ມີເດຍລາ ວແຂວງຄຳມ່ວນ ທ່ານ ຄຳໝັ້ນ ສໍປະເສີດ ຫົວໜ້າພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງຄຳມ່ວນ ໃຫ້ສຳພາດຕໍ່ສື່ມວນຊົນທ້ອງຖິ່ນ ກ່ຽວກັບວັນສິ່ງແວດລ້ອມໂລກ 05 ມິຖຸນາ ຄົບຮອບ 49 ປີ ແລະ ວັນສິ່ງແວດລ້ອມ ແຫ່ງຊາດ ຄົບຮອບ 22 ປີ ໃຫ້ຮູ້ວ່າ: ໂດຍພາຍໃຕ້ສະພາບທີ່ບໍ່ເອື້ອອຳນວຍພໍເທົ່າໃດ ໂດຍສະເພາະແມ່ນມີການ ແຜ່ລະບາດຂອງພະຍາດ ໂຄວິດ-19 ເຮັດໃຫ້ມີຄວາມຈຳກັດໃນຫຼາຍດ້ານຕໍ່ກັບການ ສະເຫຼີມ ສະຫຼອງວັນສິ່ງແວດລ້ອມ ໃນປີນີ້. ເຊິ່ງການຫ້າງຫາກະກຽມໃຫ້ແກ່ວັນດັ່ງກ່າວ ພະແນກຊັບພະຍາກອນ ທຳມະຊາດ ແລະ ສິ່ງແວດລ້ອມ ແມ່ນໄດ້ສົມທົບກັບພະແນກກະສິກຳ ແລະ ປ່າໄມ້ແຂວງ

ໃນການສ້າງເຂດທີ່ມີຄວາມປົກຫຸ້ມທາງດ້ານປ່າໄມ້ ໂດຍຖືເອົາ ວັນທີ 01 ມິຖຸນາ ສ້າງຂະບວນການປູກຕົ້ນໄມ້ ພາຍໃຕ້ຄຳຂວັນ “ຮ່ວມແຮງຮ່ວມໃຈກັນ ຟື້ນຟູລະບົບນິເວດ” ແລະ ໄດ້ປະສານສົມທົບກັບເມືອງທ່າແຂກ ເພື່ອອອກແຈ້ງການໃຫ້ພໍ່ແມ່ປະຊາຊົນໃນທົ່ວເມືອງ ສ້າງຂະບວນການອະນາໄມ ຕາມສາຍທາງ, ຄອງລະບາຍນໍ້າ ແລະ ສະຖານທີ່ຕ່າງໆ ເພື່ອຄວາມສະອາດງາມຕາ ແລະ ເຮັດໃຫ້ລະບົບນິເວດດີຂຶ້ນ.

ໃນໂອກາດວັນສິ່ງແວດລ້ອມໂລກ ແລະ ວັນສິ່ງແວດລ້ອມແຫ່ງຊາດໃນປີນີ້ ຂໍຮຽກຮ້ອງມາຍັງບັນດາພະນັກ ງານ, ທະຫານ, ຕຳຫຼວດ ຕະຫຼອດຮອດພໍ່ແມ່ປະຊາຊົນຊາວແຂວງຄຳມ່ວນ ຈົ່ງໄດ້ໃຫ້ຄວາມສຳຄັນເອົາໃຈໃສ່ ແລະ ຮ່ວມໄມ້ຮ່ວມມືໃນການປົກປັກຮັກສາສິ່ງແວດລ້ອມ ເປັນຕົ້ນແມ່ນການນຳໃຊ້ວັດສະດຸທີ່ມີການຍ່ອຍສະຫຼາຍງ່າຍ ຫຼີກ ລ້ຽງການນຳໃຊ້ວັດສະດຸທີ່ສ້າງມົນລະພິດທາງດ້ານສິ່ງແວດລ້ອມ, ໃຫ້ທຸກຄົນຖືເອົາການປົກປັກຮັກສາສິ່ງແວດລ້ອມ ປຽບເໝືອກັບການປົກປັກຮັກສາຊີວິດ ແລະ ຊັບສິນຂອງຕົນເອງ ເພື່ອອະນາຄົດຂອງລູກ-ຫຼານ ໃຫ້ມີຊີວິດການເປັນຢູ່ ທີ່ດີ ແລະ ມີຄວາມຍືນຍົງ ພ້ອມກັນນັ້ນກໍ່ຕ້ອງເອົາໃຈໃສ່ໃນການຟື້ນຟູສິ່ງແວດລ້ອມ ເປັນຕົ້ນແມ່ນການປູກຕົ້ນໄມ້ ໃຫ້ເປັນຂະບວນ ເພື່ອໃຫ້ເຮືອນຮົ່ມ ແລະ ເພື່ອເຮັດໃຫ້ມີການກັ່ນກອງມົນລະພິດທາງດ້ານອາກາດ.

ເຊິ່ງໃນປະຈຸບັນ ພະແນກຊັບພະຍາກອນທຳມະຊາດ ແລະ ສິ່ງແວດລ້ອມ ໄດ້ມີການຮ່າງຂໍ້ກຳນົດວ່າດ້ວຍການຄຸ້ມຄອງສິ່ງເສດເຫຼືອ ແລະ ຂີ້ເຫຍື້ອ ເຊິ່ງຈະໄດ້ນຳເຂົ້າຜ່ານກອງປະຊຸມສະພາປະຊາຊົນທ້ອງຖິ່ນ ແລະ ຈະໄດ້ມີການຈັດຕັ້ງປະຕິບັດ ເຜີຍແຜ່ ເຊື່ອມຊຶມລົງເຖິງຂັ້ນຮາກຖານບ້ານ ເພື່ອເຮັດໃຫ້ພໍ່ແມ່ປະຊາຊົນໄດ້ຮັບຮູ້ ແລະ ເຫັນໄດ້ຄວາມສຳຄັນໃນການ ປົກປັກຮັກສາສິ່ງແວດລ້ອມ ໃຫ້ມີຄວາມຍືນຍົງຕາມທິດສີຂຽວທີ່ລັດຖະບານໄດ້ກຳນົດໄວ້.