ມີເດຍລາວແຂວງເຊກອງ ພາບ-ຂ່າວ: ພຸດທະສອນ ພິທີມອບ-ຮັບ ໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2020 ຂອງໜ່ວຍພັກຮາກຖານສະຫະພັນແມ່ຍິງແຂວງເຊກອງ ໄດ້ຈັດຂຶ້ນໃນວັນທີ 10 ມິຖຸນາ 2021 ນີ້ ໂດຍການເປັນກຽດເຂົ້າຮ່ວມຂອງ ສະຫາຍນາງ ຈັນຫອມ ມະຫາໄຊ ຮອງເລຂາພັກແຂວງ, ຜູ້ຊີ້ນໍາວຽກງານຂົງເຂດພັກ-ພະນັກງານ, ມີສະຫາຍ ນາງ ວິໄລວັນ ດາລາສິນ ກໍາມະການພັກແຂວງ, ເລຂາໜ່ວຍພັກ, ປະທານສະຫະພັນແມ່ຍິງແຂວງ, ພ້ອມດ້ວຍຄະນະໜ່ວຍພັກ, ສະມາຊິກພັກພາຍໃນໜ່ວຍ ແລະແຂກຖືກເຊີນເຂົ້າຮ່ວມ.

ໃນພິທີ ສະຫາຍ ນາງ ເພັດດາແກ້ວ ພົນສາລາດ ຮອງເລຂາໜ່ວຍພັກ, ຮອງປະທານສະຫະພັນແມ່ຍິງແຂວງ ໄດ້ສະຫລຸບລາຍງານ ການສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2020 ວ່າ: ໜ່ວຍພັກ ສຍ ແຂວງເຊກອງ ມີສະມາຊິກພັກທັງໝົດ 18 ສະຫາຍ, ຍິງ 18 ສະຫາຍ, ໃນໄລຍະ 1 ປີຜ່ານມາ ຄະນະໜ່ວຍພັກໄດ້ຖືເອົາວຽກງານສຶກສາອົບຮົມການເມືອງ-ນຳພາແນວຄິດເປັນວຽກງານທີ່ສຳຄັນ, ເອົາໃຈໃສ່ນຳເອົາແນວທາງນະໂຍບາຍຂອງພັກ, ມະຕິຄຳສັ່ງ, ລະບຽບກົດໝາຍຂອງລັດ ມາເຜີຍແຜ່ໃຫ້ແກ່ສະມາຊິກພັກ-ພະນັກງານ, ຕະຫລອດຮອດສະມາຊິກສະຫະພັນແມ່ຍິງ ແລະເອື້ອຍນ້ອງແມ່ຍິງຢູ່ໃນຄວາມຮັບຜິດຊອບຂອງຕົນ ມີ 7 ຄັ້ງ, ມີຜູ້ເຂົ້າຮ່ວມ 195 ເທື່ອຄົນ, ໂດຍຢຶດໝັ້ນ 5 ຫຼັກການ 3 ທິດນຳ ໃນການຄົງຕົວ ແລະຂະຫຍາຍຕົວຂອງພັກ, ເອົາໃຈໃສ່ຫັນນເອົາແນວທາງ, ແຜນນະໂຍບາຍຂອງພັກ ເປັນແຜນອັນລະອຽດຂອງໜ່ວຍພັກ ໂດຍສອດຄ່ອງກັບໜ້າທີ່ວິຊາສະເພາະ ຈົນມີຜົນສໍາເລັດ, ໄດ້ສ້າງກອງທຶນປະກັນສັງຄົມຊາວຍສະມາຊິກເສຍຊີວິດ 1 ກອງທອນ, ມີສະມາຊິກ 1.039 ຄົນ, ມີເງິນສະສົມ 10 ລ້ານກວ່າກີບ, ສ້າງກຸ່ມທ້ອນເງິນ ມີສະມາຊິກ 40 ຄົນ, ມີເງິນທ້ອນທັງໝົດ 39 ລ້ານກວ່າກີບ,ໄດ້ເປີດການຮຽນການສອນວິຊາຊີບຕັດຫຍິບ ພາກຄໍ່າໄດ້ 1 ຊຸດ; ຜ່ານການຕີລາຄາ ສາມາດຈັດປະເພດສະມາຊິກພັກແຂງໄດ້ 14 ສະຫາຍ, ພ້ອມນີ້ ກໍໄດ້ຜ່ານແຜນການກໍ່ສ້າງໜ່ວຍພັກປອດໃສ,ເຂັ້ມແຂງ,ໜັກແໜ້ນ ປະຈຳປີ 2021;


ຈາກນັ້ນ ຕາງໜ້າຄະນະຈັດຕັ້ງແຂວງ ກໍໄດ້ຂຶ້ນຜ່ານມະຕິຕົກລົງຂອງຄະນະປະຈໍາພັກແຂວງ ວ່າດ້ວນການຮັບຮອງໜ່ວຍພັກຮາກຖານ ສຍ ແຂວງເຊກອງ ເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2020 ແລະແຜນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2021; ຂະນະດຽວກັນ ສະຫາຍ ນາງ ຈັນຫອມ ມະຫາໄຊ ກໍໄດ້ໃຫ້ກຽດມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2020 ໃຫ້ໜ່ວຍພັກຮາກຖານສະຫະພັນແມ່ຍິງແຂວງເຊກອງ.