ມີເດຍລາວແຂວງໄຊສົມບູນ ຂ່າວ: ສຸກສັນ ອ້ວນລິທິກຸນ ໃນຕອນເຊົ້າຂອງວັນທີ 8 ມີຖຸນາ 2021 ນີ້ ຄະນະເລຂາທິການສະພາປະຊາຊົນ ແຂວງໄຊສົມບູນ ໄດ້ຈັດກອງປະຊຸມວຽກງານຂອງຄະນະເລຂາທິການ ສະພາປະຊາຊົນແຂວງຂື້ນ ທີ່ສະໂມສອນເມືອງອະນຸວົງ, ພາຍໃຕ້ການເປັນປະທານຮ່ວມ ຂອງທ່ານ ແດງ ປະທຸມທອງ, ປະທານສະພາປະຊາຊົນ ແຂວງ ແລະ ທ່ານ ນາງ ຂັນກາບ ໄຊຍະກຸມມານ, ເລຂາທິການ ສະພາປະຊາຊົນແຂວງ, ມີບັນດາຮອງປະທານສະພາປະຊາຊົນແຂວງ, ບັນດາກໍາມະການຄະນະປະຈໍາ ສະພາປະຊາຊົນ ແຂວງ ພ້ອມດ້ວຍພະນັກງານ-ລັດຖະກອນ ສະພາປະຊາຊົນແຂວງເຂົ້າຮ່ວມ.

ໃນກອງປະຊຸມ ທ່ານ ບີ ເຮີ, ຮອງເລຂາທິການ ສະພາປະຊາຊົນແຂວງ ຂຶ້ນຜ່ານຮ່າງ ທິດທາງແຜນການເຄື່ອນໄຫວວຽກງານ 05 ປີ (2021-2025) ຂອງຄະນະເລຂາທິການ ສະພາປະຊາຊົນ ແຂວງໄຊສົມບູນ ເຊິ່ງຮ່າງທິດທາງແຜນການເຄື່ອນໄຫວວຽກງານ 05 ປີ ດັ່ງກ່າວນີ້ ໄດ້ຍົກໃຫ້ເຫັນບັນດາຈຸດປະສົງ ແລະ ຄາດໝາຍສູ້ຊົນຕົ້ນຕໍ, ດ້ານການຈັດຕັ້ງປະຕິບັດວຽກງານ, ດ້ານການປະສານສົມທົບ ແລະ ມາດຕະການຈັດຕັ້ງປະຕິບັດວຽກງານ 05 ປີ ຕໍ່ໜ້າ ເພື່ອຮັບປະກັນການຈັດຕັ້ງປະຕິພາລະບົດບາດ, ສິດ ແລະ ໜ້າທີ່ຂອງຄະນະເລຂາທິການ ສະພາປະຊາຊົນແຂວງ ໃຫ້ມີຄຸນນະພາບສູງຂຶ້ນ ພ້ອມດຽວກັນນີ້ ຜູ້ເຂົ້າຮ່ວມກອງປະຊຸມໄດ້ຜັດປ່ຽນກັນຂື້ນປະກອບຄໍາຄິດ-ຄໍາເຫັນ ໃສ່ຮ່າງທິດທາງແຜນການເຄື່ອນໄຫວວຽກງານ 05 ປີໃນຕໍ່ໜ້າ ຢ່າງກົງໄປ-ກົງມາ ດ້ວຍຄວາມຮັບຜິດຊອບສູງ.

ທັງນີ້ ກໍ່ເພື່ອຈັດຜັນຂະຫຍາຍທິດທາງແຜນການ 05 ປີ ຂອງສະພາປະຊາຊົນແຂວງ, ມາເປັນແຜນການ, ແຜນງານ ແລະ ສູ້ຊົນຈັດຕັ້ງປະຕິບັດໃຫ້ໄດ້ຮັບຜົນສໍາເລັດຕາມແຜນການທີ່ວາງໄວ້. ໂອກາດນີ້ ທ່ານ ແດງ ປະທຸມທອງ ປະທານສະພາປະຊາຊົນແຂວງ ໄດ້ມີຄໍາເຫັນ ໂອ້ລົມ ຕໍ່ກອງປະຊຸມ ຊຶ່ງທ່ານໄດ້ເນັ້ນໜັກໃຫ້ຄະນະເລຂາທິການ ຈົ່ງສືບຕໍ່ຈັດຕັ້ງປະຕິບັດວຽກງານ ດ້ວຍຄວາມຮັບຜິດຊອບສູງ ໂດຍສຸມໃສ່ວຽກງານສຶກສາອົບຮົມການເມືອງ-ແນວຄິດ ໃຫ້ຖັນແຖວພະນັກງານສະມາຊິກພັກ ເປັນວຽກກົກ ໄປຄຽງຄູ່ກັບການປັບປຸງກົງຈັກການຈັດຕັ້ງ ຂອງຄະນະເລຂາທິການສະພາປະຊາຊົນແຂວງ ໂດຍສະເພາະກົງຈັກທີ່ເປັນເສນາທິການໃຫ້ແຕ່ລະຂະແໜງການຕ່າງໆ ການຊັບຊ້ອນຈັດວາງພະນັກງານໃຫ້ເປັນລະບົບ ແລະ ສືບຕໍ່ປັບປຸງການຈັດຕັ້ງການເຄື່ອນໄຫວຂອງແຕ່ລະຂະແໜງການທີ່ບໍ່ທັນສອດຄ່ອງ ແລະ ສືບຕໍ່ປັບປຸງລະບອບແບບແຜນວິທີເຮັດວຽກ ເພື່ອຮັບປະກັນຄຸນນະພາບໃຫ້ນັບມື້ນັບສູງຂື້ນ ແລະ ຈົ່ງພ້ອມກັນ ເພີ່ມທະວີ ຄວາມສາມັກຄີເປັນເອກະພາບ ທາງດ້ານແນວຄິດ ແລະ ການກະທໍາ, ຍົກສູງຄວາມຮັບຜິດຊອບ ແລະ ຄວາມເປັນເຈົ້າການເຮັດສໍາເລັດໜ້າທີ່ວຽກງານ ທີ່ໄດ້ຮັບມອບໝາຍໄດ້ເປັນຢ່າງດີ.