ມີເດຍລາວແຂວງ ໄຊສົມບູນ ບັນນາທິການ ຂ່າວ ນາງຕູດ ຄໍາພໍໃຈ.
ກອງປະຊຸມຄົບຄະນະບໍລິຫານງານພັກແຂວງໄຊສົມບູນ ຄັ້ງທີ 4 ສະໄໝທີ I ໄດ້ສໍາເລັດລົງຢ່າງຈົບງາມ ໃນຕອນບ່າຍ ຂອງວັນ 2 ກໍລະກົດ 2021 ນີ້ ທີ່ສະໂມສອນເມືອງອະນຸວົງ ພາຍຫລັງທີ່ໄດ້ດໍາເນີນ ມາເປັນເວລາສອງວັນເຕັມ ໂດຍການ ເປັນປະທານຂອງສະຫາຍ ພົຕ ຄໍາລຽງ ອຸທະໄກສອນ, ກຳມະການສູນກາງພັກ, ເລຂາພັກແຂວງໄຊສົມບູນ, ມີຮອງເລຂາພັກ ແຂວງ, ປະທານສະພາປະຊາຊົນແຂວງ, ຮອງເຈົ້າແຂວງ, ຄະນະປະຈຳພັກແຂວງ, ກຳມະການພັກແຂວງ, ພ້ອມດ້ວຍເລຂາໜ່ວຍ ພັກພະແນການ – ອົງການກົມກອງອ້ອມຂ້າງແຂວງ ແລະ ເລຂາພັກເມືອງທັງ 5 ເມືອງ ເຂົ້າຮ່ວມ.

ຕະຫຼອດໄລຍະ 2 ວັນເຕັມ ຂອງການດຳເນີນກອງປະຊຸມ ບັນດາຜູ້ເຂົ້າຮ່ວມໄດ້ຮັບຟັງການລາຍງານ ຊີ້ແຈ້ງ ,ປະກອບ ຄໍາເຫັນໃສ່ໜ້າວຽກງານດ້ານຕ່າງໆໃຫ້ມີຄວາມເປັນເອກະພາບ ໃນໄລຍະ 6 ເດືອນຜ່ານມາ ກໍສາມາດເຫັນໄດ້ໄດ້ຜົນເລັດ ຫລາຍດ້ານ ຄ່ຽງຄູ່ກັບຜົນສໍາເລັດ ດັ່ງກ່າວນີ້ ກໍຍັງເຫັນດ້ານອ່ອນ ແລະ ຂໍ້ຄົງຄ້າງບາງບັນຫາທີ່ຈະໄດ້ປັບປຸງຈັດຕັ້ງປະຕິບັດ ທິດທາງແຜນງານວຽກງານຈຸດສຸມ ປະຈໍາ 6 ເດືອນທ້າຍປີ 2021 ຊຶ່ງໃນນີ້ຈະໄດ້ສືບຕໍ່ສຶກສາອົບຮົມການເມືອງ-ແນວຄິດ ໃຫ້ຖັນແຖວສະມາຊິກພັກ, ພະນັກງານ-ລັດຖະກອນ, ທະຫານ, ຕໍາຫຼວດ ແລະ ປະຊາຊົນບັນດາເຜົ່າ ໃຫ້ທົ່ວເຖິງ, ເລີກເຊິ່ງ ແລະ ມີຄຸນນະພາບກວ່າເກົ່າ, ຖືເອົາວຽກງານການເມືອງ-ແນວຄິດເປັນກົກ ທີ່ຕິດພັນກັບການຈັດຕັ້ງປະຕິບັດ ແນວທາງນະໂຍ ບາຍຂອງພັກ, ລະບຽບກົດໝາຍຂອງລັດ, ໂດຍສະເພາະແມ່ນໃຫ້ເຊື່ອມຊຶມ, ກໍາແໜ້ນ ແລະ ເປັນເຈົ້າການຜັນຂະຫຍາຍ ມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ອົງຄະນະພັກແຂວງໄຊສົມບູນ ສະໄໝທີ I ແລະ ມະຕິກອງ ປະຊຸມໃຫຍ່ຂອງບັນດາເມືອງ ເວົ້າລວມເວົ້າ ສະເພາະ ແມ່ນແຜນວຽກຈຸດສຸມປີ 2021 ໃຫ້ ບັນລຸຕາມ ຄາດໝາຍທີ່ວາງໄວ້.

ພ້ອມນີ້ ວຽກງານປ້ອງກັນຊາດ-ປ້ອງກັນຄວາມສະຫງົບ ກໍ່ຕ້ອງສຸມໃສ່ໃຫ້ມີຄວາມ ສະຫງົບປອດໄພ, ໜັກແໜ້ນ ແລະ ເປັນລະບຽບຮຽບຮ້ອຍໂດຍພຶ້ນຖານ. ພ້ອມທັງສຸມໃສ່ຫັນເອົາພະ ນັກງານລົງ ກໍ່ສ້າງຮາກຖານການເມືອງ ໃນ 12 ບ້ານຈຸດສຸມ, ໂດຍນໍາເອົາແນວທາງ ປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານຂອງພັກ ລົງໄປຜັນຂະຫຍາຍຈັດຕັ້ງປະຕິບັດ ຢູ່ຂັ້ນບ້ານໃຫ້ປະກົດຜົນເປັນຈິງ ແລະ ໃຫ້ມີຄຸນນະ ພາບກວ່າເກົ່າ, ນອກນີ້ກໍ່ຈະໄດ້ສືບຕໍ່ເພີ່ມທະວີສຸມໃສ່ຊີ້ນໍາວຽກງານ ກໍ່ສ້າງພັກ-ພະນັກງານໃຫ້ຈົດຈໍ່ ແລະ ແຂງແຮງ ກວ່າເກົ່າ ຊຶ່ງສຸມໃສ່ນໍາພາການສ້າງໜ່ວຍພັກປອດໃສ່, ເຂັ້ມແຂງ, ໜັກແໜ້ນ, ກໍ່ສ້າງ ແລະ ຂະຫຍາຍພັກໃຫ້ມີຄຸນນະພາບ ໂດຍຢືດໝັ້ນ 5 ຫຼັກການ 3 ທິດຊີ້ນໍາ ໃນການປັບປຸງ ແລະ ກໍ່ສ້າງພັກ ຕາມກົດລະບຽບພັກວາງອອກຢ່າງເຂັ້ມງວດ. ນອກນີ້ວຽກງານດ້ານອື່ນໆ ກໍຈະໄດ້ສືບຕໍ່ຈັດຕັ້ງປະຕິບັດ ໃຫ້ບັນລຸຕາມແຜນທີ່ໄດ້ ກໍານົດໄວ້.

ໃນໂອກາດກ່າວປິດກອງປະຊຸມ ສະຫາຍ ພົຕ ຄຳລຽງ ອຸທະໄກສອນ ໄດ້ເນັ້ນໜັກບັນດາຜູ້ແທນກອງປະຊຸມ ຈົ່ງສືບຕໍ່ ສຶກສາອົບຮົມການເມືອງແນວຄິດໃຫ້ພະນັກງານ-ລັດຖະກອນ ເປັນວຽກກົກ ໂດຍໃຫ້ຄະນະພັກ ແຕ່ລະຂັ້ນເອົາໃຈໃສ່ຊີ້ ນໍາ-ນໍາພາ ໜ່ວຍພັກຢ່າງໃກ້ຊິດ ໃນການຮ່ວມຊີວິດພັກແຕ່ລະເດືອນໃຫ້ເປັນປົກກະຕິ ໂດຍສຸມໃສ່ຊີ້ນໍາຈັດຕັ້ງປະຕິບັດ ແຜນພັດທະນາ ເສດຖະກິດ-ສັງຄົມ ປະຈໍາປີ 2021 ໃຫ້ບັນລຸຕາມແຜນການທີ່ວາງໄວ້ ຊຶ່ງຕິດພັນກັບການຜັນຂະຫຍາຍດໍາລັດ 414/ລບ ໃຫ້ເຂົ້າສູ່ ລວງເລິກ ແລະ ມີຜົນສໍາເລັດຕົວຈິງ ຕາມ 5 ທ່າແຮງຍຸດທະສາດການພັດທະນາ ຂອງແຂວງວາງອອກ. ສໍາລັບວຽກ ງານແກ້ໄຂ ຄວາມທຸກຍາກ ຂອງແຂວງໄຊສົມບູນ ກໍໃຫ້ຈັດຕັ້ງປະຕິບັດໃຫ້ໄດ້ຮັບຜົນດີ, ພ້ອມນັ້ນ ກໍໃຫ້ສືບ ຕໍ່ຈັດຕັ້ງປະຕິບັດ ໃນການລົງສຶກສາອົບຮົມການເມືອງ ແນວຄິດໃຫ້ປະຊາຊົນ ບັນດາເຜົ່າໄດ້ຮັບຮູ້ ແລະ ເຂົ້າໃຈກ່ຽວກັບແນວທາງນະໂຍບາຍ ຂອງພັກ-ກົດໝາຍຂອງລັດ ໃນການພັດທະນາເສດຖະກິດ-ສັງຄົມ 5 ປີ ຄັ້ງທີ 2 ຂອງແຂວງ ຕາມເປົ່າໝາຍ, ທິດທາງ ແລະ ມາດຕະການ ໃນສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວ ໜ່ວຍພັດທະນາ ໃນອານາຄົດ.