ມີເດຍລາວແຂວງສາລະວັນ ຂ່າວພາບ: ວິໄລວອນ ສິດທິໄຊ ກຸ່ມວັດທະນະທຳ-ສັງຄົມ ແຂວງສາລະວັນ ປະກອບມີ ພະແນກສືກສາ-ກິລາ, ພະແນກສາທາລະນະສຸກ, ພະແນກຖະແຫຼງຂ່າວ, ວັດທະນະທຳ ແລະທ່ອງທ່ຽວ ແລະພະແນກແຮງງານ ແລະ ສະຫວັດດີການສັງຄົມ ໄດ້ຈັດພິທີເປີດບັ້ນເຊື່ອມຊຶມ ແລະ ຜັນຂະຫຍາຍມະຕິກອງປະຊຸມ ຄັ້ງທີ XI ຂອງພັກປະຊາຊົນປະຕິວັດລາວ ແລະ ມະຕິກອງປະຊຸມໃຫຍ່ ຄັ້ງທີ IX ຂອງອົງຄະນະພັກແຂວງສາລະວັນ ໄດ້ຈັດຂຶ້ນໃນວັນທີ 16 ມິຖຸນານີ້, ຢູ່ສະໂມສອນວິທະຍາໄລຄູສາລະວັນ, ໂດຍການເປັນປະທານຂອງ ສະຫາຍ ສົມໃຈ ອຸ່ນຈິດ ຄະນະປະຈຳພັກແຂວງ ຮອງເຈົ້າແຂວງສາລະວັນ ຜູ້ຊີ້ນຳວຽກງານວັດທະນະທຳ-ສັງຄົມ, ມີບັນດາສະຫາຍຫົວໜ້າ ແລະຮອງພະແນກ, ຫົວໜ້າຂະແໜງ-ຮອງຂະແໜງ, ຫົວໜ້າ-ຮອງກອງວິຊາການ, ຜູ້ອຳນວຍການ ແລະ ຮອງອຳນວຍການໂຮງຮຽນວິຊາຊີບເຂົ້າຮ່ວມ.

ໃນພິທີຈະໄດ້ເຊື່ອມຊືມເອກກະສານມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະ ມະຕິກອງປະຊຸມໃຫຍ່ ຄັ້ງທີ IX ຂອງອົງຄະນະພັກແຂວງ, ແຜນກຳນົດທິດທາງ, ໜ້າທີ່ຕົ້ນຕໍຂອງອົງຄະນະພັກແຂວງສາລະວັນ ໃນ 5 ປີ (2021 – 2025), ບັນດາກົດລະບຽບຂອງພັກປະຊາຊົນປະຕິວັດລາວ ສະໄໝທີ XI ແລະບັນດາເອກະສານເພີ້ມເຕີມອີກຈຳນວນໜຶ່ງ.ຈຸດປະສົງເປັນການໃນບັ້ນເຊື່ອມຊືມຄັ້ງນີ້ ແມ່ນເປັນການເພີ່ມທະວີໃນການຊີ້ນຳ-ນຳພາຂອງແຕ່ລະຂົງເຂດວຽກງານ ຕາມຄວາມຮັບຜິດຊອບຂອງແຕ່ລະສະຫາຍ, ຕິດພັນກັບການເສີມຂະຫຍາຍຄວາມເປັນເຈົ້າການຕໍ່ມະຕິກອງປະຊຸມໃຫຍ່ ຄັ້ງທີ XI ຂອງພັກ, ຫັນມາເປັນແຜນງານ, ໂຄງການ ແລະ ກິດຈະກຳລະອຽດຂອງຕົນໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ຫຼຸດພົ້ນອອກຈາກການດອຍພັດທະນາ ເທື່ອລະກ້າວ.

ຈາກນັ້ນຜູ້ເຂົ້າຮ່ວມຍັງຈະໄດ້ແບ່ງຈຸ-ໜ່ວຍ ຄົ້ນຄ້ວາຕິກອງປະຊຸມໃຫຍ່ ຄັ້ງທີ VIII ແລະ ເຊື່ອມຊຶມມະຕິ IX ຂອງອົງຄະນະພັກແຂວງສາລະວັນ ຕື່ມອີກ ເພື່ອຄວາມເປັນເອກະພາບໃນການຈັດຕັ້ງປະຕິບັດ, ບັ້ນເຊື່ອມຊືມຄັ້ງນີ້ຈະດຳເນີນໄປເປັນເວລາ 2 ວັນ ຈຶ່ງຈະສຳເລັດ.