ມີເດຍລາວແຂວງຈຳປາສັກ ຂ່າວ: ທັດຊະນະ ໃນວັນທີ 30 ມີຖຸນາ 2021, ທີ່ຫ້ອງວ່າການແຂວງຈຳປາສັກ. ບໍລິສັດ ST ກຣຸບ ຈຳກັດ ໄດ້ມອບເງິນອຸປະຖຳ ຈຳນວນ 350.000.000 ກີບ ໃຫ້ແຂວງ ຈຳປາສັກ ເພື່ອນຳໄປປະຕິສັງຂອນ ວັດພຸດທະວັນນາຣາມ ບ້ານເມືອງກາງ, ເມືອງຈຳປາສັກ, ຕ່າງຫນ້າ ໃຫ້ກັບ ບໍລິສັດ ST ກຣຸບ ຈຳກັດ ກ່າວມອບໂດຍ ທ່ານ ສິດທິໄຊ ໄຊຊະນະ. ເປັນກຽດກ່າວຮັບ ຂອງ ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ, ໂດຍມີ ທ່ານ ສາຍທອງ ໄຊຍະວົງ ປະທານສະພາປະຊາຊົນແຂວງ, ທ່ານ ໂສມ ບຸດຕະກຸນ ຮອງເຈົ້າແຂວງຈໍາປາສັກ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ ເປັນສັກຂີພະຍານ.

ໂອກາດນີ້, ທ່ານເຈົ້າແຂວງຈຳປາສັກ ກໍໄດ້ສະແດງຄວາມຂອບໃຈ ແລະ ຊົມເຊີຍໄປຍັງ ບໍລິສັດ ST ກຣຸບ ຈຳກັດ ທີ່ໄດ້ມອບເງິນອຸປະຖຳ ເພື່ອນຳໄປປະຕິສັງຂອນວັດ ດັ່ງກ່າວ. ຖືວ່າເປັນການເລີ່ນຕົ້ນ ແລະເປັນສ່ວນໜຶ່ງຂອງເປົ້າໝາຍການສ້າງເມືອງບູຮານ ຢູ່ແຂວງຈຳປາສັກ ເພື່ອຊຸກຍູ້ ສົ່ງເສີມ ການທ່ອງທ່ຽວ ທີ່ຕິດພັນກັບ ປະຫວັດສາດ ແລະ ວັດທະນະທຳ ທີ່ເກົ່າແກ່. ວັດພຸດທະວັນນາຣາມ ຕັ້ງຢູ່ ບ້ານເມືອງກາງ, ເມືອງຈຳປາສັກ, ແຂວງຈຳປາສັກ ເປັນວັດທີ່ເກົ່າແກ່ທີ່ສຸດ ໃນເມືອງຈຳປາສັກ ເຊິ່ງກໍ່ຕັ້ງມາໄດ້ເກືອບ 500 ກວ່າປີ (ພສ. 2042 ຫລື ຄສ. 1499).

ວັດແຫ່ງນີ້ ມີເອກະລັກສະເພາະ ເປັນການປະສົມປະສານທາງດ້ານສະຖາປັດຕະຍະກຳຕ່າງໆ ທີ່ຈົບງາມ, ມີອາຄານເກົ່າແກ່ 5 ຫລັງ ຄື: ພັດທະສິມມາ, ຫໍພຣະໄຕປິດົກ, ຫໍແຈກ ແລະ ກຸຕິ 2 ຫລັງ. ໃນເມື່ອກ່ອນ ວັດແຫ່ງນີ້ໄດ້ກາຍເປັນສູນກາງທາງພຸດທະສາສະຫນາ ເປັນໂຮງຮຽນປະລິຍະຕິທຳ ໃນນະຄອນຈຳປາສັກ ເປັນບ່ອນສຶກສາຄົ້ນຄວ້າຮ່ຳຮຽນ ຂອງພຣະສົງສຳມະເນນ ແລະ ຊາວພຸດທັງຫລາຍ ເຊິ່ງຫໍພຣະໄຕປິດົກ ປະກອບມີຫນັງສືໃບລານຫລາຍເຖິງ 5.000 ກວ່າຜູກ ອັນໄດ້ກາຍເປັນມໍລະດົກທີ່ລ້ຳຄ່າ ແລະ ມີແຫ່ງດຽວຢູ່ແຂວງພາກໃຕ້ຂອງລາວເຮົາ. ປັດຈຸບັນ ອາຄານທີ່ເກົ່າແກ່ທັງ 5 ຫລັງ ໄດ້ຊຸດໂຊມໄປຕາມການເວລາ ດັ່ງນັ້ນ ຈຶ່ງມີໂຄງການປະຕິສັງຂອນອາຄານວັດເມືອງກາງຄືນໃຫມ່ ເພື່ອບູລະນະ ປະຕິສັງຂອນ ມໍລະດົກອັນລ້ຳຄ່ານີ້ ໃຫ້ສືບຕໍ່ເປັນມໍລະດົກທາງດ້ານວັດທະນະທຳຂອງຊາດລາວເຮົາຕະຫລອດໄປ.