ມີເດຍລາວແຂວງບໍ່ແກ້ວ ວັນທີ 1 ກໍລະກົດນີ້ ທ່ານ ດຣ ຄໍາຜະຫຍາ ພົມປັນຍາ ຄະນະປະຈໍາພັກແຂວງ ຮອງເຈົ້າແຂວງໆ ບໍ່ແກ້ວ ໄດ້ລົງພົບປະພະນັກງານຊຸດບຳລຸງກົດໝາຍ 45 ວັນຊຸດທີ່ 1 ຂອງເມືອງເມິງ, ຢູ່ທີ່ຫ້ອງປະຊຸມກອງບັນຊາການ ປກສ ເມືອງ,ໂດຍມີບັນດາທ່ານ ຄະນະນຳຂອງແຂວງ-ຂອງເມືອງ ພ້ອມດ້ວຍສຳມະນາກອນຊຸດບຳລຸງກົດໝາຍ 45 ວັນເຂົ້າຮ່ວມຮັບຟັງ.

ໂອກາດທີ່ລົງພົບປະຊຸດບຳລຸງກົດໝາຍ 45 ວັນ ທີ່ ເມືອງເມິງຄັ້ງນີ້ ດຣ ຄໍາຜະຫຍາ ພົມປັນຍາ ຄະນະປະຈຳພັກແຂວງ ຮອງເຈົ້າແຂວງບໍ່ແກ້ວ ສະແດງຄຳຍ້ອງຍໍຊົມເຊີຍບັນດາຄະນະພັກຄະນະນຳ ແລະ ພະນັກງານໃນແຕ່ລະພາກສ່ວນພາຍໃນເມືອງ ທີ່ໄດ້ມີຄວາມຕັດສິນໃຈສູງ ເພື່ອເຂົ້າຝຶກອົບຮົມກົດໝາຍໄລຍະສັ້ນ 45 ວັນ ຕາມທີ່ພັກ-ລັດຂັ້ນເທິງໄດ້ກຳໜົດອອກມາ ເພື່ອເປັນແນວທາງເຮັດໃຫ້ພະນັກງານຫຼັກແຫຼ່ງນຳພາ ແລະ ພະນັກງານສືບທອດຂອງເມືອງໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງກ່ຽວກັບກົດໝາຍ,

ໂດຍສະເພາະແມ່ນການບຳລຸງ ສ້າງບຸກຄະລາກອນທາງດ້ານຄຸນສົມບັດສິນທຳປະຕິວັດ,ຄວບຄູ່ກັບການບຳລຸງທາງດ້ານວິຊາສະເພາະ,ທາງດ້ານທິດສະດີ ແລະ ກົດໝາຍ ເພື່ອແນໃສ່ເພີ່ມປະສິດທິພາບໃນການຄຸ້ມຄອງລັດ-ຄຸ້ມຄອງກົດໝາຍ ຄຽງຄູ່ກັບດ້ານເສດຖະກິດ-ສັງຄົມ,ຮັບປະກັນຄວາມສະເໝີພາບທາງດ້ານກົດໝາຍຕໍ່ພົນລະເມືອງ,ສັງຄົມມີຄວາມຍຸຕິທຳ.
ພ້ອມດຽວກັນນີ້ ທ່ານຍັງໄດ້ກ່າວເນັ້ນໜັກໃຫ້ຄະນະນໍາຂອງເມືອງ ແລະ ຄະນະຮັບຜິດຊອບບຳລຸງກົດໝາຍ 45 ວັນ ຊຸດທີ 1 ຂອງເມືອງ ຈົ່ງພາກັນສືບຕໍ່ເປັນເຈົ້າການ ຊີ້ນຳໆພາຊຸດບຳລຸງກົດໝາຍໃນຄັ້ງນີ້ໃຫ້ສຳເລັດຕາມລະດັບຄາດໝາຍທີ່ວາງໄວ້.