ມີເດຍລາວແຂວງຄຳມ່ວນ ຂ່າວ: ກອງຄຳ ວັນທີ 10 ມິຖຸນາ 2021 ທ່ານ ໄຊສົມບູນ ສຸວັນດາລາ ຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງຄຳມ່ວນ ພ້ອມຄະນະ ໄດ້ລົງຊຸກຍູ້, ຕິດຕາມໂຄງການພັດທະນາແຫຼ່ງທ່ອງທ່ຽວ ຕາດຟ້າ ເມືອງຄູນຄຳ ເຊິ່ງທ່ານ ພູຄຳ ພິລາວົງ ຮອງຜູ້ອຳນວຍການບໍລິສັດ ຕາດຟ້າເອໂກທົວຣິສ໌ເຊິມ ໄດ້ລາຍງານໃຫ້ຮູ້ວ່າ: ທາງບໍລິສັດ ໄດ້ສໍາປະທານເນື້ອທີ່ດິນ ເພື່ອພັດທະນາແຫຼ່ງທ່ອງທ່ຽວແບບອະນຸລັກ ແລະ ສົ່ງເສີມການປູກພືດສະໝຸນໄພ ຕັ້ງຢູ່ບ້ານໍ້າສະນາມ ມີເນື້ອທີ່ທັງໝົດ 12,61 ເຮັກຕາ ໃນນັ້ນໄດ້ແບ່ງເປັນເຂດພັດທະນາການທ່ອງທ່ຽວ – ເຂດບໍລິການ ຈໍານວນ 2 ເຮັກຕາ ແລະ ເຂດພັດທະນາການທ່ອງທ່ຽວແບບອະນຸລັກຈໍານວນ 10,61 ເຮັກຕາ,

ເຊິ່ງໄດ້ກໍານົດເວລາໃນການສໍາປະທານ 30 ປີ ແລະ ສາມາດຕໍ່ສັນຍາໄດ້, ບັນດາກິດຈະກໍາຂອງໂຄງການແມ່ນ ປຸກສ້າງສະຖານທີ່ພັກແຮມແບບກົມກືນກັບທໍາມະຊາດ, ກໍ່ສ້າງສູນຂໍ້ມູນດ້ານການທ່ອງທ່ຽວ, ຕິດຕັ້ງອຸປະກອນ ແລະ ສິ່ງອໍານວຍຄວາມສະດວກໃນການທ່ອງທ່ຽວ – ການບໍລິການ, ດໍາເນີນກິດຈະກໍາອຶ່ນໆທີ່ຕິດພັນກັບການພັດທະນາແຫຼ່ງທ່ອງທ່ຽວແບບອະນຸລັກ ແລະ ສົ່ງເສີມການປູກພືດສະໝຸນໄພ. ໂດຍໄດ້ເລີ່ມລົງມືຈັດຕັ້ງປະຕິບັດໃນເດືອນພະຈິກ 2020 ມາຮອດປະຈຸບັນໂຄງການແມ່ນມີຄວາມຄືບໜ້າແລ້ວ ປະມານ 30% ເຊິ່ງມີມູນຄ່າການລົງທຶນທີ່ຄາດຄະເນທັງໝົດ 5 ແສນກວ່າໂດລາສະຫະລັດ ແຕ່ເນື່ອງຈາກໄດ້ປະສົບປັນຫາກັບສະພາບໄພທຳມະຊາດ ທາງບໍລິສັດຈຶ່ງຕ້ອງໄດ້ເພີ່ມທຶນເຂົ້າໃນການພັດທະນາເພີ່ມອີກປະມານ 2 ລ້ານໂດລາສະຫະລັດ.

ໂອກາດດຽວກັນທ່ານຫົວໜ້າພະແນກ ຖວທ ແຂວງຄໍາມ່ວນ ກໍ່ໄດ້ມີຄຳເຫັນ ສະເໜີໃຫ້ທາງບໍລິສັດໄດ້ຄົ້ນຄວ້າ ພັດທະນາແຫຼ່ງທ່ອງທ່ຽວໃຫ້ມີຫຼາກຫຼາຍກິດຈະກຳ ເພື່ອເປັນທາງເລືອກດຶງດູດນັກທ່ອງທ່ຽວ, ຄົ້ນຄວ້າຄວາມເປັນໄປໄດ້ ໃນການຂະຫຍາຍເນື້ອທີ່ການສຳປະທານ ເພື່ອເພີ່ມກິດກໍາການທ່ອງທ່ຽວທີ່ເຫັນວ່າມີຄວາມເໝາະສົມເປັນຕົ້ນ ກິດຈະ ກຳຂີ່ລົດ, ຍ່າງປ່າຊົມຄວາມສວຍສົດງົດງາມຂອງນໍ້າຕົກຕາດ ແລະ ຄວາມອຸດົມສົມບູນຂອງທຳມະຊາດ ແລະ ກິດຈະກຳອື່ນໆ, ສ້າງສິ່ງອຳນວຍຄວາມສະດວກ ຕິດພັນກັບການບໍລິການທີ່ດີ ເພື່ອສ້າງຄວາມປະທັບໃຈແກ່ຜູ້ທີ່ ເຂົ້າມາທ່ຽວຊົມ ພ້ອມນັ້ນກໍ່ຕ້ອງເອົາໃຈໃສ່ທາງດ້ານການຮັກສາສິ່ງແວດລ້ອມ ແລະ ການຮັກສາຄວາມປອດໄພໃຫ້ແກ່ນັກທ່ອງທ່ຽວ.