ້ນຕໍ ແລະວຽກງານຈຸດສຸມທີ່ຕ້ອງເອົາໃຈໃສ່ນໍາພາ-ຊີ້ນໍາຢູ່ໃນແຕ່ລະຂົງເຂດວຽກງານຕາມຄວາມຮັບຜິດຊອບຂອງຕົນ ຕິດພັນກັບການເສີມຂະຫຍາຍຄວາມເປັນເຈົ້າການໃນການນໍາພາ-ຊີ້ນໍາຈັດຕັ້ງປະຕິບັດເຊື່ອມຊຶມ ແລະຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກໃຫ້ເປັນແຜນງານ, ເປັນໂຄງການ ແລະກິດຈະກໍາລະອຽດໃນຂະແໜງການຕົນ ເພື່ອຈັດຕັ້ງປະຕິບັດໃຫ້ເກີດດອກອອກຜົນຕົວຈິງ, ສ້າງໄດ້ຜົນສໍາເລັດໃໝ່ໃນພາລະກິດປົກປັກຮັກສາ ແລະສ້າງສາພັດທະນາປະເທດຊາດໃນໄລຍະໃໝ່.

ເພື່ອຮັບປະກັນໃຫ້ການດໍາເນີນການເຊື່ອມຊຶມ ແລະຜັນຂະຫຍາຍປະກົດຜົນເປັນຈິງ, ສະຫາຍ ເຫຼັກໄຫຼ ສີວິໄລ ໄດ້ເນັ້ນໜັກຫຼາຍບັນຫາສໍາຄັນໃຫ້ຄະນະບໍລິຫານງານພັກແຂວງ, ພະນັກງານການນໍາບັນດາພະແນກການ ແລະເມືອງພ້ອມກັນປະຕິບັດຄື:
1). ການຄົ້ນຄວ້າເຊື່ອມຊຶມ ແລະຜັນຂະຫຍາຍມະຕິ XI ຂອງພັກຕ້ອງສ້າງໃຫ້ໄດ້ການຫັນປ່ຽນໃໝ່ຢ່າງແຂງແຮງ ແລະເປັນລະບົບ ໂດຍເລີ່ມຈາກການຫັນປ່ຽນດ້ານແນວຄິດ, ຈິນຕະນາການສູ່ການກະທໍາຕົວຈິງ ເພື່ອແກ້ໄຂຈຸດອ່ອນ ແລະບັນຫາຄົງຄ້າງ;
2). ສືບຕໍ່ກະກຽມຈັດຕັ້ງຄົ້ນຄວ້າເຊື່ອມຊຶມ ແລະຜັນຂະຫຍາຍມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI ຂອງພັກຢູ່ບັນດາເມືອງ, ຮາກຖານພະແນກການໂດຍໄວ ເພື່ອເຮັດໃຫ້ພະນັກງານ, ສະມາຊິກພັກຮັບຮູ້ເຂົ້າໃຈຢ່າງເລິກເຊິ່ງ ແນໃສ່ສ້າງການຫັນປ່ຽນທາງດ້ານທັດສະນະ ແລະພຶດຕິກໍາທີ່ສອດຄ່ອງກັບຄວາມຮຽກຮ້ອງຕ້ອງການຂອງໜ້າທີ່ການເມືອງຂອງພັກໃນໄລຍະໃໝ່;

3). ສືບຕໍ່ນໍາພາ-ຊີ້ນໍາ ແລະປັບປຸງແຜນດໍາເນີນງານຂອງຂະແໜງການຕົນ, ຂຸດຄົ້ນຄວ້າທຸກທ່າແຮງບົ່ມຊ້ອນຂອງຂະແໜງການ, ທ້ອງຖິ່ນຕົນສ້າງເປັນແຜນວຽກບູລິມະສິດຄືນໃໝ່ໃຫ້ຕິດພັບກັບມະຕິ XI ຂອງພັກ, ມະຕິ X ຂອງອົງຄະນະພັກແຂວງ ໂດຍສະເພາະ 8 ແຜນງານໃຫຍ່ບູລິມະສິດທີ່ແຂວງວາງອອກ ແລະແບ່ງຄວາມຮັບຜິດຊອບໃຫ້ລະອຽດລະຫວ່າງແຂວງກັບເມືອງ, ລະ ຫວ່າງເມືອງກັບຮາກຖານບ້ານ;
4). ເດັດດ່ຽວແກ້ໄຂຈຸດອ່ອນຂໍ້ຄົງຄ້າງພາຍໃນພັກ, ຮັບປະກັນບົດບາດການເຄື່ອນໄຫວນໍາພາຕົວຈິງທີ່ເຂັ້ມ ແຂງຂອງການຈັດຕັ້ງພັກທຸກຂັ້ນ, ສ້າງໃຫ້ໄດ້ພະນັກງານສືບທອດປ່ຽນແທນໃນແຕ່ລະໆດັບ ແລະແຕ່ລະຂັ້ນ.

5). ສຸມທຸກກໍາລັງແຮງຄວາມສາມາດຂອງຂະແໜງການ ແລະທ້ອງຖິ່ນຕົນ ເພື່ອຈັດຕັ້ງປະຕິບັດບັນດາໜ້າວຽກເລັ່ງດ່ວນຈໍານວນໜຶ່ງເປັນຕົ້ນ: ການແກ້ໄຂບັນຫາຄວາມທຸກຍາກຂອງປະຊາຊົນ; ການຟື້ນຟູປ່າໄມ້ເຂດຍອດນໍ້າຫົວເລນ, ເຂດປ່າຜະລິດ, ປ່າປ້ອງກັນ ແລະປ່າສະຫງວນ; ແກ້ໄຂປະກົດການຫຍໍ້ທໍ້ທາງສັງຄົມ; ການປູກພືດເປັນສິນຄ້າ.
6). ສືບຕໍ່ຈັດຕັ້ງປະຕິບັດມາດຕະການປ້ອງກັນ, ສະກັດກັ້ນ ແລະການລະບາດຂອງພະຍາດໂຄວິດ-19 ຕາມທີ່ລະບຸໄວ້ໃນຄໍາສັ່ງ 15 ຂອງນາຍົກ, ແຈ້ງການຂອງຫ້ອງວ່າການສໍານັກງານນາຍົກລັດຖະມົນຕີ, ຄໍາສັ່ງຂອງຄະນະປະຈໍາພັກແຂວງ ແລະຄໍາສັ່ງຂອງເຈົ້າແຂວງວາງອອກຢ່າງເຂັ້ມງວດ.
7). ສືບຕໍ່ນໍາພາຂະບວນການຜະລິດສິນຄ້າ, ສະບຽງອາຫານ ເພື່ອຕອບສະໜອງກັບຄວາມຕ້ອງການຂອງສັງ ຄົມ, ທັງເປັນການຫຼຸດຜ່ອນການນໍາເຂົ້າສິນຄ້າທີ່ບໍ່ຈໍາເປັນ ແລະສ້າງຄວາມເຂັ້ມແຂງທາງດ້ານການຜະລິດ, ດ້ານສະບຽງອາຫານພາຍໃນແຂວງເຊກອງ.

8). ສືບຕໍ່ເພີ່ມທະວີຕິດຕາມ, ກວດກາ ແລະເວນຍາມຂອງສອງກໍາລັງປະກອບອາວຸດໃນຂອບເຂດທົ່ວແຂວງ ໂດຍສະເພາະເຂດຫຼໍ່ແຫຼມຊາຍແດນ, ຈຸດເຊື່ອມຕໍ່ ເພື່ອສະກັດກັ້ນ ແລະຮັບປະກັນບໍ່ໃຫ້ມີການລັກລອບຊັບພະຍາ ກອນທໍາມະຊາດ ແລະອື່ນໆຂອງກຸ່ມຄົນບໍ່ດີ

ພ້ອມນີ້ ສະຫາຍ ເຫຼັກໄຫຼ ສີວິໄລ ເຈົ້າແຂວງເຊກອງຍັງໄດ້ສະແດງຄວາມເຊື່ອໝັ້ນວ່າ: ພາຍໃຕ້ການນໍາພາ-ຊີ້ນໍາຂອງຄະນະບໍລິຫານງານພັກແຂວງເຊກອງສະໄໝທີ X ຈະເຮັດໃຫ້ການຜັນຂະຫຍາຍ ແລະຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI ຂອງພັກ, ມະຕິກອງປະຊຸມໃຫຍ່ຄັ້ງທີ X ຜູ້ແທນທົ່ວອົງຄະນະພັກແຂວງເຊກອງ ແລະແຜນພັດທະນາເສດຖະກິດ-ສັງຄົມ 5 ປີຄັ້ງທີ IX (2021-2025) ສາມາດປະກົດຜົນເປັນຈິງ, ເຮັດໃຫ້ແຂວງເຊກອງມີຄວາມໜັກແໜ້ນທາງດ້ານການເມືອງ, ສັງຄົມມີຄວາມສະຫງົບສຸກ, ປະຊາຊົນມີຄວາມສາມັກຄີປອງດອງ, ສັງຄົມມີຄວາມຍຸຕິທໍາ ແລະສີວິໄລ.