ມີເດຍລາວແຂວງເຊກອງ ໂດຍ: ພອນ ບຸນອຸທິດ
ເພື່ອເຮັດໃຫ້ບັນລຸຄາດໝາຍທີ່ວາງໄວ້,ສັງຄົມມີຄວາມສະຫງົບປອດໄພ ແລະ ຊີວິດການເປັນຢູ່ຂອງພໍ່ແມ່ປະຊາຊົນ ໄດ້ຮັບການພັດທະນາດີຂຶ້ນ ຫຼາຍວຽກງານຕ້ອງໄດ້ຮັບການຈັດຕັ້ງປະຕິບັດໃນຕໍ່ໜ້າ ທ່ານ ຄໍາສອນ ກອນເຍີ ຮອງເຈົ້າແຂວງໆເຊກອງ ມີຄຳເຫັນຕໍ່ກອງປະຊຸມເຜີຍແຜ່ວຽກງານ ຕ້ານ ແລະ ສະກັດກັ້ນບັນຫາສິ່ງເສບຕິດ ຢູ່ເມືອງທ່າແຕງ ທີ່ໄດ້ຈັດຂຶ້ນໃນວັນທີ 1 ກໍລະກົດ 2021 ນີ້ ທີ່ສະໂມສອນຂອງເມືອງ.

ທ່ານໄດ້ຍົກໃຫ້ເຫັນເຖິງຄວາມໝາຍຂອງສິ່ງເສບຕິດ,ທີ່ມາ,ປະເພດ,ໄລຍະການອອກລິດ,ຜົນຮ້າຍຂອງສິ່ງເສບຕິດທີ່ມີຕໍ່ຜູ້ຜະລິດ,ຜູ້ຄ້າຂາຍ,ຄອບຄົວ,ຜູ້ເສບ,ສັງຄົມ ແລະ ຕໍ່ປະເທດຊາດບ້ານເມືອງ,ການຕ້ານ,ຄວບຄຸມພະຍາດໂຄວິດ-19 ເຫຼົ່ານີ້ເປັນຕົ້ນ,ເຖິງວ່າໄລຍະ 1 ປີປ່ານມາມີຫຼາຍວຽກງານໄດ້ຮັບການແກ້ໄຂ ແລະ ປັບປຸງໃຫ້ດີຂຶ້ນ ແຕ່ກໍ່ຍັງມີຂໍ້ຄົງຄ້າງຈຳນວນໜຶ່ງທີ່ຖືກສະເໜີ ເພື່ອເປັນການແລກປ່ຽນບົດຮຽນ ແລະ ຊອກວິທີແກ້ໄຂໃນຕໍ່ໜ້ານັ້ນ.

ທ່ານຮອງເຈົ້າແຂວງເຊກອງ ເນັ້ນໃຫ້ຄະນະກໍາມະການຂັ້ນເມືອງເອົາໃຈໃສ່ຕ້ານ ແລະ ສະກັດກັ້ນບັນຫາສິ່ງເສບຕິດຕ່າງໆໃຫ້ໝົດໄປ ໂດຍສະເພາະ ຕ້ອງຫັນເອົາແນວທາງນະໂຍບາຍຂອງພັກ-ລັດ,ລະບຽບການຕ່າງໆທີ່ກ່ຽວຂ້ອງລົງຜັນຂະຫຍາຍຢູ່ແຕ່ລະບ້ານ,ແຕ່ລະໂຮງຮຽນຢ່າງກວ້າງຂວາງ,ເຮັດໃຫ້ວຽກງານປ້ອງກັນຊາດ-ປ້ອງກັນຄວາມສະຫງົບຂອງພັກໃນທົ່ວສັງຄົມໃຫ້ເລິກເຊິ່ງ,ຮັບປະກັນໃຫ້ເມືອງ ທ່າແຕງ ມີສະຖຽນລະພາບທາງດ້ານການເມືອງ,ມີຄວາມສະຫງົບປອດໄພ,ສະກັດກັ້ນ ແລະ ຕີຖອຍບັນດາປະກົດການຫຍໍ້ທໍ້ໃນສັງຄົມໃຫ້ຫຼຸດໜ້ອຍຖອຍລົງນັ້ນ ຮຽກຮ້ອງມາຍັງຄະນະຮັບຜິດຊອບ

ພ້ອມດ້ວຍນ້ອງນັກຮຽນຜູ້ທີ່ເປັນໜໍ່ແໜງຂອງປະເທດຊາດ,ເປັນອະນາຄົດຂອງຊາດ ຈົ່ງຢ່າໄດ້ໄປຫຍຸ້ງກ່ຽວກັບສິ່ງເສບຕິດຢ່າງເດັດຂາດ ເພື່ອເປັນການທົດສອບຄວາມຮັບຮູ້,ຄວາມເຂົ້າໃຈຂອງນ້ອງນັກຮຽນ ເພື່ອນໍາໄປຈັດຕັ້ງປະຕິບັດໃນຊີວິດຕົວຈິງໃຫ້ປອດໄພ,ບໍ່ໃຫ້ຕົກເປັນທາດຂອງສິ່ງເສບຕິດ,ບໍ່ຫຍຸ້ງກ່ຽວພົວພັນກັບສິ່ງເສບຕິດ ແລະ ຫ່າງໄກຈາກສິ່ງເສບຕິດທຸກປະເພດດັ່ງຄຳຂວັນທີວ່າ: ສິ່ງເສບຕິດເປັນຜິດຕໍ່ຮ່າງກາຍ,ເປັນອັນຕະລາຍຕໍ່ສັ່ງຄົມ,ຜູ້ເສບຕາຍ,ຜູ້ຂາຍຕິດຄຸກ. ເພື່ອເຮັດໃຫ້ມີສະຕິເຄົາລົບຕໍ່ກົດໝາຍ,ຮູ້ໄດ້ເຖິງຜົນຮ້າຍຂອງສິ່ງເສບຕິດ,ວິທີປ້ອງກັນ ແລະ ແກ້ໄຂບັນຫາສິ່ງເສບຕິດ,ພ້ອມທັງເຮັດໃຫ້ເຂົາເຈົ້າມີຄວາມມຕື່ນຕົວ ແລະ ເຂົ້າມາມີສ່ວນຮ່ວມໃນການປ້ອງກັນ ໂດຍແນໃສ່ເພື່ອສະກັດກັ້ນ ແລະ ແກ້ໄຂບັນຫາສິ່ງເສບຕິດໃນສັງຄົມໃຫ້ຫຼຸດໜ້ອຍຖອຍລົງເທື່ອລະກ້າວ.