ວັນທີ 4 ພຶດສະພາ 2021 ບໍລິສັດດາວທຽມລາວເອເຊຍ ປາຊີຟິກ ຈຳກັດ (LAOSAT)  ໄດ້ນຳເອົາອຸປະກອນສັນຍານດາວທຽມ ມູນຄ່າທັງໝົດ 32,500,000 ກີບ ມາມອບໃຫ້ກົມສື່ມວນຊົນ ກະຊວງຖະແຫຼງຂ່າວ,​ ວັດທະນະທຳ ແລະ ທ່ອງທ່ຽວ ເຊີ່ງໃຫ້ກຽດມອບໂດຍ ທ່ານ ສີສັນ ປອງນະທີ ຮອງປະທານບໍລິສັດດາວທຽມລາວເອເຊຍ ປາຊີຟິກ ຈຳກັດ (LAOSAT) ແລະ ຕາງໜ້າກ່າວຮັບໂດຍ ທ່ານ ສົມສະຫວາດ ພົງສາ ຫົວໜ້າກົມສື່ມວນຊົນ  ພ້ອມດ້ວຍພະນັກງານກ່ຽວຂ້ອງທັງສອງຝ່າຍເຂົ້າຮ່ວມ.

ອຸປະກອນດັ່ງກ່າວທີ່ມາມອບໃນຄັ້ງນີ້ ເພື່ອນຳໄປຮັບໃຊ້ໃນວຽກງານສະກັດກັ້ນ, ຕ້ານ ແລະ ປ້ອງກັນພະຍາດໂຄວິດ-19 ເຊີ່ງປະກອບມີ: ຊຸດອຸປະກອນຮັບສັນຍານໂທລະພາບຜ່ານດາວທຽມ, ອຸປະກອນ ແລະ ແພັກເກັດອິນເຕີເນັດ ລວມມູນຄ່າທັງໝົດ 32,500,000 ກີບ .

ໃນໂອກາດນີ້ ທ່ານ ສົມສະຫວາດ ພົງສາ ກໍໄດ້ສະແດງຄວາມຂອບໃຈ ມາຍັງບໍລິສັດດາວທຽມລາວ ເອເຊຍ ປາຊີຟິກ ຈຳກັດ (LAOSAT) ຕໍ່ການປະກອນສ່ວນເຂົ້າໃນວຽກງານດັ່ງກ່າວ ເພື່ອແນໃສ່ເຮັດໃຫ້ວຽກງານສະກັດກັ້ນ, ຕ້ານ ແລະ ປ້ອງກັນພະຍາດໂຄວິດ-19 ກໍ່ຄືວຽກງານອື່ນໆ ໃຫ້ມີປະສິດທິຜົນ ສູງ.