ມີເດຍລາວແຂວງຄຳມ່ວນ ທ່ານ ວຽງແກ້ວ ໄຊຍະລາດ ຮອງຫົວໜ້າຫ້ອງການກະສິກຳ ແລະ ປ່າໄມ້ ເມືອງໄຊບົວທອງ ແຂວງຄຳມ່ວນ ລາຍງານກ່ຽວກັບສະພາບການຜະລິດເຂົ້ານາປີຂອງຊາວກະສິກອນໃນທົ່ວເມືອງໄຊບົວທອງໃຫ້ຮູ້ວ່າ: ໃນປີ 2021 ເມືອງໄຊບົວທອງ ມີແຜນການຜະລິດເຂົ້ານາປີຈຳນວນ 9.400 ເຮັກຕາ, ທຽບໃສ່ປີ 2020 ຜ່ານມາແມ່ນເພີ່ມຂຶ້ນ 400 ເຮັກຕາ. ໃນນັ້ນຜະລິດເປັນສະບຽງອາຫານ 8.200 ເຮັກຕາ ແລະ ຜະລິດເປັນສິນຄ້າ 1.200 ເຮັກຕາ.

ເຊິ່ງຫ້ອງການກະສິກຳ ແລະ ປ່າໄມ້ເມືອງ ກໍ່ໄດ້ແຕ່ງຕັ້ງພະນັກງານວິຊາການລົງຊຸກຍູ້ພໍ່ແມ່ປະຊາຊົນ ໃນການກະກຽມ ເອົາຝຸ່ຍ, ປຸ໋ຍ ລົງໃສ່ນາ ແລະ ໄດ້ກະກຽມລົງມືຕົກກ້າສຳເລັດໃນເດືອນພຶດສະພາ. ເຊິ່ງການປັກດຳເຂົ້ານາປີ ຂອງຊາວ ກະສິກອນ ໃນທົ່ວເມືອງ ແມ່ນໄດ້ເລີ່ມລົງມືແຕ່ຕົ້ນເດືອນມິຖຸນາ ມາຮອດປະຈຸບັນແມ່ນປັກດໍາໄດ້ໃນເນື້ອທີ່ 3.760 ເຮັກຕາ ຫຼືເທົ່າກັບ 40% ຂອງແຜນການ ແລະ ຄາດຄະເນຈະປັກດຳໃຫ້ສຳເລັດ 100% ໃນລະຫວ່າງກາງ ຫາ ທ້າຍເດືອນກໍລະກົດ. ນອກຈາກການປູກເຂົ້ານາປີແລ້ວ ຍັງໄດ້ຊຸກຍູ້ສົ່ງເສີມພໍ່ແມ່ປະຊາຊົນປູກພືດລະດູຝົນ ເຊິ່ງມີເນື້ອທີ່ຕາມແຜນການ 590 ເຮັກຕາ ໃນນັ້ນປະຕິບັດໄດ້ຕົວຈິງ 871 ເຮັກຕາ ລື່ນແຜນການ 281 ເຮັກຕາ. ເຊິ່ງເດັ່ນກວ່າໝູ່ ແມ່ນປະເພດມັນຕົ້ນ ມີເນື້ອທີ່ການປູກກວມເຖິງ 400 ກວ່າເຮັກຕາ.

ທ່ານຮອງຫົວໜ້າຫ້ອງການກະສິກຳ ແລະ ປ່າໄມ້ເມືອງໄຊບົວທອງ ໃຫ້ຮູ້ຕື່ມວ່າ: ນອກຈາກການຊຸກຍູ້ສົ່ງເສີມ ໃຫ້ແກ່ການຜະລິດພືດລະດູຝົນແລ້ວ ຫ້ອງການກະສິກຳ ແລະ ປ່າໄມ້ເມືອງ ຍັງໄດ້ອອກແຈ້ງການ ລົງເຖິງອຳນາດ ການປົກ ຄອງ ແລະ ພໍ່ແມ່ປະຊາຊົນ ໃຫ້ມີການຕິດຕາມເຝົ້າລະວັງກ່ຽວກັບພະຍາດໄຂ້ອອກຕຸ່ມ ງົວ-ຄວາຍ. ເຊິ່ງໃນທົ່ວ ເມືອງໄຊບົວທອງ ມີສັດລ້ຽງປະເພດ ງົວ ຈຳນວນ 14.698 ໂຕ, ຄວາຍ 3.946 ໂຕ. ມາຮອດປະຈຸບັນ ແມ່ນໄດ້ ເກັບກຳສະຖິຕິ ໂດຍມີ ງົວ ທີ່ຕິດເຊື້ອພະຍາດດັ່ງກ່າວຈຳນວນ 121 ໂຕ. ໃນນັ້ນປິ່ນປົວຫາຍດີແລ້ວ 106 ໂຕ ແລະ ເສຍຊີວິດຈຳນວນ 15 ໂຕ.