ພິທີສະຫຼຸບຂະວນການແຂ່ງຂັນ 5 ເປັນເຈົ້າ ຂອງກຳມະບານຮາກຖານພະແນກສາທາລະນະສຸກແຂວງອຸດົມໄຊ ໄດ້ຈັດຂຶ້ນໃນຕອນບ່າຍຂອງວັນທີ 2 ກໍລະກົດນີ້ ທີ່ຫ້ອງປະຊຸມພະແນກດັ່ງກ່າວ ໂດຍການເປັນປະທານຂອງສະຫາຍ ບຸນຊູ ວິໄລສຸກ ເລຂາກຳມະບານຮາກຖານພະແນກສາທາລະນະສຸກ   ເປັນກຽດເຂົ້າຮ່ວມມີສະຫາຍ ໄຊພອນ ຖົມປະດິດ ປະທານສະຫະພັນກຳມະບານແຂວງ, ມີ ດຣ ຄຳວິງ ຮົງດາລາ ຄະນະພັກຮາກຖານ, ຮອງຫົວຫນ້າພະແນກສາທາລະນະສຸກແຂວງ ພ້ອມດ້ວຍສະມາຊິກກຳມະບານພາຍໃນກຳມະບານຮາກຖານ ພະແນກເຂົ້າຮ່ວມຢ່າງພ້ອມພຽງ.

        ພິທີແມ່ນໄດ້ຮັບຟັງການຜ່ານບົດສະຫລຸບຂະບວນການແຂ່ງຂັນ 5 ເປັນເຈົ້າ, ທິດທາງແຜນການ ແລະ ມະຕິຂໍ້ແຂ່ງຂັນໃນສົກປີຕໍ່ຫນ້າ, ໃນໄລຍະຜ່ານມາກຳມະບານຮາກຖານພະແນກສາທາລະນະສຸກ ໄດ້ຈັດຕັ້ງປະຕິບັດຂໍ້ແຂ່ງຂັນ 5 ເປັນເຈົ້າ ມີຫລາຍດ້ານທີ່ພົ້ນເດັ່ນ ແລະ ບັນລຸຕາມລະດັບຄາດຫມາຍທີກຳນົດໄວ້, ສະມາຊິກກຳມະບານໄດ້ປະຕິບັດຕາມພາລະ, ບົດບາດ, ສິດ, ຫນ້າທີ່, ດ້ານດີຜົນງານ, ດ້ານອ່ອນຂໍ້ຄົງຄ້າງທີ່ຈະຕ້ອງໄດ້ສຸມໃສ່ແກ້ໄຂໃນຕໍ່ຫນ້າ.

ຜົນງານການຈັດຕັ້ງປະຕິບັດຂໍ້ແຂ່ງຂັນ 5 ເປັນເຈົ້າ ໄດ້ສະແດງອອກມີສະມາຊິກກຳມະບານໄດ້ຮັບການຍ້ອງຍໍປະເພດ 1 ທັງຫມົດ ຈຳນວນ 85 ສະຫາຍ, ຍິງ 36 ສະຫາຍ ແລະ ໄດ້ຮັບໃບຢັ້ງຢືນກຳມະບານ 5 ເປັນເຈົ້າ ຕື່ມອີກ. ໃຫ້ກຽດມອບໂດຍແມ່ນ ສະຫາຍ ໄຊພອນ ຖົມປະດິດ ປະທານສະຫະພັນກຳມະບານແຂວງ.

ໂອກາດນີ້ ສະຫາຍ ໄຊພອນ ຖົມປະດິດ ປະທານສະຫະພັນກຳມະບານແຂວງ ຍັງໄດ້ໃຫ້ກຽດໂອ້ລົມກ່ອນອື່ນສະຫາຍໄດ້ກ່າວຍ້ອງຍໍຊົມເຊີຍຕໍ່ຜົນງານທີ່ຄະນະກຳມະບານຮາກຖານສາມາດຍາດມາໄດ້ຕາມເປົ້າຫມາຍທີ່ກຳນົດໄວ້ ພ້ອມທັງຮຽກຮ້ອງໃຫ້ສະມາຊິກກຳມະບານພາຍໃນຮາກຖານ ຈົ່ງພ້ອມກັນປະຕິບັດມະຕິຂໍ້ແຂ່ງຂັນທີ່ກຳນົດໄວ້ໃຫ້ປະກົດຜົນເປັນຈິງ.