ມີເດຍລາວແຂວງໄຊສົມບູນ ບັນນາທິການ ຂ່າວ: ນາງ ຕູດ ຄໍາພໍໃຈ.
ກອງປະຊຸມຄົບຄະນະບໍລິຫານງານພັກແຂວງໄຊສົມບູນ ຄັ້ງທີ 4 ສະໄໝທີ I ໄດ້ຈັດຂຶ້ນໃນຕອນເຊົ້າ ຂອງວັນທີ 1 ກໍລະກົດ 2021 ນີ້ ຢູ່ທີ່ສະໂມສອນເມືອງອະນຸວົງ ໂດຍການເປັນປະທານຂອງສະຫາຍ ພົຕ ຄໍາລຽງ ອຸທະໄກສອນ, ກຳມະ ການສູນກາງພັກ, ເລຂາພັກແຂວໄຊສົມບູນ, ມີຮອງເລຂາພັກແຂວງ, ປະທານສະພາປະຊາຊົນແຂວງ, ຮອງເຈົ້າແຂວງ, ຄະນະ ປະຈຳພັກແຂວງ, ກຳມະການພັກແຂວງ, ພ້ອມດ້ວຍເລຂາໜ່ວຍພັກພະແນການການ – ອົງການກົມກອງອ້ອມຂ້າງແຂວງ ແລະ ເລຂາພັກເມືອງທັງ 5 ເມືອງ ເຂົ້າຮ່ວມ.

ໂອກາດນີ້ ສະຫາຍ ພົຕ ຄໍາລຽງ ອຸທະໄກສອນ, ກໍາມະການສູນກາງພັກ,ເລຂາພັກແຂວງ ໄດ້ມີຄໍາເຫັນ ແລະ ກ່າວເປີດ ກອງປະຊຸມຢ່າງເປັນທາງການ ເຊິ່ງກອງປະຊຸມໃນຄັ້ງນີ້ ຈະໄດ້ພ້ອມກັນສຸມໃສ່ໃນການຄົ້ນຄວ້າປຶກສາຫາລືບາງໜ້າວຽກ ທີ່ສໍາຄັນເປັນຕົ້ນແມ່ນ ການຕີລາຄາຊີ້ນໍາ-ນໍາພາວຽກງານຮອບດ້ານ ຂອງຄະນະບໍລິຫານງານພັກແຂວງ ໃນໄລຍະ 6 ເດືອນ ຜ່ານມາ ໂດຍສະເພາະແມ່ນການຈັດຕັ້ງຜັນຂະຫຍາຍມະຕິກອງປະຊຸມໃຫ່ຍ ຄັ້ງທີ XI ຂອງພັກ, ມະຕິກອງປະຊຸມໃຫຍ່ ຄັ້ງທີ I ຂອງອົງຄະນະພັກແຂວງ, ຕີລາຄາການນໍາພາຈັດຕັ້ງປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບ, ຕີລາຄາການຈັດ ຕັ້ງແຜນການແກ້ໄຂຄວາມທຸກຍາກຂອງປະຊາຊົນ ແລະ ຕີລາຄາໃນການນໍາພາວຽກງານສ້າງໜ່ວຍພັກປອດໃສ່, ເຂັ້ມແຂງ, ໜັກແໜ້ນ, ຕິດພັນກັບວຽກງານກໍ່ສ້າງພັກ-ກໍ່ສ້າງພະນັກງານ ທັງນີ້ກໍເພື່ອຕີລາຄືນຜົນສໍາເລັດໃນການຈັດຕັ້ງປະຕິບັດວຽກ ງານໃນໄລຍະຜ່ານມາ

ພ້ອມນີ້ ທ່ານ ຍັງໄດ້ຮຽກຮ້ອງມາຍັງບັນດາຜູ້ແທນກອງປະຊຸມ ຈົ່ງພ້ອມກັນສຸມສະຕິປັນຍາ ແລະ ເອົາໃຈໃສ່ໃນການຄົ້ນຄວ້າປະກອບຄໍາຄິດ-ຄໍາເຫັນໃສ່ແຕ່ລະບັນຫາຢ່າງເປັນເຈົ້າການ ແລະ ມີຄວາມຮັບຜິດຊອບສູງ ໂດຍລົງ ເລິກໃສ່ບັນຫາຕົວຈິງ ຢ່າງພາວະວິໄສ ແລະ ຮອບດ້ານ. ຈາກນັ້ນ ສະຫາຍ ສົມບູນ ສອນລິທິເດດ, ກໍາມະ ການພັກແຂວງ, ຫົວໜ້າຫ້ອງວ່າການ ແຂວງ ໄດ້ຂຶ້ນຜ່ານບົດສະຫລຸບການຊີ້ນໍາ-ນໍາພາວຽກງານຮອບດ້ານ ຂອງອົງຄະນະ ພັກແຂວງ ໃນໄລຍະ 6 ເດືອນຜ່ານມາ ຊຶ່ງໃນໄລຍະຜ່ານມາ ຄະນະບໍລິຫານງານພັກແຂວງ ໄດ້ເອົາໃຈໃສ່ຊີ້ນໍາ-ນໍາພາຢ່າງ ຕັ້ງໜ້າຕໍ່ວຽກງານປ້ອງກັນຊາດ-ປ້ອງກັນຄວາມສະຫງົບ ເຮັດໃຫ້ທົ່ວແຂວງມີຄວາມສະຫງົບປອດໄພ, ມີສະຖຽງລະພາບດ້ານ ການເມືອງໜັກແໜ້ນ, ສັງຄົມມີ ຄວາມເປັນລະບຽບຮຽບຮ້ອຍໂດຍພຶ້ນຖານ ເຊິ່ງໄດ້ສຸມໃສ່ຊີ້ນໍາຫັນ ເອົາພະນັກ ງານລົງກໍ່ສ້າງ ຮາກຖານການເມືອງຢູ່ບັນດາຈຸດສຸມ ແລະ ຫັນເອົາແນວທາງປ້ອງກັນຊາດ-ປ້ອງກັນຄວາມສະຫງົບລົງໄປຈັດຕັ້ງ ຜັນຂະຫຍາຍ ຢູ່ຮາກຖານບ້ານຢ່າງກ້ວາງຂວາງ,

ໂດຍຕິດພັນກັບວຽກງານແຜນພັດທະນາເສດຖະກິດ-ສັງຄົມ ທີ່ຕິດພັນກັບດໍາລັດ 414/ລບ ພ້ອມນີ້ ວຽກງານວັດທະນະທໍາ-ສັງຄົມກໍ່ໄດ້ສຸມໃສ່ເປົ້າໝາຍການພັດທະນາແບບຍືນຍົງ ( SDG ) ຂອງຂະແນງການສຶກສາ ແລະ ສາທາລະນະສຸກ ເຊິ່ງມີຫຼາຍ ຕົວຊີ້ບອກບັນລຸຕາມຄາດໝາຍ ແລະ ຈໍານວນໜຶ່ງກໍລື່ນຄາດໝາຍ, ສໍາລັບວຽກງານນິຕິບັນຍັດ, ຕຸລາການ ແລະ ຍຸຕິທໍາ ກໍ່ໄດ້ ຕັ້ງໜ້າປະຕິບັດພາລະບົດບາດເປັນອົງການຕົວແທນແຫ່ງສິດຜົນປະໂຫຍດ ຂອງບັນດາເຜົ່າ ເປັນຕົ້ນແມ່ນການຄົ້ນຄວ້າພິຈາລະ ນາຮັບຮອງເອົານິຕິກໍາລຸ່ມກົດໝາຍ, ເອົາໃຈໃສ່ຕິດຕາມ, ກວດກາການເຄື່ອນໄຫວ ຂອງອົງການປົກຄອງແຂວງ ໄດ້ຢ່າງເຂັ້ມງວດ.

ນອກນີ້ ວຽກງານກໍ່ສ້າງພັກ-ກໍ່ສ້າງພະນັກງານ ກໍ່ໄດ້ຮັບຮອງເປັນໜ່ວຍພັກປອດໃສ່, ເຂັ້ມແຂງ ແລະ ໜັກແໜ້ນ ໄດ້ 53 ໜ່ວຍ, ກວມເອົາ 16,77% ແລະ ຮັບຮອງແຜນກໍ່ສ້າງໜ່ວຍພັກປອດໃສ່, ເຂັ້ມແຂງ, ໜັກແໜ້ນ ປະຈໍາປີ 2021 ໄດ້ 201 ໜ່ວຍ, ເທົ່າກັບ 67% ຂອງຈໍານວນໜ່ວຍພັກທັງໝົດ ໃນນັ້ນຂັ້ນເມືອງມີ 157 ໜ່ວຍພັກ ນອກນັ້ນ ວຽກງານດ້ານອື່ນໆ ກໍໄດ້ຈັດຕັ້ງ ປະຕິບັດສໍາເລັດຕາມແຜນທີ່ໄດ້ກໍານົດໄວ້.

ພ້ອມດຽວກັນນີ້ ບັນດາຜູ້ແທນກອງປະຊຸມ ກໍໄດ້ຜັດປ່ຽນກັນຂຶ້ນປະກອບຄໍາຄິດ-ຄໍາເຫັນ ຢ່າງກົງໄປ-ກົງມາ ດ້ວຍຄວາມຮັບຜິດຊອບສູງ ທັງນີ້ ກໍເພື່ອເປັນເອກະພາບຕໍ່ເນື້ອໃນກອງປະຊຸມ ແລະ ສາມາດນໍາໄປ ຜັນຂະຫຍາຍ ຈັດຕັ້ງປະຕິບັດຢູ່ແຕ່ລະຂົງເຂດທີ່ຕົນຮັບຜິດຊອບໃຫ້ປະກົດຜົນເປັນຈິງ ຕາມຄາດໝາຍທີ່ວ່າງໄວ້. ກອງປະຊຸມ ຄັ້ງນີ້ຈະໄດ້ດໍາເນີນໄປເປັນເວລາ 2 ວັນຈຶ່ງຈະສໍາເລັດ.