ມີເດຍລາວແຂວງສາລະວັນ ພາບ-ຂ່າວ: ສິດຕາ ເພັດວົງສາ ໃນວັນທີ 9 ມີຖຸນາ 2021 ນີ້, ແຂວງສາລະວັນ ເຊື່ອມຊືມ ແລະ ຜັນຂະຫຍາຍມະຕິກອງປະຊຸມ​ໃຫຍ່ ຄັ້ງທີ XI ຂອງພັກປະຊາຊົນປະຕິວັດລາວ ແລະ ມະຕິກອງປະຊຸມໃຫ່ຍຄັ້ງທີ IX ຂອງອົງຄະນະພັກແຂວງ, ຂື້ນທີ່ສະໂມສອນແຂວງ, ໂດຍພາຍໄຕ້ການເປັນປະທານສະຫາຍ ປອໂພໄຊ ໄຊຍະສອນ ກໍາມະການສູນກາງງພັກ ເລຂາພັກແຂວງ ເຈົ້າແຂວງສາລະວັນ, ​ມີ​ຄະ​ນະ​ປະ​ຈຳ​ພັກ​ແຂວງ, ກຳ​ມະ​ການ​ພັກ​ແຂວງ, ເຈົ້າ​ເມືອງໃນ 8 ຕົວ​ເມືອງ, ອົງ​ການ​ທຽບ​ເທົ່າ, ກຳ​ລັງ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະ​ຫງົບ​ເຂົ້າ​ຮ່ວມ.

          ທ່ານ ໂພໄຊ ໄຊຍະສອນ ໄດ້​ມີ​ຄຳ​ເຫັນ​ວ່າ: ​ການເຊື່ອມຊືມ ແລະ ຜັນຂະຫຍາຍມະຕິກອງປະຊຸມ​ໃຫຍ່ ຄັ້ງທີ XI ຂອງພັກປະຊາຊົນປະຕິວັດລາວ ແລະມະຕິກອງປະຊຸມໃຫ່ຍຄັ້ງທີ IX ຂອງອົງຄະນະພັກແຂວງໃນເທື່ອ​ນີ້ ແມ່ນ​ມີ​ຄວາມ​ໝາຍ​ຄວາມ​ສຳ​ຄັນ​ຍິ່ງ ເພື່ອ​ພ້ອມ​ກັນ​ສ້າງ​ຄວາມ​ເປັນ​ເອ​ກະ​ພາບ, ຄວາມ​ຮັບ​ຮູ້​ເຂົ້າ​ໃຈ​ຕໍ່​ເນື້ອ​ໃນ​ຂອງ​ມະ​ຕິ​ດັ່ງ​ກ່າວ​ໃຫ້​ມີ​ທັດ​ສະ​ນະ​ຖືກ​ຕ້ອງ, ມີ​ມາ​ນະ​ຈິດ, ມີ​ຄວາມ​ຕັດ​ສິນ​ໃຈ​ເປັນ​ເອ​ກະ​ພາບ​ໃນ​ການ​ຈັດ​ຕັ້ງ​ປະ​ຕິ​ບັດ​ໃຫ້​ມີ​ຜົນ​ສຳ​ເລັດ​ໃໝ່​​ເຂັ້ມ​ແຂງກວ່າ​ເກົ່າ ພ້ອມ​ທັງ​ແກ້​ໄຂ​ຂໍ້​ຄົງ​ຄ້າງແບບ​ແຜນ​ວິ​ທີ​ເຮັດ​ວຽກ​ທີ່ບໍ່​ຖືກ​ຕ້ອງ​ສອດ​ຄ່ອງ​ໃນ​ຜ່ານ​ມາ ເພື່ອ​ພັດ​ທະ​ນາ​ແຂວງ​ສາ​ລະ​ວັນ​ໃຫ້​ກ້າວ​ຂຶ້ນ, ​​ຫັນ​ປ່ຽນ​ທາງ​ດ້ານ​ແນວ​ຄິດ-ຈິນ​ຕະ​ນາ​ການ​ຢ່າງ​ແຂງ​ແຮງ, ປັບ​ປຸງ, ຍົກ​ສູງຫຼັກ​ໝັ້ນ​ການ​ເມືອງ, ຍົກ​ສູງນ້ຳ​ໃຈ​ເສຍ​ສະຫຼະ, ​ຍຶດ​ໝັ້ນ​ອຸ​ດົມ​ການ​ປະ​ຕິ​ວັດ​, ເພີ່ມ​ທະ​ວີ​ຄວາມ​ສາ​ມັກ​ຄີ​ພາຍ​ໃນ​ພັກ ແລະ ພາຍ​ໃນ​ສັງ​ຄົມ​ໃຫ້​ໜັກ​ແໜ້ນກວ້າງ​ຂວາງ.

          ສຳ​ລັບ​ການ​ຈັດ​ຕັ້ງ​ເຊື່ອມ​ຊຶມ​ໃນ​ຄັ້ງ​ນີ້ ຜູ້​ເຂົ້າ​ຮ່ວມ​ໄດ້​ຮັບ​ຟັງ​ການ​ເຜີຍ​ແຜ່​ຄຳ​ສັ່ງ​ຂອງ​ຄະ​ນະ​ເລ​ທິ​ການ​ສູນ​ກາງ​ພັກ ສະ​ບັບ​ເລກ​ທີ 38/ຄ​ລ​ສ​ພ ລົງ​ວັນ​ທີ 9 ມີ​ນາ 2021 ວ່າ​ດ້ວຍ​ການ​ຈັດ​ຕັ້ງ​ເຊື່ອ​ມ​ຊຶມ ແລະ ຜັນ​ຂະ​ຫຍາຍ​ມະ​ຕິ​ກອງ​ປະ​ຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​ຄັ້ງ​ທີ XI ຂອງ​ພັກ, ມະ​ຕິ​ກອງ​ປະ​ຊຸມ​ຄົບ​ຄະ​ນະ ຂອງ​ຄະ​ນະ​ບໍ​ລິ​ຫານ​ງານ​ສູນ​ກາງ​ພັກ ຄັ້ງ​ທີ 2 ສະໄໝ​ທີ XI, ມະ​ຕິ​ກອງ​ປະ​ຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​ຄັ້ງ​ທີ XI ຂອງ​ພັກປະ​ຊາ​ຊົນ​ປະ​ຕິ​ວັດ​ລາວ, ແຜນ​ພັດ​ທະ​ນາ​ເສດ​ຖະ​ກິດ-ສັງ​ຄົມ​ແຫ່ງ​ຊາດ ຄັ້ງ​ທີ 9 (2021-2025), ກົດ​ລະ​ບຽບ ແລະ ເອກ​ສານ​ລາຍ​ງານ​ການ​ເມືອງ ​ຄັ້ງ​​ທີ XI​ ຂອງ​ພັກປະ​ຊາ​ຊົນ​ປະ​ຕິ​ວັດ​ລາວ, ຜົນ​ສຳ​ເລັດ​ການ​ຈັດ​ຕັ້ງ​ປະ​ຕິ​ບັດ​ມະ​ຕິ​ກອງ​ປະ​ຊຸມ​ໃຫຍ່ ຄັ້ງ​ທີ VIII ຂອງ​ອົງ​ຄະ​ນະ​ພັກ​ແຂວງ, ທິດ​ທາງ​ລວມ, ທິດ​ທາງ​ຈຸດ​ສຸມ ແລະ ໜ້າ​ທີ່​ຕົ້ນ​ຕໍ​ແຕ່​ປີ 2021-2025 ເພື່ອ​ນຳ​ພາ​ແຂວງ​ສາ​ລະ​ວັນ ຫຼຸດ​ພົ້ນ​ອອກ​ຈາກ​ຄວາມ​ທຸກ​ຍາກ. ຈາກນັ້ນ ກອງ​ປະ​ຊຸມ​ກໍ​ໄດ້​ມີ​ການ​ແບ່ງ​ຈຸ ເພື່ອ​ຄົ້ນ​ຄວ້າ​ພິ​ຈາ​ລະ​ນາບັນ​ຫາ​ຕ່າງ​ໆ, ກອງ​ປະ​ຊຸມ​ຄັ້ງ​ນີ້​ຈະ​ດຳ​ເນິນ​ໄປ​ເປັນ​ເວ​ລາ 2 ວັນ​ຈະ​​ສຳ​ເລັດ.