ມີເດຍລາວແຂວງສາລະວັນ ໂດຍ: ກິນດາວັນ ອ້ວນນາຄູ ໃນວັນທີ 17 ມິຖຸນາ 2021 ຢູ່ທີ່ຫ້ອງປະຊຸມຂອງພະແນກ ອຸດສະຫະກໍາ ແລະ ການຄ້າແຂວງ ໄດ້ຈັດພິທີມອບ-ຮັບ ໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປີ 2020 ຄັ້ງທີ II ໃຫ້ກຽດເປັນປະທານ ໂດຍ ສະຫາຍ ຄໍາຕາ ໂຮ່ຊົງເລືອງ ກໍາມະການຄະນະປະຈໍາພັກແຂວງ, ປະທານອົງການແນວລາວສ້າງຊາດແຂວງ, ສະຫາຍ ຄໍາຜ່ານ ສີລາວີ ກໍາມະການພັກແຂວງ, ເລຂາໜ່ວຍພັກ, ຫົວໜ້າພະແນກ ອຸດສາຫະກໍາ ແລະ ການຄ້າແຂວງ, ມີບັນດາສະຫາຍຄະນະໜ່ວຍພັກ ແລະ ສະມາຊິກພັກພາຍໃນພະແນກເຂົ້າຮ່ວມ.

ສະຫາຍ ບຸນຊູ ລັດສະໝີ ຄະນະໜ່ວຍພັກ ຮອງຫົວໜ້າພະແນກ ອຸດສາຫະກໍາ ແລະ ການຄ້າແຂວງ ກໍ່ໄດ້ຜ່ານບົດສະຫຼຸບຕີລາຄາການນໍາພາວຽກງານຮອບດ້ານຕີລາຄາການຈັດຕັ້ງປະຕິບັດກໍ່ສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ໃນໄລຍະ 6 ເດືອນຜ່ານມາ ແມ່ນໄດ້ເອົາໃຈໃສ່ໃນການສຶກສາອົບຮົມການເມືອງແນວຄິດໃຫ້ພະນັກງານລັດຖະກອນສະມາຊິກພັກ ທີ່ຢູ່ໃນຄວາມຮັບຜິດຊອບຂອງຕົນຢ່າງເປັນປົກກະຕິໃຫ້ມີຄຸນທາດການເມືອງໜັກແໜ້ນ, ມີຄຸນສົມບັດສິນທຳປະຕິວັດ, ມີນ້ຳໃຈຮັກຊາດ, ເສີມຂະຫຍາຍມູນເຊື້ອວັດທະນະທຳອັນດີງາມຂອງຊາດ, ມີແນວຄິດອຸ່ນອ່ຽນທຸ່ນທ່ຽງ,

ມີຄວາມຕື່ນໂຕຫ້າວຫັນໃນການປະຕິບັດມະຕິຄໍາສັ່ງ ແລະ ໜ້າທີ່ວິຊາສະເພາະທີ່ໄດ້ຮັບມອບໝາຍຢ່າງເປັນເຈົ້າການ ໜ່ວຍພັກພະແນກ ອຸດສາຫະກໍາ ແລະ ການຄ້າ ມີຈໍານວນສະມາຊິກພັກທັງໝົດ 36 ສະຫາຍ, ຍິງ 5 ສະຫາຍ ເຊິ່ງປະກອບມີ ຄະນະໜ່ວຍພັກ 3 ສະຫາຍ, ຍິງ 1 ສະຫາຍ ເປັນໜ່ວຍພັກເອກະລາດໜຶ່ງ ທີ່ເຄື່ອນໄຫວພາຍໃຕ້ການຊີ້ນໍາ-ນໍາພາ ຂອງອົງຄະນະພັກແຂວງ, ເປັນເສນາທິການໃຫ້ແກ່ຄະນະພັກຂັ້ນເທິງຖັດຕົນຕາມສາຍຕັ້ງ ແລະ ສາຍຂວາງ ເຊິ່ງມີບົດບາດໃນການຜັນຂະຫຍາຍ ແລະ ຈັດຕັ້ງປະຕິບັດແນວທາງນະໂຍບາຍຂອງພັກ, ມະຕິຄໍາສັ່ງ, ກົດໝາຍ ແລະ ລະບຽບການຕ່າງໆຂອງລັດ ທີ່ໄດ້ກໍານົດອອກໃນແຕ່ລະໄລຍະ, ນອກນີ້ຍັງໄດ້ເອົາໃຈໃສ່ປັບປຸງອົງການຈັດຕັ້ງພັກໃຫ້ມີຄວາມປອດໃສ, ເຂັ້ມແຂງ, ໜັກແໜ້ນ ທາງດ້ານການເມືອງ, ແນວຄິດ, ການຈັດ ຕັ້ງ, ແບບແຜນວິທີເຮັດວຽກຂອງພັກ, ເພີ່ມທະວີວຽກງານປ້ອງກັນພັກ, ເດັດດ່ຽວຕ້ານການເສື່ອມຄຸນທາດການເມືອງພາຍໃນພັກໄດ້.

ໂອກາດດຽວກັນນັ້ນ ສະຫາຍ ຄໍາຕາ ໂຮ່ຊົງເລືອງ ຄະນະປະຈໍາພັກແຂວງ ປະທານແນວລາວສ້າງຊາດ ຜູ້ຊີ້ນໍາວຽກງານອົງການຈັດຕັ້ງມະຫາຊົນ ກໍໄດ້ ໃຫ້ກຽດຂຶ້ນມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັ້ກແໜ້ນ ເປັນກຽດຮັບໂດຍ ສະຫາຍ ຄໍາຜ່ານ ສີລາວີ ກໍາມະການພັກແຂວງ ເລຂາໜ່ວຍພັກ ຫົວໜ້າພະແນກ ອຸດສາຫະກໍາ ແລະ ການຄ້າແຂວງ.