ມີເດຍລາວແຂວງໄຊສົມບູນ ຂ່າວ: ສີລິພອນ ສົງຄຳ
ພະແນກສຶກສາທິການ ແລະ ກິລາ ແຂວງໄຊສົມບູນ ໄດ້ຈັດກອງປະຊຸມສະຫລຸບແຜນພັດທະນາການສຶກສາທິການ ແລະ ກິລາ 5 ປີ ຄັ້ງທີ I (2016-2020) ແລະ ແຜນພັດທະນາການສຶກສາ ແລະ ກິລາ 5 ປີ ຄັ້ງທີ II (2021-2025) ຂຶ້ນໃນຕອນເຊົ້າຂອງວັນທີ 1 ກໍລະກົດ 2021 ທີ່ຫ້ອງປະຊຸມຂອງພະແນກ. ພາຍໃຕ້ການເປັນປະທານຂອງ ທ່ານ ຢົງຢີ ລີເຍ່ຍວື່, ຫົວໜ້າພະແນກສຶກສາທິການ ແລະ ກິລາ ແຂວງໄຊສົມບູນ, ມີເຈົ້າເມືອງ-ຮອງເຈົ້າເມືອງ, ຫ້ອງການສຶກສາ ແລະ ກິລາ ບັນດາ 5 ເມືອງ, ອຳນວຍການໂຮງຮຽນ ມສ ທົ່ວແຂວງໄຊສົມບູນ ພ້ອມທັງພະນັກງານ ຄູ-ອາຈານ ພາຍໃນພະແນກ ເຂົ້າຮ່ວມ.

ໂອກາດດັ່ງກ່າວ ໄດ້ຮັບຟັງການຜ່ານແຜນພັດທະນາການສຶກສາທິການ ແລະ ກິລາ ຄັ້ງທີ IX ຂອງກະຊວງສຶກສາທິການ ແລະ ກິລາ ແລະ ແຜນພັດທະນາການສຶກສາ ແລະ ກິລາ ຄັ້ງທີ II (2021-2025) . ຊຶ່ງຕະຫລອດໄລຍະຜ່ານມາ ໄດ້ເອົາໃຈໃສ່ຈັດຕັ້ງປະຕິບັດຂົງເຂດວຽກງານຂອງຕົນ ທີ່ຂັ້ນເທິ່ງມອບໝາຍໃຫ້ ດ້ວຍຄວາມຮັບຜິດຊອບສູງ ທັງບັນລຸຫຼາຍດ້ານນັບແຕ່ປີ 2016-2020. ໃນນັ້ນ ການສຶກສາກ່ອນໄວຮຽນ ບັນລຸໄດ້ 67%, ຊັ້ນປະຖົມສຶກສາ ປະຕິບັດໄດ້ 79% , ມັດທະຍົມສຶກສາຕອນຕົ້ນ 87%, ມັດທະຍົມສຶກສາຕອນປາຍ ມ4-ມ5 ປະຕິບັດໄດ້ 82%, ມ7 ກວມເອົາ 100%, ຂະແໜງການສຶກສານອກໂຮງຮຽນ 82,3%, ການພັດທະນາຄູ ໄດ້ເຂົ້າຮ່ວມຝຶກອົບຮົມ ສະເລ່ຍ 11% ໃນແຕ່ລະຊັ້ນການສຶກສາ, ກິລາ-ກາຍຍະກຳ ບັນລຸ 20%. ກອງປະຊຸມຄັ້ງນີ້ໄດ້ຕີລາຄາຄືນຢ່າງພາວະວິໄສ ແລະ ຮອບດ້າ່ນ

ພ້ອມທັງວາງແຜນພັດທະນາການສຶກສາ ແລະ ກິລາ 5ປີ ຄັ້ງທີ II (2021-2025) ດ້ວຍຄວາມຮັດກຸມ ເພື່ອເຮັດໃຫ້ວຽກງານດັ່ງກ່າວ ໄດ້ຮັບການຈັດຕັ້ງປະຕິບັດ ຢ່າງມີປະສິດທິພາບ ແລະ ປະກົດຜົນເປັນຈິງ.ທັງໝົດນັ້ນ ກໍ່ເພື່ອສຸມໃສ່ພັດທະນາການສຶກສາ ແຂວງໄຊສົມບູນ ໃຫ້ໄດ້ປະລິມານ ແລະ ຄຸນນະພາບ ໂດຍສຸ່ມໃສ່ການຍົກລະດັບຄວາມຮູ້-ຄວາມສາມາດ, ພູມປັນຍາ ເຂົ້າໃນການພັດທະນາເສດຖະກິດ-ສັງຄົມ, ໄປພ້ອມກັບການສ້າງເງື່ອນໄຂການເຂົ້າເຖິງການສຶກສາໃນເຂດຊົນນະບົດ ແລະ ຫ່າງໄກສອກຫລີກ, ສ້າງຄວາມເຂັ້ມແຂງໃຫ້ແກຫ້ອງການສຶກສາ, ກຸ່ມໂຮງຮຽນ, ເພື່ອປັບປຸງປະສິດທິຜົນ ແລະ ຄວາມຮັບຜິດຊອບ ໂດຍຜ່ານການສ້າງຄວາມກົມກຽວ ໃຫ້ມີບາດກ້າວຂະຫຍາຍຕົວດີຂຶ້ນເທື່ອລະກ້າວ. ກອງປະຊຸມໃນຄັ້ງນີ້ຈະໄດ້ດຳເນີນເປັນເວລາ 2 ວັນຈຶ່ງຈະສຳລັດ.