ມີເດຍລາວແຂວງຜົ້ງສາລີ ( ພາບ – ຂ່າວ: ແສງຄຳ ສາລີວັນ )
ໃນວັນທີ 13 ມີຖຸນາ 2021 ນີ້, ທ່ານ ຄຳຜອຍ ວັນນະສານ ກຳມະການສູນກາງພັກ, ເລຂາພັກແຂວງ, ເຈົ້າແຂວງ-ແຂວງຜົ້ງສາລີ ປະທານປ້ອງກັນຊາດ-ປ້ອງກັນຄວາມສະຫງົບ ພ້ອມດ້ວຍຄະນະໄດ້ລົງເຄື່ອນໄຫວຢ້ຽມ ແລະ ຊຸກຍູ້ວຽກງານຮອບດ້ານຢູ່ດ່ານສາກົນປາງຫົກ. ໂອກາດນີ້ກໍ່ໄດ້ຮັບການຕ້ອນຮັບຈາກຄະນະດ່ານ, ພະນັກງານລັດຖະກອນປະຈຳດ່ານຢ່າງອົບອຸ່ນ. ພ້ອມທັງໄດ້ຮັບຟັງການລາຍງານສະພາບການຈັດຕັ້ງປະຕິ ບັດວຽກງານຮອບ ດ້ານຂອງດ່ານ ໃນໄລຍະ 05 ເດືອນຕົ້ນປີ 2021 ທີ່ຜ່ານມາໂດຍຫຍໍ້ ຈາກທ່ານ ພັນຕີ ຫລຽນທອງ ພົງທະດີ ຮອງຫົວຫນ້າຄຸ້ມຄອງດ່ານສາກົນປາງຫົກ, ເຊີ່ງດ່ານສາກົນປາງຫົກມີເນື້ອທີ່ 1,63 ຮຕ, ຕັ້ງຢູ່ເສັ້ນທາງເລກທີ 2E ເຂດຫັ້ຼກໝາຍຊາຍແດນ 113 ລະຫ່ວາງຊາຍແດນລາວ-ຫວຽດນາມ, ເຊີງໜ້າກັບດ່ານສາກົນໄຕຈາງ ສສ ຫວຽດນາມ.

ຄະນະຄຸ້ມຄອງດ່ານສາກົນປາງຫົກ ແມ່ນກົງຈັກໜຶ່ງຂອງອົງການປົກຄອງແຂວງ, ມີພາລະບົດບາດເປັນເສນາທິການໃຫ້ແກ່ອົງການປົກຄອງແຂວງ ໃນການຄຸ້ມຄອງບໍລິຫານລັດຢູ່ໃນຂອບເຂດດ່ານສາກົນປາງຫົກ ເພື່ອຮັບປະກັນໃຫ້ບັນດາຂະແໜງການຄຸ້ມຄອງລັດທາງດ້ານວິຊາສະເພາະໄດ້ມີການເຄື່ອນໄຫວຢ່າງຄ່ອງຕົວແນ່ໃສ່ອຳນວຍຄວາມສະດວກໃຫ້ແກ່ຜູ້ໂດຍສານ, ຍານພາຫະນະ ແລະ ສິນຄ້າເຄື່ອງຂອງເຂົ້າ – ອອກດ່ານໃຫ້ມີຄວາມສະດວກວ່ອງໄວ, ໂປ່ງໃສ, ເປັນທຳ, ປອດໄພ, ຖືກຕ້ອງຕາມກົດໝາຍ ແລະ ລະບຽບການ. ວຽກງານປ້ອງກັນຄວາມສະຫງົບ-ປ້ອງກັນຊາຍແດນ ແມ່ນໄດ້ເປັນເຈົ້າການຕິດຕາມກວດກາຄົນເຂົ້າອອກ-ເມືອງ, ປ້ອງກັນເວນຍາມຕະຫຼອດ 24 ຊົ່ວໂມງ, ຮັກສາໄດ້ຄວາມສະຫງົບ, ຄວາມປອດໄພ, ຄວາມເປັນລະລະບຽບຮຽບຮ້ອຍຢູ່ພາຍໃນດ່ານຕາມຂອບເຂດຄວາມຮັບຜິດຊອບ, ກວດກາເອກະສານທຸກປະເພດຂອງຍານ ພາຫະນະ, ລວມວັດຖຸສິ່ງຂອງທີ່ນອນໃນລາຍ ການສິນຄ້າ, ຈັດສັນຄວາມເປັນລະບຽບຮຽບຮ້ອຍຍານພາຫະນະທີ່ມາຜ່ານດ່ານ ເຫັນວ່າມີຄວາມສະຫງົບດີ.

ວຽກງານການເຄື່ອນໄຫວກວດກາລາດຕະເວນ, ຕິດຕາມສະພາບລຽບຕາມຊາຍແດນສາມາດກັກຕົວຄົນຕ່າງປະເທດລັກລອບເຂົ້າເມືອງຜິດກົດໝາຍໄດ້ທັງໝົດ 20 ຄົນ, ຍິງ 04 ຄົນ, ເດັກ 02 ຄົນ, ວຽກງານປ້ອງກັນ ແລະ ຄວບຄຸມການແຜ່ລະບາດຂອງພະຍາດໂຄວິດ -19 ໃນໄລຍະຜ່ານມາໄດ້ມີການຕິດຕາມ ແລະ ແທກອຸດນະພູມໃຫ້ໂຊເຟີລົດ, ຜູ້ເດີນທາງເຂົ້າ-ອອກດ່ານປົກກະຕິ, ໄດ້ປະສານກັບໜ່ວຍສະເພາະກິດຂອງເມືອງໃໝ່ ແລະ ບັນດາແຂວງ ນຳສົ່ງຄົນເຂົ້າເມືອງໄປກັກຕົວຢູ່ສູນ 1096 ຄົນ, ຍິງ 205 ຄົນ, ສຳລັບລົດບັນທຸກສີນຄ້າປະເພດສີນຄ້າຜ່ານແດນ, ເຄື່ອງຍ່ອຍແມ່ນໃຫ້ຄຽນຖ່າຍເຄື່ອງຢູ່ຫຼັກໝາຍ, ລົດບັນທຸກສິນຄ້າ ປະເພດຊີມັງ, ປະເພດທາດແຫຼວ ແມ່ນໃຫ້ຄຽນລົດ ແລະ ຄົນຂັບ ຢູ່ຫຼັກໝາຍ. ການຈັດເກັບລາຍຮັບຂອງບັນດາຂະແໜງການໃນໄລຍະ 05 ເດືອນ ຕົ້ນປີ ສາມາດປະຕິບັດໄດ້ທັງໝົດ 6,9 ຕື້ ເທົ່າກັບ 30 % ຂອງແຜນການປີ ຖ້າທຽບໃສ່ໄລຍະດຽວກັນ ຂອງປີ 2020 ປະຕິບັດໄດ້ 13,26 ຕື້ ຫຼຸດລົງ 48% ເທົ່າກັບ 6,4 ຕື້.

ໃນໂອກາດນີ້, ທ່ານ ຄຳຜອຍ ວັນນະສານ ເຈົ້າແຂວງໆຜົ້ງສາລີ ກໍ່ໄດ້ສະແດງຄວາມຍ້ອງຍໍຊົມເຊີຍມາຍັງຄະນະດ່ານ ແລະ ພະນັກງານລັດຖະກອນທຸກຂະແໜງການທີ່ປະຈຳດ່ານ ທີ່ສາມາດພ້ອມກັນຈັດຕັ້ງປະຕິບັດວຽກງານສຳເລັດໃນຫຼາຍດ້ານໃນໄລຍະທີ່ຜ່ານ. ພ້ອມກັນນັ້ນທ່ານຍັງໄດ້ແໜ້ນໝັກ ແລະ ຮຽກຮ້ອງໃຫ້ທຸກພາກສ່ວນທີ່ປະຈຳດ່ານຈົ່ງພ້ອມກັນເອົາໃຈໃສ່ ວຽກກງານການເມືອງ-ແນວຄິດ ໄປຄຽງຄູ່ກັບການຈັດຕັ້ງວຽກງານວິຊາສະເພາະເພື່ອເຮັດໃຫ້ວຽກງານແຕ່ລະດ້ານສຳເລັດຕາມຄາດໝາຍ ແລະ ມີຄຸນນະພາບດີ, ເພີ້ມທະວີວຽກງານປ້ອງກັນຊາດ – ປ້ອງກັນຄວາມສະຫງົບໃນການຕິດຕາມກວດກາການຄົນລັກລອບເຂົ້າເມືອງແບບຜິດກົດໝາຍລຽບຕາມຊາຍແດນຢ່າງເປັນປົກ ກະຕິ, ເອົາໃຈໃສ່ຈັດຕັ້ງການປ້ອງກັນເວນຍາມເພື່ອຄວາມເປັນລະບຽບຮຽບຮ້ອຍ, ຄຸ້ມຄອງ ແລະ ຊຸກຍູ້ໃຫ້ພາກສ່ວນເອກະຊົນທີມາປະກອບກິດຈະການຢູ່ອ້ອມຂ້າງດ່ານໃຫ້ມີການເຄື່ອນໄຫວຖືກຕ້ອງຕາມກົດລະບຽບກົດໝາຍ, ມີຄວາມປັນລະບຽບຮຽບຮ້ອຍ, ຍົກສູງຄວາມເອົາໃຈໃສ່ໃນການປ້ອງກັນກັ້ນ ແລະ ສະກັດກັ້ນການແຜ່ລະບາດຂອງພະຍາດໂຄວິດ – 19 ໃຫ້ມີຄວາມປອດໄພ. ໃນໂອກາດເຄື່ອນໄຫວໃນຄັ້ງນີ້, ທ່ານເຈົ້າແຂວງພ້ອມຄະນະ ຍັງໄດ້ໄປຢ້ຽມຍາມໝວດປ້ອງກັນຊາຍແດນ 601 ທີ່ຂື້ນກັບກອງຮ້ອຍ 116 ແລະ ມອບຊຸດກີລາຈຳນວນໝື່ງຕື່ມອີກ.