ມີເດຍລາວແຂວງວຽງຈັນ ພາບ-ຂ່າວ : ແຫວນຄໍາ ພິທີເປີດການສອບເສັງ ຈົບຊັ້ນປະຖົມ ປໍ 5 ທົ່ວເມືອງໝື່ນ ແຂວງວຽງຈັນ ປະຈຳສົກປີ 2020 – 2021 ໄດ້ໄຂຂຶ້ນພ້ອມກັນ 5 ສູນສອບເສັງ ທົ່ວເມືອງໝື່ນ ໃນເວລາ 8:00 ໂມງເຊົ້າ, ຂອງວັນທີ 28 ມີຖຸນາ 2021 ທີ່ຜ່ານມານີ້, ໂດຍມີບັນດາຄະນະຮັບຜິດຊອບການສອບເສັງ,ຄະນະພັດທະນາການສຶກສາ,ຄູສອນ ແລະ ນັກຮຽນເຂົ້າຮ່ວມຢ່າງພ້ອມພຽງ.

ການສອບເສັງຈົບຊັ້ນປະຖົມປໍ 5 ຢູ່ເມືອງໝື່ນ ປີນີ້ ທາງຫ້ອງການ ສຶກສາທິການ ແລະ ກິລາເມືອງໝື່ນ ໄດ້ມີການອຳນວຍຄວາມສະດວກໃຫ້ນັກຮຽນ ແລະ ພໍ່ແມ່ຜູ້ປົກຄອງ ໂດຍໃຫ້ມີຫຼາຍສູນສອບເສັງໃກ້ບ້ານ ກວ່າປີຜ່ານມາທັງນີ້ກໍ່ ເພື່ອລຸດຜ່ອນຄວາມແອອັດຂອງນັກຮຽນ , ເປັນການປ້ອງກັນພະຍາດລະບາດໂຄວິດ-19 ປະກອບມີ 5 ສູນສອບເສັງຄື: ສູນສອບເສັງປະຖົມໂພນງາມ,ສູນສອບເສັງປະຖົມໂນນໄຮ,ສູນສອບເສັງປະຖົມໂພນແສນ,ສູນສອບເສັງປະຖົມນາຍາວ ແລະ ສູນສອບເສັງປະຖົມບ້ານວັງ, ມີນັກຮຽນມີສິດສອບເສັງທັງໝົດ 955 ຄົນ,ຍິງ 465 ຄົນ, ສອບເສັງ 4 ວິຊາຄື: ພາສາລາວ,ຄະນິດສາດ,ໂລກອ້ອມຕົວ ແລະ ພາສາອັງກິດ.

ໃຊ້ເວລາສອບເສັງ 2 ວັນ,ວັນທີ 28 – 29 ມີຖຸນາ 2021, ພາຍຫຼັງສຳເລັດການສອບເສັງ ແລ້ວ ທາງຄະນະຮັບຜິດສອບ ຈະໄດ້ມີການກວດກາສັງລວມຄະເເນນ,ກວດຄືນກ່ຽວກັບ ຜູ້ທີ່ຂາດການສອບເສັງ, ຖ້າຫາກນັກຮຽນນ້ອງໃດຂາດມີເຫດຜົນ ແລະ ເງື່ອນໄຂຄົບຖ້ວນ ທາງຄະນະຮັບຜິດສອບແຕ່ລະສູນສອບເສັງຈະຈັດໃຫ້ມີການສອບເສັງຄືນ. ໃນສົກຮຽນປີນີ້ ທາງເມືອງໝື່ນ ກໍ່ໄດ້ຄາດຄະເນເປີເຊັນນັກຮຽນເສັງຈົບຊັ້ນປະຖົມ ປໍ5 ໃຫ້ໄດ້ 96% ຂຶ້ນໄປ ສໍາລັບມື້ປະກາດຜົນການສອບເສັງ ຈະຈັດຂຶ້ນໃນວັນທີ 2 ກໍລະກົດ 2021 ທີ່ຈະມາຮອດນີ້.