ມີເດຍລາວແຂວງຫຼວງພະບາງ ຂ່າວ: ພອນສັກ ສິງດາລັກ ( ນັກຂ່າວເມືອງ)
ເພື່ອສ້າງຄວາມສະດວກ ສະບາຍ ໃຫ້ປະຊາຊົນພາຍໃນບ້ານນາຍາງໃຕ້, ເມືອງນ້ຳບາກ ແລະບ້ານໃກ້ຄຽງ ໄດ້ຊົມໃຊ້ເສັ້ນທາງທີ່ດີ ເພາະໄລຍະຜ່ານມາແມ່ນມີຄວາມຫຍຸ້ງຍາກຫຼາຍ ເວລາຍາມແລ້ງ ຫົນທາງມີຂີ້ຝຸ່ນ, ພໍຍາມຝົນຫົນທາງປຽກມື່ນ, ເປັນຂຸມ ເປັນຕົມ. ວັນທີ 27 ພຶດສະພາ ຜ່ານມານີ້ ອົງການປົກຄອງບ້ານ ພ້ອມດວ້ຍປະຊາຊົນ ຈຳນວນ 142 ແຮງງານ, ຍິງ 15 ແຮງງານ ໄດ້ສາມັກຄີກັນ ເທທາງເບ່ຕົງເຂົາຫາບ້ານ.

ທ່ານ ວາດສະໜາ ນາຍບ້ານນາຍາງໃຕ້, ໄດ້ລາຍງານໃຫ້ຮູ້ວ່າ ການເທທາງເບ່ຕົ່ງເຂົ້າຫາບ້ານຂອງຕົນເອງ ເປັນແນວຄວາມຄິດຂອງທຸກຄົນພາຍໃນບ້ານ ທີ່ຢາກໃຫ້ມີເສັນທາງສະດວກສະບາຍ ເຮັດໃຫ້ແຂກທັງພາຍໃນ ແລະຕ່າງປະເທດ ຢາກມາທ່ຽວ ມາເບີ່ງວິຖີຊີວິດຂອງຊົນເຜົ່າໄຕລື້ ມາພັກແຮມ ເພາະບ້ານນາຍາງໃຕ້ ເປັນບ້ານທ່ອງທຽ່ວ ແບບອານຸລັກ ປະຊາຊົນມີສວ່ນຮ່ວມ.

ພາຍຫຼັງມີການລະບາດພະຍາດໂຄວິດ-19 ປະຊາຊົນພາຍໃນບ້ານ ໄດ້ພ້ອມກັນປະຕິບັດຕາມຄຳສັ່ງຂອງທ່ານນາຍົກ ແລະມາດຕະການຕ່າງຯ ຂອງຄະນະສະເພາະກິດ ຢ່າງເຂັ້ມງວດ ພ້ອມທັງລະດົມທືນຈາກປະຊາຊົນພາຍໃນບ້ານ ແລະມີການປະກອບສ່ວນ ຈາກລູກຫຼານ ຢູ່ນະຄອນຫຼວງວຽງຈັນ ແລະແຂວງອື່ນ ໃນນາມສະມາຄົມໄຕ້ລື້ ເຂົ້າມາພັດທະນາທາງເຂົ້າບ້ານ ດ້ວຍການເທເບ່ຕົ່ງ ໄລຍະທາງ 100 ກວ່າແມັດ, ກວ້າງ 6 ແມັດ 50 ຊັງຕີມັດ ປະຈຸບັນສຳເລັດແລ້ວ 42 ແມັດ ລວມມູນຄ່າ 20.540.000 ກີບ, ຖ້າງົບປະມານພຽງພໍ ຈະໃຫ້ສຳເລັດໃນເດືອນມິຖຸນາ ທີ່ຈະມາເຖີງນີ້. ເຊີ່ງເປັນບ້ານທຳອິດຂອງເມືອງນ້ຳບາກ ທີ່ປະຊາຊົນສາມັກຄີກັນ ແລະປະກອບສ່ວນເຫື່ອແຮງ, ວັດຖຸປັດໄຈ ເພື່ອພັດທະນາພື້ນຖານໂຄງລ່າງໃຫ້ມີຄວາມສະດວກສະບາຍ.