ມີເດຍລາວແຂວງໄຊສົມບູນ
ກອງປະຊຸມສ່ອງແສງວຽກງານປ້ອງກັນຄວບຄຸມ ແລະ ແກ້ໄຂການລະບາດຂອງພະຍາດໂຄວິດ 19 ແຂວງໄຊສົມບູນ ໄດ້ຈັດຂຶ້ນ ໃນວັນທີ 21 ມິຖຸນາ ນີ້ ທີ່ຫ້ອງປະຊຸມພະແນກຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແຂວງ ໂດຍການເປັນປະທານຂອງ ທ່ານ ຕົ່ງມົວ ຊົວໂກ້ ຮອງເຈົ້າແຂວງໄຊສົມບູນ, ຫົວໜ້າຄະນະສະເພາະກິດ ເພື່ອປ້ອງກັນຄວບຄຸມ ແລະ ແກ້ໄຂການລະບາດຂອງພະຍາດໂຄວິດ 19 ຂັ້ນແຂວງ, ມີບັນດາຄະນະສະເພາະກິດຂັ້ນແຂວງ ເຂົ້າຮ່ວມ.

ໂອກາດນີ້ ທ່ານ ອູເງິນ ດວງມະນີ ຫົວໜ້າກອງເລຂາຄະນະສະເພາະກິດເພາະກິດ ເພື່ອປ້ອງກັນຄວບຄຸມ ແລະ ແກ້ໄຂການລະບາດຂອງພະຍາດໂຄວິດ 19 ໄດ້ລາຍງານການຈັດຕັ້ງປະຕິບັດມາດຕະການສະກັດກັ້ນ, ຄວບຄຸມ ແລະ ກຽມຄວາມພ້ອມຮອບດ້ານ ເພື່ອຕ້ານພະຍາດໂຄວິດ-19 ໃນໄລຍະຜ່ານມາ ຊຶ່ງການນຳແຂວງໄຊສົມບູນ ກໍໄດ້ສຸມໃສ່ຊີ້ນຳຢ່າງແຂງແຮງ ແລະ ຈົດຈໍ່ ພ້ອມທັງ ສຸມໃສ່ຈັດຕັ້ງເຜີຍແຜ່ເຊື່ອມຊືມຄຳສັ່ງ, ແຈ້ງການຂອງລັດຖະບານ ກໍຄືຄຳສັ່ງ, ແຈ້ງການຂອງແຂວງ ໃຫ້ແກ່ພະນັກງານ-ລັດຖະກອນ, ທະຫານ, ຕຳຫຼວດ ແລະ ປະຊາຊົນບັນດາເຜົ່າ, ຜູ້ປະກອບການຫ້າງຮ້ານ, ຫົວໜ່ວຍທຸລະກິດຕ່າງໆ ໃນທົ່ວແຂວງ ໄດ້ຮັບຮູ້ເຂົ້າໃຈຢ່າງທົ່ວເຖິງ ນອກຈາກນັ້ນ ຍັງໄດ້ໂຄສະນາອອກທາງໂທລະໂຄ່ງ ແລະ ໂຄສະນາທາງໂທລະໂຄ່ງໃສ່ລົດເຄື່ອນທີ່ໄປແຕ່ລະບ້ານ ເພື່ອໃຫ້ປະຊາຊົນໄດ້ຮັບຮູ້ເຖິງຜົນຮ້າຍ ແລະ ຮູ້ວິທີປ້ອງກັນຕົນເອງຈາກພະຍາດດັ່ງກ່າວ ເຫັນໄດ້ວ່າພະນັກງານ, ປະຊາຊົນມີຄວາມເຂົ້າໃຈ ແລະ ເປັນເຈົ້າການຕື່ນຕົວປະຕິບັດຢ່າງເຂັ້ມງວດ

ນອກຈາກນີ້ ຍັງໄດ້ອອກແຈ້ງການປິດການເຂົ້າ-ອອກແຂວງໄຊສົມບູນ ແລະ ຈັດຕັ້ງດ່ານກວດກາ ມີທັງໝົດ 6 ດ່ານຄື: ດ່ານໂພນພະ ເມືອງອະນຸວົງ, ດ່ານວັງໄຮ, ດ່ານບ້ານຊຽງຄົງ ເມືອງທ່າໂທມ, ດ່ານບ້ານຊຳທອງ, ດ່ານບ້ານນາໄຊຊະວ່າງ ເມືອງລ້ອງແຈ້ງ, ດ່ານຂົວນ້ຳຄຸຍ ເມືອງລ້ອງຊານ ແຕ່ລະດ່ານປະກອບມີກຳລັງ ປກສ ແລະ ພະນັກງານແພດໝໍ ປະຈຳຢູ່ແຕ່ລະດ່ານ ຂະນະດຽວກັນ ສາມາດອອກໜັງສືຢັ້ງຢືນການເດີນທາງ 2000 ກວ່າສະບັບ, ມີຄົນເຂົ້າແຂວງ ທັງໝົດ 13.000 ກວ່າຄົນ, ໄດ້ຄັດກອງຄົນເຂົ້າ-ອອກເມືອງ ທັງໝົດ ຈຳນວນ 4.400 ກວ່າຄົນ ທົ່ວແຂວງມີສູນຈຳກັດບໍລິເວນທັງໝົດ 17 ສູນ, ມີຜູ້ຈຳກັດບໍລິເວນທັງໝົດ 600 ກວ່າຄົນ ມາຮອດປັດຈຸບັນ ໄດ້ເກັບຕົວຢ່າງໄປກວດຫາເຊື້ອໂຄວິດ ຈຳນວນ 200 ກວ່າຕົວຢ່າງ ຜົນກວດແມ່ນອອກມາລົບທັງໝົດ ໄດ້ຮັບຢາວັກຊິນປ້ອງກັນໂຄວິດ-19 ຊະນິດຊີໂນຟາມຂອງ ສປ ຈີນ ຈາກສູນກາງ ລວມທັງໝົດ 8,400 ໂດສ ເຂັມທີ 1 ສັກໄດ້ 4.000 ກວ່າໂດສ ແລະ ເຂັມທີ 2 ສັກໄດ້ 2.000 ກວ່າໂດສ.

ສຳລັບແຜນການເຄື່ອນໄຫວໃນຕໍ່ໜ້າ ແມ່ນຈະສືບຕໍ່ສັກວັກຊິນກັນພະຍາດໂຄວິດ-19 ໃຫ້ບັນລຸຄາດໝາຍ ສືບຕໍ່ເຝົ້າລະວັງ, ກວດກາຄົນເຂົ້າ-ອອກ ຢູ່ແຕ່ລະດ່ານ ໃຫ້ມີຄວາມເຂັ້ມງວດ ຮັບປະກັນບໍ່ໃຫ້ຄົນເຂົ້າແຂວງໄຊສົມບູນ ໂດຍບໍ່ຖືກຕ້ອງຕາມຄຳສັ່ງທີ່ໄດ້ກຳນົດໄວ້, ສືືບຕໍ່ໂຄສະນາສຶກສາອົບຮົມພະນັກງານ, ທະ ຫານ, ຕຳຫຼວດ, ຕະຫຼອດຮອດພໍ່ແມ່ປະຊາ ຊົນບັນດາເຜົ່າ ໃຫ້ມີຄວາມຮັບຮູ້, ເຂົ້າໃຈ ຕໍ່ຜົນຮ້ານຂອງພະຍາດໂຄວິດ-19 ແລະ ມີວິທີປ້ອງກັນຕົນເອງ ໃຫ້ຖືກຕ້ອງຕາມຂໍ້ກຳນົດຂອງຄະນະສະເພາະກິດວາງອອກ.
ຂ່າວ: ພຸດທະສອນ ເວດສະວົງ