ມີເດຍລາວແຂວງບໍ່ແກ້ວ ພາບ-ຂ່າວ: ພອນສະຫວັນ ມະນີສີ.
ຄະນະໂຄສະນາອົບຮົມ ແຂວງບໍ່ແກ້ວ ຮ່ວມກັບ ຄະນະໂຄສະນາອົບຮົມ ເມືອງປາກທາ ໄດ້ສຳເລັດ ການຈັດຊຸດຝຶກອົບຮົມ ວຽກງານສັງລວມ-ຫາງສຽງສັງຄົມ ໃຫ້ກັບຄະນະຜູ້ປະສານງານເກັບກໍາສັງລວມ-ຫາງສຽງສັງຄົມ ຫ້ອງການອ້ອມຂ້າງເມືອງປາກທາ ຊຸດທີ II ພາຍຫຼັງໄດ້ດຳເນີນມາແຕ່ວັນທີ 29 ມິຖຸນາ ແລະ ສໍາເລັດລົງວັນທີ 30 ມິຖຸນານີ້ ທີ່ສະໂມສອນຂອງເມືອງ ໂດຍການເຂົ້າຮ່ວມຂອງທ່ານ ຄອນສະຫວັນ ຊາພັກດີ ກຳມະການພັກແຂວງ ຫົວໜ້າຄະນະໂຄສະນາອົບຮົມ ແຂວງບໍ່ແກ້ວ ທ່ານ ສາລີ ວັນນະສານ ຮອງເລຂາພັກເມືອງປາກທາ ຜູ້ຊີ້ນຳຂົງເຂດພັກ-ພະນັກງານ ແລະ ຄະນະຮັບຜິດຊອບ ພ້ອມດ້ວຍສໍາມະນາກອນເຂົ້າຮ່ວມ.

ທ່ານ ອ່ອນແກ້ວ ທຳມະແສງ ກຳມະການພັກເມືອງ ຫົວໜ້າຄະນະໂຄສະນາອົບຮົມ ເມືອງປາກທາ ໄດ້ກ່າວວ່າ: ຊຸດຝຶກອົບຮົມຄັ້ງນີ້ ມີສຳມະນານກອນເຂົ້າອົບຮົມທັງໝົດ 31 ສະຫາຍ, ຍິງ 9 ສະຫາຍ, ສຳມະນາກອນແມ່ນໄດ້ຮຽນຮູ້ ແລະ ຮັບຟັງ ທັງພາກທິດສະດີ ແລະ ປະຕິບັດຕົວຈິງ ເຊິ່ງລວມມີທັງໝົດ 4 ບົດ ປະກອບມີ: ຄວາມຮູ້ພື້ນຖານກ່ຽວກັບວຽກງານ-ຫາງສຽງສັງຄົມ, ວິທີເກັບກຳ ແລະ ການນໍາໃຊ້ຫາງສຽງສັງຄົມ ເຂົ້າໃນວຽກງານການເມືອງແນວຄິດ, ຕາໜ່າງເພືອນຮ່ວມງານ ແລະ ວຽກງານຄົ້ນຄວ້າສັງລວມ ຈາກນັ້ນ ສຳມະນາກອນຍັງໄດ້ຂຽນບົດລາຍງານຕົວຈິງ ໂດຍໄດ້ແບ່ງອອກເປັນກຸ່ມ ຂອງແຕ່ລະຂົງເຂດວຽກງານ ເພື່ອຂຽນສັງລວມຄວາມຮັບຮູ້ ແລ້ວຂື້ນລາຍງານ ພ້ອມທັງແລກປ່ຽນຄຳຄິດ-ຄຳເຫັນ ຖອດຖອນບົດຮຽນນຳກັນ ລະຫວ່າງສໍາມະນາກອນ ແລະ ຄະນະຮັບຜິດຊອບ ຜ່ານການສັງລວມຄວາມຮັບຮູ້ເຂົ້າໃຈຂອງສໍາມະນາກອນສາມາດປະເມີນໄດ້ 95% ຈາກນັ້ນ ກໍ່ໄດ້ມອບໃບຢັ້ງຢືນໃຫ້ສຳມະນາກອນທີ່ສໍາເລັດການຝຶກອົບຮົມວຽກງານສັງລວມ-ຫາງສຽງສັງຄົມ ເປັນກຽດມອບໂດຍ ທ່ານ ຄອນສະຫັວນ ຊາພັກດີ ກໍາມະການພັກແຂວງ ຫົວໜ້າຄະນະໂຄສະນາອົບຮົມ ແຂວງບໍ່ແກ້ວ

ພ້ອມທັງມີຄໍາເຫັນໂອ້ລົມເນັ້ນໜັກໃຫ້ສໍາມະນາກອນ ຕ້ອງໄດ້ເອົາໃຈໃສ່ ເຄື່ອນໄຫວເກັບກຳແນວຄິດຫາງສຽງສັງຄົມ ທີ່ສ່ອງແສງເຖິງການນຳພາຂອງພັກ ການວາງແນວທາງນະໂຍບາຍ, ການຈັດຕັ້ງປະຕິບັດກົດລະບຽບຂອງພັກ ກົດໝາຍຂອງລັດ ພຶດຕິກຳທີ່ບໍ່ສອດຄ່ອງຂອງພະນັກງານ-ສະມາຊິກພັກ ແລະ ທົ່ວປວງຊົນທີ່ມີຜົນກະທົບໃນບັນຫາຕ່າງໆທີ່ບໍ່ມີມູນຄວາມຈິງ, ຕ້ອງມີການລາຍງານປະສານງານສົມທົບກັນຢ່າງເປັນປົກກະຕິ ແລະ ສຶກສາຄົ້ນຄ້ວາບົດ ຮຽນທີ່ໄດ້ຮຽນມາ ແລ້ວນຳໄປຈັດຕັ້ງປະຕິບັດຢູ່ພາຍໃນກົມກອງຫ້ອງກການຂອງຕົນໃຫ້ໄດ້ຮັບຜົນສຳເລັດເປັນກ້າວໆ.