ມີເດຍລາວແຂວງເຊກອງ ຂ່າວ: ແດນວົງວິຈິດ
ໃນທ້າຍເດືອນມິຖຸນາ 2021 ທີ່ຜ່ານມາຢູ່ທີ່ວັດບ້ານກະປືເມືອງທ່າແຕງແຂວງເຊກອງໄດ້ຈັດພິທີປູກ ແລະ ບວດຕົ້ນໄມ້ປ່າສະຫງວນດົງໝາກຈອງບ້ານກະປືໂດຍການເປັນປະທານຂອງ ທ່ານ ລົດແກ້ວ ເພັງພູນສະຫວັດ ຮອງເລາຂາພັກເມືອງ ປະທານແນວລາວສ້າງຊາດເມືອງທ່າແຕງ,ມີບັນດາຫ້ອງການ,ບໍລິສັດ-ນັກທຸລະກິດ,ພະສົງສຳມະເນນ,ອົງການຈັັດຕັ້ງບ້ານພ້ອມດ້ວຍອອກຕົນຍາດໂຍມເຂົ້າຮ່ວມ.

ໃນພິທີ ທ່ານ ຈັນທອນ ເບັບດາວົງ ເລຂາພັກບ້ານກະປືໄດ້ກ່າວວ່າ: ປ່າດົງຫມາກຈອງບ້ານກະປືແມ່ນຢູ່ໃນເຂດຄຸ້ມຄອງຂອງ ບ້ານມາໂດຍຕະຫຼອດ ຊຶ່ງເປັນມູນມໍລະດົກລວມອັນລ້ຳຄ່າຂອງບ້ານປັດຈຸບັນ ສະພາບເສດຖະກິດມີ ການພັດທະນາຢ່າງຕໍ່ເນື່ອງ ເຮັດໃຫ້ເນື້ອທີ່ປ່າດັ່ງກ່າວ ຖືກບຸກລຸກທໍາລາຍ ຈາກປະຊາຊົນເພື່ອຂະຫຍາຍ ເນື້ອທີ່ການຜະລິດ.

ສະນັ້ນ, ອໍານາດການປົກຄອງບ້ານ ຈິ່ງໄດ້ສົມທົບກັບເຂດຈຸດສຸມພັດທະນາທີ III ແລະ ຂະແຫນງການກ່ຽວຂ້ອງຂັ້ນເມືອງ ກໍານົດເຂດເພື່ອຟື້ນຟູປ່າດົງຫມາກຈອງໃຫ້ມີຄວາມຕືບຫນາ ແລະມີຄວາມສົມບູນ ໃນເນື້ອທີ່ 7,3 ເຮັກຕາ, ສໍາລັບປີ 2021 ຈະປູກໄມ້ໃຫ້ໄດ້ຈໍານວນ 2 ເຮັກຕາ ຫຼື ເທົ່າກັບ 500 ຕົ້ນ, (ມີໄມ້ສົ້ມຝາດ, ໄມ້ທີ່ຫາໄດ້ໃນທ້ອງຖິ່ນ), ໃນນັ້ນ: ຫ້ອງການກະສິກໍາ ແລະ ປ່າໄມ້ເມືອງ ທ່າແຕງ ຈໍານວນ 100 ຕົ້ນ (ໄມ້ສົ້ມຝາດ), ຫ້ອງການຊັບພະຍາກອນທໍາມະຊາດ ແລະ ສິ່ງແວດລ້ອມ ຈໍານວນ 50 ຕົ້ນ (ໄມ້ສົ້ມຝາດ), ສ່ວນອີກ 350 ຕົ້ນ ແມ່ນພູດຂອງພາກສ່ວນຕ່າງໆ ແລະ ປະຊາຊົນພາຍໃນບ້ານ, ສຳລັບ ແຜນປີ 2022 ແມ່ນຈະປູກຢູ່ 2 ຈຸດ ຄື: ປູກຢູ່ເຂດປ່າດົງຫມາກຈອງ ໃຫ້ໄດ້ ຈໍານວນ 2 ເຮັກຕາ ຫຼື ເທົ່າກັບ 500 ຕົ້ນ ແລະ ປູກຢູ່ເຂດປ່າອາຮັກຂອງບ້ານໃຫ້ໄດ້ 0,5 ເຮັກຕາ ຫຼື ເທົ່າກັບ 125 ຕົ້ນ ສຳລັບ ໄມ້ປະດັບ-ໄມ້ໃຫ້ຮົ່ມ ຈະປູກຕາມສະຖານທີ່ສາທາລະນະ, ສາຍທາງຊອຍເຂົ້າບ້ານ ໃຫ້ໄດ້ 50 ຕົ້ນ.

ໂອກາດດັ່ງກ່າວນີ້ທ່ານ ລົດແກ້ວ ເພັງພູນສະຫວັດ ຮອງເລາຂາພັກເມືອງ ປະທານແນວລາວສ້າງຊາດເມືອງທ່າແຕງກໍ່ໄດ້ໃຫ້ທິດຊີ້ນໍາພ້ອມທັງຮຽກຮ້ອງມາຍັງອົງການຈັດຕັ້ງ ພັກ-ລັດ, ບ້ານ – ພໍ່ແມ່ປະຊາຊົນບັນດາເຜົ່າ ພາຍໃນບ້ານ ແລະ ບ້ານໄກ້ຄຽງ ຈົ່ງພ້ອມກັນເອົາໃຈໃສ່ໃນການປູກຕົ້ນໄມ້ໃຫ້ເປັນຂະບວນກ້ວາງຂວາງ, ທັງ ເປັນເຈົ້າການ ຄຸ້ມຄອງ-ປົກປັກຮັກສາ ຊັບພະຍາກອນປ່າໄມ້ ທີ່ມີຢູ່ໃນພູມລໍາເນົານັ້ນ ໃຫ້ນັບມື້ນັບເພີ່ມ ຂື້ນເລື້ອຍໆໄປ.