ມີເດຍລາວແຂວງເຊກອງ ຂ່າວ: ບູ້ສຸວັນ.
ໃນວັນທີ 15 ມິຖຸນາ 2021 ນີ້ ສະຫະພັນແມ່ຍິງແຂວງເຊກອງ ກໍຄືຄະນະກໍາມາທິການສົ່ງເສີມເພື່ອຄວາມກ້າວໜ້າຂອງແມ່ຍິງ ແລະແມ່-ເດັກ (ຄກມດຂ) ຂັ້ນແຂວງ, ໄດ້ຈັດກອງປະຊຸມສະຫຼບຕີລາຄາການຈັດຕັ້ງປະຕິບັດວຽກງານສົ່ງເສີມຄວາມກ້າວໜ້າຂອງແມ່ຍິງ ແລະແມ່-ເດັກ; ໂດຍການເປັນປະທານຂອງທ່ານ ຄໍາສອນ ກອນເຍີ ຮອງເຈົ້າແຂວງໆເຊກອງ, ປະທານ, (ຄກມດຂ) ຂັ້ນແຂວງ, ເປັນກຽດເຂົ້າຮ່ວມຂອງທ່ານ ເຫຼັກໄຫຼ ສີວິໄລ ກຳມະການສູນກາງພັກເລຂາພັກແຂວງເຈົ້າແຂວງເຊກອງ, ມີທ່ານນາງ ວິໄລວັນ ດາລາສິນ ກຳມະການພັກແຂວງ, ປະທານຄະນະບໍລິຫານງານສະຫະພັນແມ່ຍິງແຂວງ, ພ້ອມດ້ວຍບັນດາຄະນະກຳມາທິການທີ່ກ່ຽວຂ້ອງຂັ້ນແຂວງ, ເຈົ້າເມືອງ 4 ເມືອງເຂົ້າຮ່ວມ.

ກອງປະຊຸມຄັ້ງນີ້; ແມ່ນໄດ້ສະຫຼຸບຕີລາຄາຄືນໃນການຈັດຕັ້ງປະຕິບັດແຜນດໍາເນີນງານຂອງແຂວງກໍຄືຄະນະກໍາມາທິການ(ຄກມດຂ)ຂັ້ນແຂວງຕໍ່ວຽກງານສົ່ງເສີມເພື່ອຄວາມກ້າວໜ້າຂອງແມ່ຍິງ ແລະແມ່-ເດັກ ແລະຜ່ານບົດສະຫຼຸບການຈັດຕັ້ງປະຕິບັດວຽກງານຄວາມສະເໝີພາບລະຫວ່າງຍິງ-ຊາຍ ໃນ 5 ປີ ຄັ້ງທີ IV (2016-2020), ແຜນດໍາເນີນງານວຽກງານແມ່ ແລະເດັກ 5 ປີ ຄັ້ງທີ II ແລະສະຫຼຸບການຈັດຕັ້ງປະຕິບັດວຽກງານການປ້ອງກັນ ແລະລຶບລ້າງການໃຊ້ຄວາມຮຸນແຮງຕໍ່ແມ່ຍິງ ແລະເດັກ 5 ປີ ຄັ້ງທີ I (2016-2020); ເຊິ່ງຕະຫຼອດໄລຍະ 5 ປີຜ່ານມາຄະນະກໍາມາທີການ (ຄກມດຂ)ຂັ້ນແຂວງ; ແມ່ນໄດ້ເອົາໃຈໃສ່ຢ່າງຕັ້ງໜ້າຕໍ່ວຽກງານດັ່ງກ່າວ, ທັງນີ້ກໍເພື່ອແນໃສ່ຮັບປະກັນທາງດ້ານສິດສະເໝີພາບອັນແທ້ຈິງລະຫວ່າງຍິງ-ຊາຍໃນທຸກໆເງື່ອນໄຂ ແລະມີໂອກາດທີ່ເທົ່າທຽມກັນ, ຕອບສະໜອງຄວາມຮຽກຮ້ອງຕ້ອງການໃນການພັດທະນາ, ຜົນປະໂຫຍດອັນຊອບທຳຂອງຍິງ ແລະຊາຍ, ລຶບລ້າງທຸກການກະທໍາທີ່ເປັນການຈໍາແນກຄວາມສະເໝີພາບຍິງ-ຊາຍໃນສັງຄົມ, ເຮັດໃຫ້ສາມາດເຊື່ອມໂຍງເຂົ້າກັບພາກພື້ນ ແລະສາກົນໄດ້ຢ່າງກ້ວາງຂວາງ, ປະກອບສ່ວນເຂົ້າໃນການປົກປັກຮັກສາ ແລະພັດທະນາປະເທດຊາດ, ຮັບປະກັນຊີວິດການເປັນຢູ່ທີ່ດີຂອງແມ່ຍິງໃຫ້ດີຂື້ນ,

ໂດຍເພີ່ມໂອກາດໃຫ້ເຂົາເຈົ້າເຂົ້າເຖິງການບໍລິການດ້ານການສຶກສາ, ສາທາລະນະສຸກ, ສະຫວັດດີການ-ສັງຄົມ ແລະດ້ານອື່ນໆດີຂື້ນກວ່າເກົ່າ ນອກນີີ້ຍັງໄດ້ເອົາໃຈໃສ່ສ້າງຄວາມເຂັ້ມແຂງໃຫ້ກົງຈັກຊວ່ຍວຽກ ຄະນະກໍາມາທິການແຕ່ລະຂັ້ນໃນການເປັນເສນາທິການທີ່ດີ ໂດຍຜ່ານການມອບຄວາມຮັບຜິດຊອບໃຫ້ບັນດາຂະແໜງການເປັນຕົ້ນ: ການໂຄສະນາເຜີຍແຜ່ກົດໝາຍວ່າດ້ວຍການຕ້ານ ແລະສະກັດກັ້ນການໃຊ້ຄວາມຮຸນແຮງຕໍ່ແມ່ຍິງ ແລະເດັກນ້ອຍ ທັງທາງກວ້າງ ແລະທາງເລິກເພື່ອແນໃສ່ໃຫ້ສັງຄົມໃຫ້ຮັບຮູ້ແນວທາງຂອງພັກ ຮັບຮູ້ຂໍ້ກໍານົດກົດໝາຍ ແລະນິຕິກໍາຕ່າງໆ.

ຕອນທ້າຍກອງປະຊຸມຍັງໄດ້ຮັບຟັງຄຳເຫັນໂອ້ລົມຈາກທ່ານເຈົ້າແຂວງ-ແຂວງເຊກອງ ເຊີ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ໝາກຜົນ ຜົນງານທີ່ທາງຄະນະກໍາມາທິການເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກຍາດມາໄດ້ໃນໄລຍະຜ່ານມາ ເຊີ່ງທ່ານໄດ້ເນັ້ນໜັກໃຫ້ທຸກພາກສວ່ນທີ່ກ່ຽວຂ້ອງຕ້ອງໄດ້ເປັນເຈົ້າການໃນການໃຫ້ຂໍ້ມູນຂ່າວສານລົງເຖິງຊຸມຊົນເຂດຫ່າງໄກສອກຫຼີກ ຊຸກຍູ້ສົ່ງເສີມອົງການປົກຄອງທ້ອງຖີ່ນ ເພື່ອສ້າງຄວາມເຂັ້ມແຂງໃຫ້ແກ່ຊຸມຊົນ ເພື່ອຫຼຸດຜ່ອນການໃຊ້ຄວາມຮຸນແຮງຕໍ່ແມ່ຍິງ ແລະເດັກນ້ອຍ ໃຫ້ໄດ້ຮັບການຈັດຕັ້ງປະຕິບັດໃຫ້ດີຍິ່ງໆຂື້ນ.