ມີເດຍລາວແຂວງບໍ່ແກ້ວ ຂ່າວ ຄຳພັນ ແກ້ວມະນີ
ກອງປະຊຸມກຳນົດຕຳແໜງງານພະນັກງານນຳພາ-ຄຸ້ມຄອງ, ປ່ຽນແທນ, ສືບທອດ 5 ໜ່ວຍງານຂອງຫ້ອງການກຳມະທິການສຶກສາສົງ ແລະ ວາງແຜນບັ້ນສອບເສັງຊັ້ນ ມ4 ແລະ ຊັ້ນ ມ7 ໄດ້ຈັດຂຶ້ນຢ່າງເປັນທາງການ ໃນວັນທີ 16 ມິຖຸນານີ້ ທີ່ຫ້ອງການກຳມະທິການສຶກສາສົງ. ໂດຍການເປັນປະທານຂອງ ພຣະປຣີຊາສາສະນະໂສພົນມຸນີ ປທ ໄຊຍະພອນ ສີປັນຍາ ຮອງເຈົ້າຄະນະແຂວງ ຫົວຫນ້າຫ້ອງການກຳມະທິການສຶກສາສົງແຂວງບໍ່ແກ້ວ, ມີບັນດາຄະນະຜູ້ອຳນວຍການໂຮງຮຽນ, ຄູ – ອາຈານເຂົ້າຮ່ວມ.

ກອງປະຊຸມຄັ້ງນີ້ ແມ່ນເພື່ອປຶກສາຫາລືວາງແຜນກະກຽມຄວາມພ້ອມຮອບດ້ານໃນບັ້ນສອບ ເສັງ ມ4, ມ7 ເອກະພາບກັນໃນຂອບເຂດທົ່ວປະເທດວິຊາພຣະພຸດທະສາສະໜາ ແລະ ວິຊາສາມັນທັງໂລກ, ເຊື່ອມຊຶມນິຕິກຳ, ດຳລັດຂອງສຶກສາສົງ, ຂໍ້ຕົກລົງ ວ່າດ້ວຍການຈັດຕັ້ງ ແລະ ການ ເຄື່ອນໄຫວຂອງຫ້ອງການກຳມະທິການສຶກສາສົງແຂວງບໍ່ແກ້ວ ໃຫ້ຄະນະຜູ້ອຳນວຍການ, ຄູ – ອາຈານ ມີຄວາມຮັບຮູ້ ແລະ ພ້ອມການຈັດຕັ້ງປະຕິບັດວຽກງານໃຫ້ໄດ້ຮັບຜົນດີ.

ກອງປະຊຸມໄດ້ຜ່ານຂໍ້ຕົກລົງຂອງປະທານສູນກາງອົງການພຸດທະສາສະໜາສຳພັນ ແຫ່ງ ສ ປປ ລາວ ວ່າດ້ວຍການແຕ່ງຕັ້ງຄະນະຮັບຜິດຂອບໃນການສອບເສັງຈົບຊັ້ນ ມ4 ແລະ ມ7 ເອກະພາບກັນໃນຂອບເຂດທົ່ວປະເທດ ວິຊາ ພຣະພຸດທະສາສະໜາ, ວິຊາສາມັນທັງໂລກ, ເຊື່ອມຊຶມນິຕິກຳ, ຂໍ້ກຳນົດ, ກົດລະບຽບ ກ່ຽວກັບວຽກງານການສຶກສາສົງ, ສະຫຼຸບລາຍງານການຈັດຕັ້ງປະຕິບັດວຽກງານໜ່ວຍງານບໍລິຫານ, ໜ່ວຍງານວິຊາການ, ໜ່ວຍງານຄຸ້ມຄອງນັກຮຽນ, ໜ່ວຍງານຂໍ້ມູນຂ່າວສານ ແລະ ໄອຊີທີ, ໜ່ວຍງານພຣະພຸດທະສາສະໜາ, ໜ່ວຍງານຫ້ອງສະໝຸດ-ຂ່າວສານຂອງໂຮງຮຽນສົງແຂວງບໍ່ແກ້ວ.

ເພື່ອກະກຽມຄວາມພ້ອມໃນບັ້ນສອບ ເສັງຈົບຊັ້ນ ມ4, ມ7, ຂຶ້ນແຜນກຳນົດພະນັກງານນຳພາ-ຄຸ້ມຄອງ, ປ່ຽນແທນ, ສືບທອດ ບັນຈຸເຂົ້າໃນແຕ່ລະໜ່ວຍງານຂອງຫ້ອງການກຳມະທິການສຶກສາສົງແຂວງບໍ່ແກ້ວ ໃຫ້ເປັນລະບົບຄົບຊຸດ ຕາມໂຄງປະກອບຂອງການຈັດຕັ້ງ, ເພື່ອຕອບສະໜອງຕາມຄວາມຕ້ອງການຂອງໜ້າທີການເມືອງໃນໄລະຍະໃໝ່.