ຫົວຂໍ້ບົດນີ້ແມ່ນຢືມຄຳກ່າວຂອງທ່ານຜູ້ນຳເຮົາ ທີ່ເພີ່ນກ່າວຕັ້ງແຕ່ປີ 2020 ເຊີ່ງເປັນການລະບາດຮອບທຳອິດ ຂອງ Covid-19 ຄື: ທ່ານ ທອງລຸນ ສີສຸລິດ ເຊີ່ງມັນສະແດງເຖີງຄວາມເປັນຫ່ວງເປັນໄຍ ຂອງທ່ານຜູ້ນຳ ຕໍ່ການແຜ່ລະບາດຂອງພະຍາດຮ້າຍກາດດັ່ງກ່າວ.

ໃນມໍ່ໆ ມານີ້ຄືໃນວັນທີ 21 ພຶດສະພາ 2021 ໃນໂອກາດເຂົ້າຮ່ວມກອງປະຊຸມສາກົນ ວ່າດ້ວຍອະນາຄົດຂອງອາຊີ ຄັ້ງທີ 26 ໃນຮູບແບບທາງໄກ ພາຍໃຕ້ຫົວຂໍ້: “ການສ້າງຍຸກສະໄໝຫຼັງໂຄວິດ-19: ບົດບາດຂອງອາຊີໃນການຟື້ນຕົວຂອງໂລກ” (shaping The post-Covidera : Asia’s role in the global recovery) ເຊີ່ງຈັດຂື້ນຢູ່ປະເທດຍີ່ປຸ່ນ ໂດຍສຳນັກຂ່າວໜັງສືພິມເສດຖະກິດຍີ່ປຸ່ນ (NIKKEI) ໂດຍເຂົ້າຮ່ວມເປັນປະທານ ຂອງທ່ານ ສຶໂຢຊິ ຮາເຊເບະ ປະທານໜັງສືພິມດັ່ງກ່າວ ແລະ ພາກສ່ວນທຸລະກິດຕ່າງໆ ຂອງຍີ່ປຸ່ນເຂົ້າຮ່ວມ.

ໃນກອງປະຊຸມຄັ້ງນີ້ ທ່ານປະທານປະເທດ ໄດ້ຂື້ນກ່າວປາໄສ ໂດຍໄດ້ຍົກໃຫ້ເຫັນເຖີງບັນຫາທີ່ພົ້ນເດັ່ນຂອງໂລກ ແລະ ສີ່ງທ້າທາຍທີ່ພວກເຮົາກຳລັງປະເຊີນຢູ່ໃນປັດຈຸບັນນີ້ ພ້ອມທັງຍົກໃຫ້ເຫັນເຖີງການວາງແຜນທີ່ມີລັກສະນະຍຸດທະສາດຮ່ວມກັນ ເພື່ອຮັບມືກັບສີ່ງທ້າທາຍຕ່າງໆ ພາຍຫຼັງ Covid-19 ບົດບາດສຳຄັນຂອງອາຊີ ໃນການຟື້ນຟູເສດຖະກິດ-ສັງຄົມຂອງໂລກ ແລະ ການເພີ່ມທະວີການຮ່ວມມືທີ່ມີຄຸນນະພາບ ເພື່ອການພັດທະນາທີ່ສອດຄ່ອງກັບຍຸກສະໄໝໃໝ່ດ້ວຍຄວາມຮັບຜິດຊອບຮ່ວມກັນ.

ພ້ອມກັນນີ້ ທ່ານປະທານປະເທດ ແຫ່ງ ສປປລາວ ກໍໄດ້ຍົກໃຫ້ເຫັນບົດບາດ ຂອງ ສປປລາວ ໃນການປະກອບສ່ວນຮ່ວມມືຢ່າງຕັ້ງໜ້າ ເຂົ້າໃນຂະບວນການລວມ ເພື່ອກຽມພ້ອມ ແລະ ຮັບມືກັບວິກິດການຕ່າງໆ ໃນປັດຈຸບັນ ແລະ ອາດເກີດຂື້ນໃໝ່ ແນໃສ່ປົກປັກຮັກສາສັນຕິພາບ ສະຖຽນລະພາບ ແລະ ສ້າງເງື່ອນໄຂອັນສະດວກໃຫ້ແກ່ການພັດທະນາ ຮ່ວມກັບວົງຄະນະຍາດສາກົນ ແລະ ກໍໄດ້ຖືໂອກາດສະແດງຄວາມຂອບໃຈຕໍ່ປະເທດເພື່ອນມິດ ບັນດາຄູ່ຮ່ວມພັດທະນາ ແລະ ອົງການຈັດຕັ້ງສາກົນທີ່ໄດ້ໃຫ້ການຊ່ວຍເຫຼືອ ແກ່ ສປປລາວ ເພື່ອສະກັດກັ້ນ ຄວບຄຸມ ແລະ ແກ້ໄຂການແຜ່ລະບາດ ຂອງພະຍາດໂຄວິດ-19 ຢູ່ ສປປລາວ ແລະ ການຟື້ນຟູເສດຖະກິດ ຫຼັງວິກິດການດັ່ງກ່າວ.

ນັ້ນແມ່ນວິໄສທັດທີ່ສອດຄ່ອງກັບສະພາບການຕົວຈີງ ຂອງທ່ານຜູ້ນຳໃນການຕໍ່ສູ້ກັບສັດຕູໂຕຮ້າຍກາດ ທີ່ເພີ່ນພ້ອມດ້ວຍໝູ່ຄະນະໃນການນຳພັກ-ລັດ ທີ່ຈະເຮັດໃຫ້ພະຍາດນີ້ຫຼຸດນ້ອຍຖອຍລົງເທື່ອລະກ້າວ ໃນ ສປປລາວ ທັງຮັກສາໄດ້ຊີວິດອິນຊີ ຂອງພີ່່ນ້ອງປະຊາຊົນລາວ ບັນດາເຜົ່າຂອງພວກເຮົາ.

ທ່ານ ທອງລຸນ ສີສຸລິດ ປະທານປະເທດ ແຫ່ງ ສປປລາວ ໄດ້ເຂົ້າຮ່ວມກອງປະຊຸມດັ່ງກ່າວໃນຄັ້ງນີ້ເປັນຄັ້ງທີ 5 ຊື່ງທ່ານໄດ້ຮັບການເຊື້ອເຊີນເຂົ້າຮ່ວມ ແລະ ກ່າວປາໄສໃນກອງປະຊຸມດັ່ງກ່າວ ນັບແຕ່ເຄີຍດຳລົງຕຳແໜ່ງເປັນຮອງນາຍົກ ລັດຖະມົນຕີ ລັດຖະມົນຕີກະຊວງການຕ່າງປະເທດ ແລະ ນາຍົກລັດຖະມົນຕີແຫ່ງ ສປປລາວ ເຊີ່ງປາໄສ ແຕ່ລະຄັ້ງ ໄດ້ສະແດງໃຫ້ເຫັນເຖີງວິໄສທັດທີ່ສອດຄ່ອງກັບສະພາບການຕົວຈີງ ແລະ ປີ່ນອ້ອມຫົວຂໍ້ຂອງກອງປະຊຸມໃນແຕ່ລະຄັ້ງ.

ພ້ອມນີ້ຍັງເປັນການປະກອບສ່ວນເຂົ້າໃນການຮັດແໜ້ນສາຍພົວພັນມິດຕະພາບ ແລະ ການຮ່ວມມືອັນດີງາມທີ່ມີມາແຕ່ດົນນານ ກໍຄືການເປັນຄູ່ຮ່ວມມືຍຸດທະສາດ ລະຫວ່າງ ສປປລາວ ແລະ ຍີ່ປຸ່ນ ໃຫ້ກ້ວາງຂວາງແໜ້ນແຟ້ນ ແລະ ເລິກເຊີ່ງຂື້ນກ່ວາເກົ່າ.

ທິດດີ