ມີເດຍລາວແຂວງເຊກອງ ຂ່າວ: ເຈີນ ແດນວົງວິຈິດ
ໃນວັນທີ 21 ພຶດສະພາ 2021 ທີ່ສະໂມສອນເມືອງທ່າແຕງແຂວງເຊກອງຫ້ອງການກະສິກຳແລະປ່າໄມ້ຮ່ວມກັບຫ້ອງການຊາວໜຸ່ມເມືອງທ່າແຕງໄດ້ຈັດກອງປະຊຸມປຶກສາຫາລືການສ້າງສວນປູກໄມ້ຂອງຊາວໜຸ່ມຂຶ້ນ ໂດຍການເປັນປະທານ ຂອງ ທ່ານ ສຸພົນ ໄຊສະຫງ່າ ຮອງເຈົ້າເມືອງທ່າແຕງ, ພ້ອມຄະນະຊາວໜຸ່ມຮາກຖານອ້ອມຂ້າງເມືອງເຂົ້າຮ່ວມ.
ທ່ານ ວຽງສະໝອນ ຈັນເບັງແສງ ຄະນະຫ້ອງການກະສິກຳແລະປ່າໄມ້ເມືອງທ່າແຕງແຂວງເຊກອງກ່າວວ່າ: ຈຸດປະສົງແມ່ນເພື່ອເປັນການປູກຈິດສຳນຶກໃຫ້ແກ່ອະນຸຊົນ,ເພື່ອປົກປັກຮັກສາທີ່ດິນປ່າໄມ້ ແລະ ສິງແວດລ້ອມທຳມະຊາດ,ເຮັດໃຫ້ປ່າໄມ້ມີຄວາມອຸດົມສົມບູນ ແລະ ບໍບົກແຫ້ງ,ໂດຍໄດ້ກຳນົດເອົາຢູ່ຂອບເຂດປ່າປ້ອງກັນພູຈວມເຂດຄຸ້ມຄອງບ້ານ ຫ້ວຍຊາຍ ມີເນື້ອທີ່ 01 ເຮັກຕາ ແລະ ຈະໃຊ້ເບ້ຍໄມ້ປູກ 625 ຕົ້ນເຊັ່ນ: ໄມ້ກິນໝາກຫຼືໄມ້ທີ່ສາມາດປູກໄດ້ໃນທ້ອງຖິ່ນ.

ທ່ານກ່າວອີກວ່າ: ວິທີຈັດຕັ້ງປະຕິບັດແມ່ນມີຄວາມຈຳເປັນແຕ່ງຕັ້ງຄະນະກຳມະການຮັບຜິດຊອບເປັນຜູ້ຮັບຜິດຊອບຊີ້ນຳລວມ, ຄະນະບໍລິຫານງານຊາວໜຸ່ມເມືອງເປັນຜູ້ຊຸກຫຍູ້ບັນດາໜ່ວຍຮາກຖານປະກອບສ່ວນດ້ານແຮງງານຕົ້ນໄມ້ຫຼືທືນຮອນຈຳນວນໜຶ່ງເຂົ້າໃນການສ້າງສວນ,ຫ້ອງການກະສິກຳ ແລະ ປ່າໄມ້ເມືອງທ່າແຕງສະໜອງດ້ານເຕັກນິກວິຊາການ,ຄະນະໜ່ວຍຊາວໜຸ່ມຮາກຖານແຕ່ລະຫ້ອງການ,ບ້ານທ່າແຕງເໜືອ,ທ່າແຕງໃຕ້,ຫ້ວຍຊາຍ,ໂກງຕາຢູນເປັນຜູ້ຈັດຕັ້ງປະຕິບັດຕົວຈິງຢູ່ພາກສະໜາມ.ການສ້າງສວນປູກໄມ້ຂອງຊາວໜຸ່ມແມ່ນເພື່ອແນໃສ່ປະກອບສ່ວນເຮັດໃຫ້ການເພີ່ມເນື້ອທີ່ປົກຫຸ້ມປ່າໄມ້ໃຫ້ໄດ້ 70% ທັງແນໃສ່ໃຫ້ເມືອງ ທ່າແຕງເປັນເມືອງສີຂຽວສະອາດສວຍງາມ, ສ້າງໜໍ່ແໜງການພັດທະນາເສດຖະກິດສີຂຽວ ແລະ ຂັບເຄື່ອນໃຫ້ແຂວງເຊກອງບັນລຸແຕ່ລະເປົ້າໝາຍຂອງການພັດທະນາແບບຍືນຍົງ.

ໂອກາດນີ້ ທ່ານ ສຸພົນ ໄຊສະຫງ່າຮອງເຈົ້າເມືອງໆທ່າແຕງໄດ້ໂອ້ລົມຕໍ່ພິທີດັ່ງກ່າວວ່າ: ເພື່ອຈັດຕັ້ງປະຕິບັດ ສ ສີຂຽວ ຂອງເມືອງທ່າແຕງ ແລະ ສ້າງເມືອງທ່າແຕງ ກໍຄືແຂວງເຊກອງໃຫ້ເປັນພື້ນທີ່ໜຶ່ງທີ່ເປັນຕົວແບບຂອງການອະນຸລັກຮັກສາສິ່ງແວດລ້ອມຕາມທິດຍືນຍົງເປັນພື້ນທີ່ສີຂຽວ ແລະກາຍເປັນຕົວເມືອງທຳມະຊາດໃນອະນາຄົ,ພ້ອມຮຽກຮ້ອງໃຫ້ຫ້ອງການ,ຄະນະຊາວໜຸ່ມຮາກຖານອ້ອມຂ້າງເມືອງຈົ່ງໄດ້ຮ່ວມມືພ້ອມກັນຈັດຕັ້ງປະຕິບັດໃຫ້ປະກົດຜົນເປັນຈິງ.