ມີເດຍລາວແຂວງເຊກອງ (ຂ່າວ-ພາບ: ບູ້ສຸວັນ) ເພື່ອເຮັດໃຫ້ການຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI ຂອງພັກ ກໍຄືມະຕິກອງປະຊຸມໃຫຍ່ຄັ້ງທີ X ຂອງອົງຄະນະພັກແຂວງເຊກອງ ເປັນຂະບວນການກວ້າງຂວາງ, ເລິກເຊິ່ງ ແລະການຜັນຂະຫຍາຍເຂົ້າສູ່ວຽກງານຕົວຈິງໃນແຕ່ລະຂະແໜງການ. ໃນວັນທີ 9-10 ມິຖຸນາ 2021 ພະແນກຖະແຫຼງຂ່າວ, ວັດທະນະທໍາ ແລະທ່ອງທ່ຽວ (ຖວທ) ແຂວງເຊກອງ ໄດ້ຈັດກອງປະຊຸມເຊື່ອມຊຶມ ແລະຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ ຕິດພັນກັບມະຕິ X ຂອງອົງຄະນະພັກແຂວງ ໂດຍການເປັນປະທານຂອງ ສະຫາຍ ບູ່ໄຊ ໄຊຍະເສນ ກຳມະການພັກແຂວງ, ເລຂາຄະນະພັກ, ຫົວໜ້າພະແນກ ຖວທ; ພ້ອມນີ້ ກໍມີບັນດາສະຫາຍຄະນະພັກ-ຄະນະພະແນກ, ສະມາຊິກພັກ-ລັດຖະກອນເຂົ້າຮ່ວມຢ່າງພ້ອມພຽງ.

ການຈັດຕັ້ງເຊື່ອມຊຶມ ແລະຜັນຂະຫຍາຍຄັ້ງນີ້ ກໍເພື່ອໃຫ້ສະມາຊິກພັກ-ພະນັກງານຮັບຮູ້ເຂົ້າໃຈຢ່າງເລິກເຊິ່ງ ແລະກຳແໜ້ນເນື້ອໃນມະຕິ XI ຂອງພັກ, ມະຕິ X ຂອງອົງຄະນະພັກແຂວງ ໂດຍສະເພາະແມ່ນເນື້ອໃນສຳຄັນຕົ້ນຕໍ ແລະວຽກງານຈຸດສຸມທີ່ຕິດພັນກັບພາລະບາດ, ສິດ ແລະໜ້າທີ່ຄວາມຮັບຜິດຊອບຂະແໜງການຕົນ ແນໃສ່ສ້າງການຫັນປ່ຽນດ້ານແນວຄິດຈິນຕະນາການ, ປັບປຸງຍົກສູງຫຼັກໝັ້ນການເມືອງ, ນ້ຳໃຈເສຍສະຫຼະ ແລະສ້າງຄວາມເປັນເອກະພາບໃນການຈັດຕັ້ງປະຕິບັດ ເຮັດໃຫ້ການພັດທະນາວຽກງານ ຖວທ ມີຜົນສຳເລັດໃໝ່ທີ່ດີຂຶ້ນກວ່າເກົ່າ.

ໃນໂອກາດນີ້ ກໍໄດ້ສະຫຼຸບຕີລາຄາການເຄື່ອນໄຫວັດຕັ້ງປະຕິບັດວຽກງານ ຖວທ 6 ເດືອນຕົ້ນປີ ແລະວາງທິດທາງແຜນການ 6 ເດືອນທ້າຍປີ 2021 ແລະຜ່ານຮ່າງແຜນດຳເນີນງານ 5 ປີ (2021-2025) ຕື່ມອີກ.