ມີເດຍລາວແຂວງວຽງຈັນ ພາບ-ຂ່າວ: ບຸນມາ ແກ້ວບຸດດາ. ໃນວັນທີ 29 ມິຖຸນາ 2021ຜ່ານມາ ຄະນະ​ກຳມະການ​ປ້ອງ​ກັນ ​ສະກັດ​ກັ້ນ​ພະຍາດ​ໂຄ​ວິດ 19 ​ແລະ ​ຄວບ​ຄຸມພະ​ຍາດຕິ​ດຕໍ່​ຕ່າງໆ​ຂອງ​ ແຂວງ​ວຽງ​ຈັນໄດ້ຈັດກອງປະຊຸມ ​ເພື່ອພ້ອມ​ກັນ​ປະ​ເມີນ​ຄືນຕໍ່​ກັບ​ສະພາບ​ການລະບາດ​ຂອງ​ພະຍາດ​ໂຄ​ວິດ 19 ຢູ່​ພາຍ​ໃນ​ແຂວງ​ເວົ້າ​ລວມ,​ເວົ້າ​ສະ​ເພາະ​ກໍ່​ແມ່ນ​ຢູ່​ເມືອງ ​ໂພນ​ໂຮງ ​ພ້ອມ​ນີ້​ກໍ່​ຈະ​ໄດ້​ພ້ອມ​ກັນ​ຄົ້ນ​ຄ້ວາ​ສ້າງ​ຄວາມ​ເປັນເອກະພາບ​ຕໍ່​ການ​ກຳນົດ​ບັນດາ​ມາດ​ຕະການ​ປ້ອງ​ກັນ ​ແລະ ຄວບ​ຄຸມ​ໃນ​ຕໍ່ໜ້າ.

ໃນ​ກອງປະຊຸມ ທ່ານ ພູ​ວົງ​ ບຸນ​ຊູ ຮອງ​ເຈົ້າ​ແຂວງ ປະທານ​ຄະນະ​ກຳມະການ​ປ້ອງ​ກັນ ​ສະກັດ​ກັ້ນ​ພະຍາດ​ໂຄ​ວິດ 19 ​ແລະ ​ຄວບ​ຄຸມພະ​ຍາດຕິ​ດຕໍ່​ຕ່າງໆ​ຂອງ​ ແຂວງ​ວຽງ​ຈັນ ​ໄດ້​ຕີ​ລາຄາ​ລວມ​ໂດຍ​ຫຍໍ້​ຕໍ່​ກັບ​ການ​ພາບ​ວຽກ​ງານ​ປ້ອງ​ກັນ ​ແລະ ຄວບ​ຄຸມ​ການລະບາດ​ຂອງ ພະຍາດ​ໂຄ​ວິດ 19 ​​ໂດຍ​ລວມ​ແລ້ວ​ແມ່ນ​ສາມາດຍາດ​​ໄດ້​ຜົນສຳ​ເລັດ​ຫລາຍ​ອັນ​​ເຮັດ​ໃຫ້​ຈຳນວນ​ຜູ້​ຕິດ​ເຊື້ອ​ບໍ່​ມີ​ການ​ແຜ່​ຂະຫຍາຍ​​ເປັນ​ວົງ​ກ້ວາງ.ການ​ສັກ​ວັກ​ຊີ​ນປ້ອງ​ກັນ​ກໍ່​ຖື​ວ່າ​ສາມາດ​ບັນລຸ​ໄດ້​ໃນ​ລະດັບ​ດີ ​ແຕ່​ເນືອງ​ຈາກ​ສະພາບ​ໂດຍ​ລວມ​ໃນ​ທົ່ວ​ປະ​ເທດ ​ເປັນຕົ້ນກໍ່​ແມ່ນຍັງ​ມີ​ການ​ຕິດ​ເຊື້ອ​ຂອງ​ປະຊາຊົນ​ຢູ່​ນະຄອນຫລວງ​ວຽງ​ຈັນ ​ເຊີ່ງ​ມີ​ຊາຍ​ແດນ​ຕິດ​ກັບ​ແຂວງ​ວຽງ​ຈັນ ​ແລະ ປະຊາຊົນ​ກໍ່​ຍັງມີ​ການ​ເຄື່ອນ​ໄຫວ​ໄປມາຫາສູ​ກັນ ຈຶ່ງ​ເຮັດ​ໃຫ້​ເກີດ​ມີ​ການ​ຕິດ​ເຊື້ອໃໝ່​ຢູ່​ໃນ​ຊຸມ​ຊົນ​ຫລາຍ​ບ້ານ​ຂອງ​ເມືອງ​ໂພນ​ໂຮງ ຈາກ​ສະພາບ​ດັ່ງກ່າວ​ເຮັດ​ໃຫ້​ແຂວງ​ພວກ​ເຮົາ​ຕົກ​ຢູ່​ໃນ​ຄວາມຫຍຸ້ງຍາກ​ເປັນ​ຮອບ​ທີ 3.

ກອງ​ຊຸມ​ໄດ້​ຮັບ​ຟັງ​ການ​ລາຍ​ງານ​ສະພາບ​ການ​ຕິດ​ເຊື້ອ​ໂຄ​ວິດ 19 ຢູ່​ບ້ານ​ໃໝ່,ນາ​ເລົາ,ຫລັກ 52 ​​ແຕ່​ວັນ​ທີ 28 ມິຖຸນາ ​ເປັນ​ຕົ້ນ​ມາ ​​ແລະ ການ​ຕິດຕາມ​ເຝົ້າ​ລະວັງ​ບັນດາ​ບ້ານ​ທີ່​ມີ​ຄວາມ​ສ່ຽງ​ເຊັ່ນ: ບ້ານ​ໂພນ​ເງີ​ນ ​ເມືອງ​ໂພນ​ໂຮງ ​ເຊີ່ງ​ສາມາດ​ກວດ​ພົບ​ຜູ້​ຕິດ​ເຊື້ອ​ໃໝ່​ແລ້ວ​ທັງ​ໝົດ 17 ຄົນ ​ແລະ​ ໄດ້​ແຈ້ງ​ປິດ ພ້ອມ​ທັງ​ປະກາດ​ບ້ານ​ດັ່ງ​ເປັນ​ບ້ານ​ແດງ​ແລ້ວ.ສຳລັບ​ບ້ານ​ໄກ້​ຄຽງນັບ​ແຕ່​ບ້ານ​ສີວິ​ໄລ​ຮອດ​ບ້ານ ຫ້ວຍ​ທົນ ​ແມ່ນ​​ໄດ້ປະກາດ​ເປັນ​ບ້ານ​ຂຽວ. ປະຈຸ​ບັນພະ​ແນ​ກສາທາລະນະ​ສຸກ​ແຂວງ​​​ໄດ້​ສົມທົບ​ກັບ​ອົງການ​ປົກຄອງ​ເມືອງ ໄດ້​ສຸມ​ກຳລັງ​ແພດ​ໝໍ​ລົງ​ໄປ​ຕິດຕາມ​ເຝົ້າ​ລະວັງ,​ເກັບ​ຕົວຢ່າງ​ກຸ່ມ​ເປົ້າ​ໝາຍ​ໄດ້ ​ແລ້ວ 300 ກ່ວາ​ຕົວຢ່າງ ​ແລະ ຈະ​ສືບ​ຕໍ່​ເກັບ​ຕົວຢ່າງ​ໃດ້​ຢ່າງ​ບຸກຄົນ​ໃນ​ກຸ່ມ​ເປົ້າ​ໝາຍ​ໃຫ້​ຄົບ​ຖ້ວນ,ພ້ອມ​ນີ້​ກໍ່​ໄດ້​ລົງ​ສັກ​ວັກ​ຊີ​ນກັນ​ໂຄ​ວິດ​ໃຫ້​ແກ່​ປະຊາຊົນ​ຢູ່​ໃນ​ບ້ານ​ທີ່​ມີ​ຄວາມ​ສ່ຽງ,​ໄດ້​ລົງ​ພົ່ນ​ຢາຂ້າ​ເຊື້ອ​ຢູ່​ສະຖານ​ທີ່​ພັກ​ເຊົາ ​ແລະ ສະ​ທີ່​ກ່ຽວຂ້ອງ ພ້ອມ​ທັງ​ລົງ​​ໂຄສະນາ​ສຸຂະ​ສຶກສາ​ໃຫ້​ຄວາມ​ຮູ້​ຄວາມ​ຮູ້​ແກ່ປະຊາຊົນ.

ເນື່ອງ​ຈາກ​ຢູ່ສູນ​ປີ່​ນປົວ​ໂຮງໝໍ​ແຂວງ ​​ແມ່ນ​ເປັນ​ເຂດ​ຊຸມ​ຊົນ ດັ່ງ​ນັ້ນ​ຈຶ່ງ​ໄດ້​ກຳນົດ​ເອົາ​ສູນ​ບຳ​ບັດ​ຜູ້​ຕິດ ຢູ່​ເມືອງ​ໂພນ​ໂຮງ​ເປັນ​ສູນ​ປີ່​ນປົວ​ຂອງ​ແຂວງ​ ​ເຊີ່ງ​ມີ​ຄວາມ​ສາມາດ​ຮອງ​ຮັບ​ຜູ້​ຕິດ​ເຊື້ອ​ໄດ້ເຖິງ 60 ຄົນ ປະຈຸ​ບັນ​ໄດ້​ຮັບ​ເອົາ​ຜູ້ຕິດເຊື້ອ​ຈຳນວນ 13 ຄົນ​ເຂົ້າ​ປີ່​ນປົວ​ແລ້ວ ສ່ວນ 4 ຄົນ​ທີ່​ປີ່​ນປົວ​ຢູ່​ໂຮງໝໍ​ແຂວງກໍ່​ຈະ​ໄດ້​ຍ້າຍ​ອອກ​ໄປ​ຢູ່​ຈຸດ​ດຽວ.

ຈາກ​ນັ້ນ​ກອງ​ປະຊຸມ​ໄດ້​ພ້ອມ​ກັນ​ຄົ້ນ​ຄ້ວາ​ປະກອບ​ຄຳ​ເຫັນ​ເພື່ອ​ກຳນົດ​ບັນດາ​ມາດ​ຕະການ​ປ້ອງ​ກັນ​ໃນ​ຕໍ່ໜ້າ​ໂດ​ຍ​ໄດ້​ເປັນເອກະພາບ​ກັນ​​ປະກາດ​ປິດ​ຈຳນວນ​ບ້ານແດງ ​ແລະ ປິດ​ເມືອງ​ໂພນ​ໂຮງ​ ນັບ​ແຕ່​ບ້ານ​ຫ້ວຍ​ທົນ​ຫາ​ບ້ານ​ນາ​ດີ, ໃຫ້ຕັ້ງ​ດ່ານ​ກວດກາ​ຄັດ​ກ​ອງ ຄົນ​ເຂົ້າ-ອອກ​ບ້ານ ​ແລະ ​ເມືອງ​ຢ່າງ​ເຂັ້ມ​ງວດ​ຕາມ​ຈຸດ​ຊາຍ​ແດນ​ຕໍ່​ກັບ​ນະຄອນຫລວງ​ວຽງ​ຈັນ ​ແລະ​ ບັນດາ​ເມືອງ ລວມ​ເຖີງປິດ​ການ​ເສັ້ນທາງ​ເຂົ້າ​-ອອກ​ທາງ​ດ່ວນ​ເຂດ​ບ້ານ​ໂພນ​ຄຳ, ປະກາດ​ປິດ​ບັນດາ​ໂຮງ​ຮຽນ​ທົ່ວ​ເມືອງ​ໂພນ​ໂຮງ​ຈົນ​ກວ່າ​ຈະ​ສາມາດ​ຄວບ​ຄຸມ​ການລະບາດ​ໄດ້,ໃຫ້​ແຕ່​ລະ​ພະ​ແນ​ກການ,ກົມ​ກອງ​ພາຍ​ໃນ​ແຂວງ​​ແຈ້ງ​ຕໍ່​ພະນັກງານ​ທີ່ຢູ່​ໃນ​ບ້ານ​ແດງ​ ​ແລະ ຜູ້​ທີ່​ຢູ່​ໃນ​ກຸ່ມ​ສ່ຽງໃຫ້​ຢຸດຕິ​ການມາ​ປະຈຳການ ​ເພື່ອ​ຕິດຕາມ​ສຸຂະພາບ ຈົນ​ກວ່າ​ຈະ​ມີ​ຄວາມ​ຮັບປະກັນ​ບໍ່​ມີ​ການ​ຕິດ​ເຊື້ອ, ​ເອກ​ພາບ​ໃຫ້​ສືບ​ຕໍ່ປະຕິບັດ​ມາດ​ຕະການ​ປ້ອງ​ກັນ,ຄວບ​ຄຸມ ​ແລະ ສະກັດ​ກັ້ນ​ການລະບາດ​ຂອງ​ໂຄ​ວິດ 19 ທີ່​ກຳນົດ​ໄວ້ ​ໃນ​ແຈ້ງ​ການ​ຂອງ​ຄະນະ​ກຳມະການ​ປ້ອງ​ກັນ,ສະກັດ​ກັ້ນ​ພະຍາດ​ໂຄ​ວິດ 19 ​ແຂວງ​ວຽງ​ຈັນ ​ສະບັບ​ເລກທີ 014/ຄສກ.ວຈ ລົງ​ວັນ​ທີ 19 ມິຖຸນາ 2021 ​ໃຫ້​ເຂັ້ມ​ງວດ​ກວ່າ​ເກົ່າ.