ມີເດຍລາວແຂວງຈຳປາສັກ ຂ່າວ-ພາບ: ພຸດທະສິນ ວົງວິໄລທອງ ໃນຕອນເຊົ້າວັນທີ 16 ມິຖຸນາ ນີ້ທີ່ວັດບ້ານນາລານ ເມືອງໂຂງ, ແຂວງຈຳປາສັກ ໄດ້ຈັດພິທີປະກາດຮັບຮອງເອົາບ້ານນາລານ ແລະ ບ້ານ ລົມພັດ ເປັນບ້ານປ້ອງກັນຄວາມສະຫງົບດີ ເຊິ່ງເປັນບ້ານທີ 14 ແລະ 15 ຂອງກຸ່ມນາຝັ່ງໃນຈຳນວນບ້ານໃນທົ່ວກຸ່ມທີ່ຖືກຮັບຮອງ.

ໃຫ້ກຽດເຂົ້າຮ່ວມພິທີຄັ້ງນີ້ໂດຍທ່ານ ວິໄຊ ສາຍອຸບົນ ຄະນະປະຈຳພັກເມືອງ ປະທານແນວລາວສ້າງຊາດເມືອງ, ມີຄະນະກອງບັນຊາການ ປກສ ເມືອງ, ຄະນະພັກຮາກຖານກຸ່ມນາຝັ່ງ, ນາຍບ້ານ-ຮອງນາຍບ້ານອ້ອມຂ້າງ ແລະ ເຖົ້າແກ່ແນວໂຮມບ້ານນາລານເຂົ້າຮ່ວມຢ່າງພ້ອມພຽງ. ໃນພິທີ່ທ່ານ ພັຕ ພູວຽງ ກ້ອນສົມສີ ໄດ້ຜ່ານບົດສະຫລຸບການປະເມີນຜົນບ້ານປ້ອງກັນຄວາມສະຫງົບດີຄື: ບ້ານນາລານ ປະກອບມີ 69 ຄອບຄົວ, ມີ 441 ຄົນ, ຍິງ 235 ຄົນ; ບ້ານ ລົມພັດ ປະກອບມີ 67 ຄອບຄົວ, ມີ 389 ຄົນ, ຍິງ 194 ຄົນ. ປະຊາຊົນທຸກຄົນ ແລະ ທຸກຄອບຄົວພາຍໃນບ້ານແມ່ນໄດ້ຮັບການເຊື່ອມຊືມແນວທາງນະໂຍບາຍຂອງພັກ, ລະບຽບກົດໝາຍຂອງລັດເປັນສ່ວນໃຫຍ່, ມີສະຕິຕື່ນຕົວໃນການປະກອບສ່ວນວຽກງານຕ່າງໆຂອງບ້ານເປັນຕົ້ນ: ເຂົ້າຮ່ວມກອງປະຊຸມ, ອອກແຮງງານລວມ, ເຂົ້າຮ່ວມວຽກງງານປ້ອງກັນຊາດ-ປ້ອງກັນຄວາມສະຫງົບ ແລະ ປະກອບສ່ວນຢ່າງຕັ້ງໜ້າໃນການສ້າງສາພັດທະນາບ້ານຂອງຕົນ ສາມາດຕີລາຄາໄດ້ວ່າ: ມີຈຳນວນຄອບຄົວປ້ອງກັນຄວາມສະຫງົບດີພາຍໃນບ້ານປະຕິບັດໄດ້ 100% ຈຶ່ງສາມາດຮັບຮອງປະກາດເປັນບ້ານປ້ອງກັນຄວາມສະຫງົບດີ.

ໃນພິທີ ປະທານກອງປະຊຸມກໍໄດ້ຊີ້ໃຫ້ເຫັນເຖິງຄວາມໝາຍຄວາມສຳຄັນຂອງການປະກາດຮັບຮອງເປັນບ້ານປ້ອງກັນຄວາມສະຫງົບດີ; ໃຫ້ປະຊາຊົນພາຍໃນບ້ານສືບຕໍ່ຮັກສານາມມະຍົດບ້ານປ້ອງກັນຄວາມສະຫງົບດີ ທີ່ສຳຄັນ ພໍ່ແມ່ປະຊາຊົນພາຍໃນບ້ານຕ້ອງມີການພົວພັນກັບອຳນາດການປົກຄອງບ້ານຢ່າງເປັນປະຈຳ, ປະຊາຊົນສາມາດກຳແໜ້ນສະພາບການພາຍໃນບ້ານເປັນຕົ້ນ: ກຸ່ມຄົນບໍ່ດີ, ບໍ່ໃຫ້ມີການເຂົ້າມາລີ້ຊ່ອນ, ການເຄື່ອນໄຫວຂອງບຸກຄົນພາຍນອກມາພັກເຊົາ, ຖ້າພົບເຫັນແມ່ນຕ້ອງລາຍງານອຳນາດການປົກຄອງບ້ານ ຫລື ຫ້ອງການປ້ອງກັນຄວາມສະຫງົບບ້ານບໍລິການປະຊາຊົນຢ່າງທັນການ.