ມີເດຍລາວແຂວງໄຊສົມບູນ
ໜ່ວຍພັກພະແນກໂຍທາທິການ ແລະ ຂົນສົ່ງ ແຂວງໄຊສົມບູນ ໄດ້ຈັດພິທີ ເລື່ອນສະມາຊິກພັກສຳຮອງ ຂຶ້ນເປັນສະມາຊິກພັກສົມບູນ ໃນຕອນບ່າຍຂອງວັນທີ 29 ມິຖຸນາ 2021 ນີ້ ທີ່ຫ້ອງປະຊຸມຂອງພະແນກ ໂດຍການເປັນປະທານຂອງ ສະຫາຍ ຄຳພຸດ ແກ້ວວົງພອນ, ຮອງເລຂາໜ່ວຍພັກ, ຮອງຫົວໜ້າພະແນກໂຍທາທິການ ແລະ ຂົນສົ່ງແຂວງ, ມີເລຂາໜ່ວຍພັກ-ຮອງເລຂາໜ່ວຍພັກ ຈາກກຸ່ມເສດຖະກິດ ພ້ອມດ້ວຍສະມາຊິກພັກສົມບູນ ແລະ ສຳຮອງພາຍໃນໜ່ວຍ ເຂົ້າຮ່ວມ.

ໃນພິທີ ໄດ້ຮັບຟັງການຜ່ານມະຕິຕົກລົງຂອງຄະນະປະຈໍາພັກແຂວງ ວ່າດ້ວຍການຮັບເອົາສະມາຊິກພັກສຳຮອງຂຶ້ນເປັນສະມາຊິກພັກສົມບູນ ຂອງໜ່ວຍພັກພະແນກໂຍທາທິການ ແລະ ຂົນສົ່ງ ແຂວງ ຈໍານວນ 3 ສະຫາຍ ຄື: ສະຫາຍ ວ່າທາວ ເຈ່ຍເກີທ່າວ, ສະຫາຍ ຕູ້ມົວຢ່າງ ເນັ່ງທ່າວ ແລະ ສະຫາຍ ຖາວອນ ສີອັກສອນ. ຈາກນັ້ນ ສະຫາຍຮອງເລຂາໜ່ວຍພັກ ໄດ້ຂຶ້ນມອບມະຕິຕົກລົງໃຫ້ສະມາຊິກພັກສຳຮອງ ເພື່ອເປັນການຢັ້ງຢືນເຂົ້າເປັນສະມາຊິກພັກສົມບູນ ຢ່າງເປັນທາງການ.

ໂອກາດດັ່ງກ່າວ ສະຫາຍ ຄຳພຸດ ແກ້ວວົງພອນ, ຮອງເລຂາໜ່ວຍພັກ-ພະແນກໂຍທາທິການ ແລະ ຂົນສົ່ງ ແຂວງ ໄດ້ມີຄໍາເຫັນໂອ້ລົມ ຕໍ່ສະມາຊິກພັກສົມບູນ ຈົ່ງເອົາໃຈໃສ່ຝົກຝົນຫຼໍ່ຫຼອມຕົນເອງໃຫ້ມີຄວາມຫ້າວຫັນ ຕໍ່ໜ້າທີ່ວຽກງານໃນທຸກດ້ານ ໂດຍສະເພາະ ແມ່ນດ້ານວຽກງານວິຊາສະເພາະ ແລະ ວຽກງານຂະບວນການຕ່າງໆ ເພື່ອໃຫ້ຕົນເອງກາຍເປັນສະມາຊິກພັກທີ່ເຂັ້ມແຂງ ແລະ ດີເດັ່ນໃນຕໍ່ໜ້າ. ນອກນັ້ນ, ສະຫາຍຍັງໄດ້ເນັ້ນໜັກໃຫ້ຄະນະພັກ ຕະຫຼອດຮອດສະມາຊິກພັກທຸກສະຫາຍ ຈົ່ງເອົາໃຈໃສ່ສຶກສາອົບຮົມການເມືອງ-ແນວຄິດ ໃຫ້ເປັນປົກກະຕິ, ມີຄວາມສາມັກຄີເປັນປຶກແຜ່ນ ແລະ ມີຄວາມຫ້າວຫັນ ຕໍ່ໜ້າທີ່ວຽກງານທີ່ພັກ-ລັດມອບໝາຍ ພ້ອມທັງເອົາໃຈໃສ່ຈັດຕັ້ງປະຕິບັດວຽກງານວິຊາສະເພາະຂອງຕົນ ໃຫ້ໄດ້ຮັບຜົນສໍາເລັດຕາມແຜນການທີ່ວາງໄວ້.