ພິທີມອບ-ຮັບ ເຄື່ອງປ້ອງກັັນໂຄວິດ-19 ໃຫ້ແກ່ 9 ແຂວງຂອງ ສປປ ລາວ ທີ່ແຂວງເຊິນລາ ສສ ຫວຽດນາມ ໃຫ້ການຊ່ວຍເຫຼືອໄດ້ຈັດຂຶ້ນໃນວັນທີ 29 ພຶດສະພາ ຜ່ານມາ ຢູ່ທີ່ຫຼັກໝາຍຊາຍແດນລາວ- ຫວຽດນາມ 207 ດ່ານບ້ານດ່ານ ເມືອງແອດ ແຂວງຫົວພັນ ກ່າວມອບໂດຍທ່ານ ນ. ຈາງ ທິ ຊວັນຄະນະປະຈໍາພັກແຂວງ, ຮອງປະທານຄະນະກໍາມະການປະຊາຊົນ ຜູ້ປະຈໍາການແຂວງເຊິນລາ ສ.ສ ຫວຽດນາມ ຕາງໜ້າ 9 ແຂວງຂອງ ສປປ ລາວ ກ່າວຮັບແມ່ນທ່ານ ພອນສຸກ ອິນທະວົງ ຄະນະປະຈຳພັກແຂວງ ຮອງເຈົ້າແຂວງໆ ຫົວພັນ ມີພາກສ່ວນກ່ຽວຂ້ອງທັງສອງແຂວງ ຫົວພັນ-ເຊິນລາ ເຂົ້າຮ່ວມ.

ເຄື່ອງທີ່ໄດ້ຮັບໃນຄັ້ງນີ້ປະກອບມີ:  ເຄື່ອງຊ່ວຍຫາຍໃຈແບບເຄື່ອນທີ່ 18 ເຄື່ອງ, ຜ້າປິດປາກ-ດັງການແພດ 4 ຊັ້ນ 54 ແກັດ, ຜ້າປິດປາກ-ດັງ ຊະນິດແພຝ້າຍ 22 ແກັດ ແລະ ນໍ້າຢາລ້າງມື 750 ແກັດ ລວມມູນຄ່າທັງໝົດ 2 ຕື້ 785 ລ້ານກວ່າດົງ. ຈຳນວນເຄື່ອງດັ່ງກ່າວໄດ້ມອບຊ່ວຍເຫຼືອໃຫ້ 9 ແຂວງຂອງ ສປປ ລາວ ຄື: ແຂວງຫົວພັນ, ຊຽງຂວາງ, ໄຊສົມບູນ, ຫຼວງພະບາງ, ໄຊຍະບູລີ, ອຸດົມໄຊ, ຫຼວງນໍ້າທາ, ບໍ່ແກ້ວ ແລະ ແຂວງຜົ້ງສາລີ ເຊິ່ງແຕ່ລະແຂວງໄດ້ຮັບເຄື່ອງຊ່ວຍຫາຍໃຈ ແຂວງລະ 2 ເຄື່ອງ, ຜ້າປິດປາກ-ດັງ ການແພດແຂວງລະ 6 ແກັດ, ຜ້າປິດປາກ-ດັງ ແພຝ້າຍແຂວງລະ 2 ແກັດ ແລະ ເຈວລ້າງມືແຂວງລະ 83 ແກັດ. ຈຸດປະສົງກໍ່ເພື່ອນໍາໃຊ້ເຂົ້າໃນການປ້ອງກັນ, ຄວບຄຸມ ແລະ ແກ້ໄຂການລະບາດພະຍາດໂຄວິດ-19 ຢູ່ບັນດາແຂວງໃຫ້ໄດ້ຮັບຜົນດີ.

ມາຮອດວັນທີ 30-31 ພຶດສະພາ ຜ່ານມາເຄື່ອງດັ່ງກ່າວ ພະແນກການຕ່າງປະເທດແຂວງຫົວພັນ ສົມທົບກັບພາກສ່ວນກ່ຽວຂ້ອງຂອງແຂວງໄດ້ຈັດສົ່ງໃຫ້ 8 ແຂວງສຳເລັດແລ້ວ ເຊິ່ງແຂວງຊຽງຂວາງ ແລະ ໄຊສົມບູນແມ່ນມາຮັບຢູ່ຈຸດບ້ານສົບເລົ້າ ຊາຍແດນຫົວພັນ-ຊຽງຂວງ; ແຂວງຫຼວງພະບາງ, ໄຊຍະບູລີ, ອຸດົມໄຊ, ຫຼວງນໍ້າທາ, ບໍ່ແກ້ວ ແລະ ແຂວງຜົ້ງສາລີ  ແມ່ນມາຮັບຢູ່ຈຸດບ້ານຫາດສາ ຊາຍແດນຫົວພັນ – ຫຼວງພະບາງ.

ພາບ-ຂ່າວ: ອາລຸນໄຊ