ໃນວັນທີ 25 ມີຖຸນາ 2021 ຄະນະບໍລິຫານງານຊາວໜຸ່ມແຂວງອຸດົມໄຊ ໄດ້ລົງຕິດຕາມຊຸກຍູ້ຄອບຄົວຕົວແບບ ໜ່ວຍຊາວໜຸ່ມຮາກຖານພະແນກອຸດສາຫະກໍາແລະການຄ້າ ຂອງຄອບຄົວ ສະຫາຍ ດວງຈັນ ໄຊຍະມອນ ທີ່ປະກອບອາຊີບເສີມໂດຍການຜະລິດນໍ້າມັນງາ ຈໍາໜ່າຍໃຫ້ກັບຕະຫຼາດ ພາຍໃນແຂວງແລະຕ່າງແຂວງ ເຊີ່ງການລົງຕິດຕາມຊຸກຍູ້ໃນຄັ້ງນີ້ໂດຍການນໍາພາ-ຊີ້ນໍາຂອງ ສະຫາຍ ສົມດີ ເຕັງເບຼຍຈື ກໍມະການພັກແຂວງ ກໍາມະການສູນກາງຊາວໜຸ່ມປະຊາຊົນປະຕິວັດລາວ ເລຂາຄະນະບໍລິຫານງານຊາວໜຸ່ມແຂວງອຸດົມໄຊ, ພ້ອມດ້ວຍຂະແໜງການທີ່ກ່ຽວຂ້ອງເຂົ້າຮ່ວມ.

ຈຸດປະສົງການລົງເຮັດວຽກໃນຄັ້ງນີ້ແມ່ນເພື່ອ ເປັນການຕິດຕາມ, ຊຸກຍູ້ການຜະລິດ ຄອບຄົວຕົວແບບ ຂອງຊາວໜຸ່ມພວກເຮົາ ວ່າມີຂໍ້ສະດວກ ຂໍ້ຫຍຸ້ງຍາກ ແລະ ສິ່ງທ່າທາຍຄືແນວໃດ, ທັງເປັນການລົງເກັບກຳຂໍ້ມູນ, ສໍາພາດຄອບຄົວຕົວແບບ ເພື່ອນໍາມາຂຽນເປັນບົດຂ່າວ, ບົດຄວາມ, ກ່ຽວບົດວຽກດີຄົນເດັ່ນ, ເພື່ອອອກລາຍການວີທະຍຸ-ໂທລະພາບ ,ໜັງສືພີມ ແລະ ພາຫານະສື່ມວນຊົນຕ່າງໆໃຫ້ສັງຄົມໄດ້ຮັບຮູ້ ຢ່າງກວ້າງຂວາງ ແລະ ທົ່ວເຖີງ.

ນອກຈາກນັ້ນ ສະຫາຍ ດວງຈັນ ໄຊຍະມອນ ກໍ່ໄດ້ນໍາພາຄະນະທີມງານທ່ຽວຊົມກິດຈະກໍາຂອງຄອບຄົວ ທີ່ມີຄວາມສາມາດໃນການສ້າງລາຍຮັບເພີ່ມ ໂດຍການຜະລິດນໍ້າມັນງາ ຈໍານ່າຍໃຫ້ກັບຕະຫຼາດ ເຊິ່ງເປັນອີກຊ່ອງທາງໜື່ງທີ່ສາມາດສ້າງລາຍຮັບເພີ່ມບວກໃສ່ກັບເງິນເດືອນ ປີໜຶ່ງບໍ່ຕໍາກ່ວາ 80 ລ້ານກ່ວາກີບ ແລະ ສະຫາຍ ຍັງໃຫ້ຮູ້ອີກວ່າ ການສ້າງເສດຖະກິດຄອບຄົວສໍາລັບພະນັກງານ ແມ່ນຕ້ອງຮູ້ຈັກການແບ່ງເວລາໃຫ້ເໝົາະສົມ ເພື່ອບໍ່ໃຫ້ມີຜົນກະທົບຕໍ່ກັບໜ້າທີ່ວຽກງານຄວາມຮັບຜິດຊອບ ທີ່ສໍາຄັນຕ້ອງຮູ້ຈັກປະຍັດມັດທະຍັດ ບໍ່ຫຼີ້ນກິນຝຸມເຝື່ອຍ ຊື່ສັດຕໍ່ຄອບຄົວ ລາຍຈ່າຍບໍ່ໃຫ້ເກີນລາຍຮັບ ຈຶ່ງຈະສາມາດອ່ອມເງິນໄດ້.