ການຈັດຕັ້ງປະຕິບັດວຽກງານສົ່ງເສີມ ແລະ ຄຸ້ມຄອງການລົງທຶນຂອງພາກເອກະຊົນ ໃນ 6 ເດືອນຕົ້ນປີ 2021 ຜ່ານມາໄດ້ຈັດຕັ້ງປະຕິບັດທ່າມກາງການແຜ່ລະບາດຂອງພະຍາດໂຄວິດ-19 ແຕ່ດ້ວຍການຊີ້ນຳ-ນຳພາຢ່າງໃກ້ສິດຂອງຄະນະນຳຂັ້ນແຂວງ.

ການຈັດຕັ້ງປະຕິບັດມີຜົນສຳເລັດຫຼາຍດ້ານ ສະແດງໃຫ້ເຫັນການລົງທຶນພາກເອກະຊົນຢູ່ແຂວງອຸດົມໄຊ ໄດ້ 88 ໂຄງການ ມີມູນຄ່າການລົງທຶນ ທັງໝົດ 441,19 ຕື້ກີບ ທຽບໃສ່ແຜນປະຕິບັດໄດ້ 63,94% ໃນນີ້ ມີການລົງທຶນໃນກິດຈະການບັນຊີຄວບຄຸມ ແລະ ສຳປະທານຂອງຂະແໜງແຜນການ ແລະ ການລົງທຶນ 7 ໂຄງການ ມູນຄ່າການລົງທຶນ 102,68 ຕື້ກີບ ໃນນີ້ຂະແໜງການບໍລິການ ມີ 2 ໂຄງການ ມູນຄ່າການລົງທຶນ 54 ຕື້ກີບ, ຂະແໜງກະສິກຳ ແລະປ່າໄມ້ ມີ 3ໂຄງການ ມູນຄ່າການລົງທຶນ 26,51 ຕື້ກີບ ແລະ ຂະແໜງພະລັງງານ ແລະ ບໍ່ແຮ່ ມີ 2 ໂຄງການ ມູນຄ່າການລົງທຶນ 22,17 ຕື້ກີບ, ການລົງທຶນໃນກິດຈະການທົ່ວໄປຂອງຂະແໜງອຸດສາຫະກຳ ແລະ ການຄ້າ ມີ 81 ໂຄງການ ມີມູນຄ່າຈົດທະບຽນ 338,51 ຕື້ກີບ ໂດຍການລົງທຶນທັງໝົດໄດ້ມີການຊຸກຢູ້ ແລະປະເມີນການລົງທຶນຂອງພາກເອກະຊົນໃນທົ່ວແຂວງ ໃຫ້ຈັດຕັ້ງປະຕິບັດຢ່າງມີປະສິດທິຜົນສູງ ແລະເຄື່ອນໄຫວຖືກຕ້ອງ, ສອດຄ່ອງ ຕາມກົດໝາຍ ແລະ ລະບຽບການ ຂອງ ສປປ ລາວ. ພ້ອມນີ້ ໄດ້ປັບປຸງວຽກງານບໍລິການ ການລົງທຶນປະຕູດຽວ ເພື່ອໃຫ້ກົນໄກການປະສານງານໃນການດຳເນີນທຸລະກິດຂອງນັກລົງທຶນມີຄວາມປອດໄພ, ສະດວກ ແລະວ່ອງໄວຂຶ້ນ.


ກອງປະຊຸມຈັດຂຶ້ນຢູ່ທີ່ພະແນກແຜນການ ແລະການລົງທຶນແຂວງ ໃນວັນທີ່ 2 ກໍລະກົດນີ້ ໂດຍການເປັນປະທານຂອງ ທ່ານ ບຸນຄົງ ຫຼ້າຈຽບພອນ ເຈົ້າແຂວງອຸດົມໄຊ, ມີເຈົ້າເມືອງ-ຮອງເຈົ້າເມືອງ 7ເມືອງ, ພະແນກການ, ອົງການ ແລະຂະແໜງການກ່ຽວຂ້ອງ ເຂົ້າຮ່ວມ.

ພາບ-ຂ່າວ: ແສງອາທິດ