ບ້ານສົບຮາວ ເມືອງສົບເບົາ ແຂວງຫົວພັນ ຕັ້ງຢູ່ຫ່າງຈາກເທດສະບານແຂວງ ປະມານ 60 ກິໂລແມັດ ມີ 142 ຫຼັງຄາເຮືອນ, ພົນລະເມືອງ 725 ຄົນ ຍິງ 385 ຄົນ, ປະກອບມີ 2 ເຜົ່າຄື: ເຜົ່າລາວ ແລະ ເຜົ່າໄຕແດງ ອາຊີບຕົ້ນຕໍແມ່ນເຮັດນາ, ລ້ຽງສັດ, ຄ້າຂາຍຍ່ອຍ ແລະ ເອົາການຕໍ່າຫູກທໍ    ໄໝ, ປູກພືດລະດູແລ້ງເປັນສິນຄ້າ ເປັນອາຊີບສຳຮອງ.

ທ່ານ ນ. ສ້ຽນລາວັນ ຮອງນາຍບ້ານ-ບ້ານສົບຮາວ ໃຫ້ສຳພາດວ່າ: ບ້ານສົບຮາວ ເປັນຈຸດພົບກັນລະຫວ່າງນໍ້າຮາວ ແລະ ນໍ້າມ່າ, ມີອາກາດຮ້ອນຊຸ່ມ ເໝາະແກ່ການປູກຝັງ-ລ້ຽງສັດ ປະຊາຊົນເຄີຍມີມູນເຊື້ອດຸໝັ່ນ ອອກແຮງເພີ່ມພູນຜະລິດຜົນ – ລ້ຽງຊີບມາແຕ່ດົນນານ. ໄລຍະຜ່ານມາ ຄະນະພັກ-ອຳນາດການປົກຄອງບ້ານ ໄດ້ນຳພາປະຊາຊົນເອົາໃຈໃສ່ພັດທະນາຊີວິດການເປັນຢູ່ ຕາມແຜນພັດທະນາ ເສດຖະກິດ-ສັງຄົມຂອງບ້ານໃນແຕ່ລະໄລຍະ ມາຮອດປັດຈຸບັນ ທົ່ວບ້ານ ສາມາດກາຍເປັນຄອບຄົວພົ້ນທຸກແລ້ວ 100% ແລະ ຄອບຄົວແບບຢ່າງໄດ້ເພີ່ມຂຶ້ນໃນແຕ່ລະປີ ເປັນຕົ້ນແມ່ນ: ແບບຢ່າງດ້ານການປູກພືດເປັນສິນຄ້າ, ລ້ຽງສັດໃຫຍ່-ສັດນ້ອຍ ແລະ ການຄ້າຂາຍບໍລິການ. ປັດຈຸບັນ ບ້ານສົບຮາວມີເນື້ອທີ່ນາທັງໝົດ 137 ເຮັກຕາເຄິ່ງ ໃນນີ້ ເນື້ອທີ່ນາຕີ່ 87 ເຮັກຕາເຄິ່ງ ແລະ ເນື້ອທີ່ນາລວມ 50 ເຮັກຕາ, ເຮັດນາ 2 ລະດູຄື: ເຮັດນາປີ ແລະ ນາແຊງ, ສະມັດຕະພາບໄດ້ 3-4 ໂຕນຕໍ່ເຮັກຕາ; ມີສັດລ້ຽງປະເພດງົວ-ຄວາຍ 450 ໂຕ, ສັດປີກ 1500 ກວ່າໂຕ, ມີຄອບຄົວແບບຢ່າງລ້ຽງປາໃນໜອງ 3 ຄອບຄົວ, ໂຮງງານຂະໜາດນ້ອຍສ່ວນບຸກຄົນ 6 ໂຮງງານ ແລະ ຮ້ານຂາຍເຄື່ອງ 10 ຮ້ານ ເຮັດໃຫ້ຊີວິດການເປັນຢູ່ຂອງປະຊາຊົນພາຍໃນບ້ານດີຂຶ້ນເທື່ອລະກ້າວ. ໃນປີຜ່ານມາ ບ້ານສົບຮາວ ສ້າງລາຍຮັບເຂົ້າບ້ານໄດ້ຈາກການປູກຝັງ-ລ້ຽງສັດ ແລະ ການຄ້າຂາຍບໍລິການຕ່າງໆ ທັງໝົດ 4 ຕື້ 800 ລ້ານກວ່າກີບ ສະເລ່ຍໃສ່ຫົວຄົນໄດ້ 6 ລ້ານກວ່າກີບຕໍ່ຄົນຕໍ່ປີ. ທົ່ວບ້ານມີລົດໃຫຍ່ 30 ຄັນ, ລົດຈັກ 150 ຄັນ,  ລົດໄຖນາ 142 ຄັນ, ຈັກຟາດເຂົ້າ 70 ເຄື່ອງ, ໂຮງສີເຂົ້າຂະໜາດນ້ອຍ 142 ເຄື່ອງ.

ຈາກສິ່ງທີ່ເອື້ອອຳນວຍຄວາມສະດວກ ໃຫ້ແກ່ການພັດທະນາເສດຖະກິດ-ສັງຄົມຂອງບ້ານແລ້ວ ບັນຫາທີ່ເປັນອຸປະສັກໃນການດຳລົງຊີວິດໃນປັດຈຸບັນແມ່ນ ນໍ້າກິນ-ນໍ້າໃຊ້ ທີ່ນຳໃຊ້ເຂົ້າໃນຄົວເຮືອນ ຍັງບໍໄດ້ສຸຂະອະນາໄມ, ຈຸດຖີ້ມຂີ້ເຫຍື້ອຍັງບໍ່ໄດ້ມາດຕະຖານ. ສຳລັບທິດທາງແຜນການໃນຕໍ່ໜ້າ  ຄະນະພັກ-ອຳນາດການປົກຄອງບ້ານ ຈະໄດ້ເອົາໃຈໃສ່ຊຸກຍູ້-ນຳພາ ປະຊາຊົນພາຍໃນບ້ານ ສືບຕໍ່ເພີ່ມທະວີຄວາມສາມັກຄີກັນໃຫ້ແໜ້ນແຟ້ນ, ເອົາໃຈໃສ່ສ້າງລາຍຮັບເຂົ້າຄອບຄົວໃຫ້ຫຼາຍກວ່າເກົ່າ ໂດຍເລັ່ງໃສ່ ເພີ່ມສະມັດຕະພາບດ້ານການປູກ-ການລ້ຽງ, ຕໍ່າຫູກທໍໄໝ ແລະ ຄ້າຂາຍບໍລິການໃຫ້ສູງຂຶ້້ນ.

ຂ່າວ-ພາບ: ອາລຸນໄຊ