ໃນຕອນເຊົ້າຂອງວັນທີ 2 ກໍລະກົດ 2021 ຫ້ອງວ່າການແຂວງອັດຕະປື ໄດ້ຈັດກອງປະຊຸມສະຫຼຸບວຽກງານ 6 ເດືອນຕົ້ນປີ ແລະ ວາງທິດທາງແຜນການ 6 ເດືອນທ້າຍປີ 2021 ທີ່ຫ້ອງປະຊຸມຊັ້ນ5 ສໍານັກງານອົງການປົກຄອງແຂວງ, ໂດຍການເປັນປະທານຂອງ ທ່ານ ສຸລິຈັນ ພອນແກ້ວ ກໍາມະການພັກແຂວງ, ເລຂາຄະນະພັກຮາກຖານ ຫົວໜ້າຫ້ອງວ່າການແຂວງ, ມີບັນດາທ່ານຄະນະຫ້ອງວ່າການແຂວງ, ຫົວໜ້າຫ້ອງວ່າການ 5 ເມືອງ, ຫົວໜ້າຂະແໜງຂຶ້ນກັບຫ້ອງວ່າແຂວງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ ຢ່າງພ້ອມພຽງ.
ກອງປະຊຸມຄັ້ງນີ້, ແມ່ນເພື່ອຄົ້ນຄວ້າປຶກສາຫາລືວຽກງານຮອບດ້ານຂອງຫ້ອງວ່າການແຂວງ ໃນໄລຍະຜ່ານມາ ຊຶງພ້ອມກັນຕີລາຄາຄືນຜົນສໍາເລັດໃນການຈັດຕັ້ງປະຕິບັດວຽກງານ ເປັນຕົ້ນແມ່ນຂໍ້ສະດວກ, ຂໍ້ຄົງຄ້າງ, ສິ່ງທ້າຍທ້າຍຕ່າງໆ ແລະ ທິດທາງແຜນການ 6 ເດືອນທ້າຍປີ ໃຫ້ມີປະສິດທິຜົນດີຂຶ້ນ.


ໂອກາດທີ່ສະຫງ່າລາສີນີ້ ທ່ານ ນາງ ບັນໄດ ໄຊຍະສິດ ຮອງຫົວໜ້າຫ້ອງວ່າການ ໄດ້ຂຶ້ນຜ່ານບົດສະຫລຸບການຈັດຕັ້ງປະຕິບັດວຽກງານຮອບດ້ານ ຂອງຫ້ອງວ່າການແຂວງ ປະຈໍາ 6 ເດືອນຕົ້ນປີ ແລະ ທິດທາງແຜນການປະຈໍາ 6 ເດືອນທ້າຍປີ 2021. ຊຶ່ງຕະຫລອດໄລຍະ 6 ເດືອນຜ່ານມາ ດ້ານການເມືອງແນວຄິດ ພະນັກງານລັດຖະກອນພາຍໃນຫ້ອງວ່າການແຂວງ ຍັງຮັກສາໄດ້ຄຸນທາດການເມືອງໜັກແໜ້ນ, ມີຄວາມຮັບຜິດຊອບສູງຕໍ່ໜ້າທີ່ວຽກງານ, ສາມາດເຮັດຫຼ້ອນໜ້າທີ່ ແລະ ຮັກສາໄດ້ຄວາມສາມັກຄີພາຍໃນ-ພາຍນອກຢ່າງແໜ້ນແຟ້ນ; ດ້ານແບບແຜນວິທີເຮັດວຽກແມ່ນປະຕິບັດຕາມຫຼັກການລວມສູນປະຊາທິປະໄຕ ແບ່ງງານ-ແບ່ງຄວາມຮັບຜິດຊອບຢ່າງຈະແຈ້ງ, ປະຕິບັດສຽງສ່ວນໜ້ອຍຂຶ້ນກັບສຽງສ່ວນຫຼາຍ, ບຸກຄົນຂຶ້ນກັບການຈັດຕັ້ງ ແລະ ຂັ້ນລຸ່ມຂັ້ນກັບຂັ້ນເທິງ ອັນເຮັດໃຫ້ການປະຕິບັດວຽກງານມີຄວາມຄ່ອງຕົວໂລ່ງລ່ຽນ, ວຽກງານວິຊາສະເພາະ ເປັນຕົ້ນ: ວຽກເສນາທິການ, ວຽກປະສານງານ ແລະ ວຽກບໍລິຫານ-ບໍລິການຮັບໃຊ້ການນໍາ ກໍ່ໄດ້ເຄື່ອນໄຫວປະຕິບັດຢ່າງຕັ້ງໜ້າ ແລະ ແຂງແຮງ, ຕອບສະໜອງໄດ້ຕໍ່ຄວາມຮຽກຮ້ອງຕ້ອງການຂອງການນໍາ ກໍ່ຄືໜ້າທີ່ວຽກງານໄດ້ເປັນຢ່າງດີ. ເພື່ອສືບຕໍ່ຍົກສູງບົດບາດວຽກງານງານວິຊາສະເພາະ, ສິດ ແລະ ໜ້າທີ່ຂອງຫ້ອງວ່າການແຂວງ ທິດທາງແຜນການໃນ 6 ເດືອນທ້າຍປີ ຈະໄດ້ສຸມໃສ່ສືບຕໍ່ຈັດຕັ້ງເຄື່ອນໄຫວສຶກສາອົບຮົມການເມືອງ-ແນວຄິດໃຫ້ຖັນແຖວພະນັກງານພາຍໃນຫ້ອງວ່າການແຂວງ ໃຫ້ເລິກເຊິ່ງເຖິງຖອ່ງເປັນປົກກະຕິ; ປັບປຸງກົນໄກການເຮັດວຽກໃຫ້ຄ່ອງຕົວ ແລະ ສືບຕໍ່ປະຕິບັດພາລະບົດບາດ, ສິດ ແລະ ໜ້າທີ່ການເຄື່ອນໄຫວຂອງຫ້ອງວ່າການແຂວງ ໃຫ້ເຂັ້ມງວດ ແລະ ແຂງແຮງຂຶ້ນຕື່ມ; ສູ້ຊົນຜັນຂະຫຍາຍມະຕິ, ຄໍາສັ່ງ ຂອງຂັ້ນເທິງ, ຍົກສູງປະສິດທິພາບ ແລະ ປະສິດທິຜົນໃນການເຮັດວຽກງານຂອງພະນັກງານລັດຖະກອນໃຫ້ສູງຂຶ້ນ. ໂອກາດດຽວກັນນີ້, ຜູ້ເຂົ້າຮ່ວມກອງປະຊຸມຍັງໄດ້ພ້ອມກັນປະກອບຄໍາຄິດເຫັນ ປຶກສາຫລືກັນຢ່າງກົນໄປ-ກົງມາ ເພື່ອໃຫ້ເປັນທິດທາງລວມ ໃນການປັບປຸງການຈັດຕັ້ງປະຕິບັດວຽກງານຂອງຫ້ອງວ່າການແຂວງ ໃນຕໍ່ໜ້າໃຫ້ໄດ້ຮັບຜົນດີຍິ່ງໆຂຶ້ນ


ໃນຕອນທ້າຍຂອງກອງປະຊຸມ ທ່ານ ສຸລິຈັນ ພອນແກ້ວ ກໍາມະການພັກແຂວງ, ຫົວໜ້າຫ້ອງວ່າການແຂວງ ໄດ້ມີຄໍາເຫັນໂອ້ລົມ ເຊິ່ງກ່ອນອື່ນທ່ານໄດ້ຍ້ອງຍໍຊົມເຊີຍຕໍ່ຜົນງານໃນການຈັດຕັ້ງປະຕິບັດວຽກງານ ໄລຍະຜ່ານມາ ແລະ ຮຽກຮ້ອງໃຫ້ຄະນະພັກ, ຄະນະຫ້ອງວ່າການແຂວງ ແລະ ພະນັກງານທັງໝົດພາຍໃນຫ້ອງວ່າການແຂວງ ສືບຕໍ່ຮັກສາມູນເຊື້ອຜົນສຳເລັດຂອງວຽກງານຕົນ, ພ້ອມກັນເອົາໃຈໃສ່ໃນໜ້າທີ່ວຽກງານ ແລະ ເພີ່ມຄວາມຮັບຜິດຊອບຂອງຕົນເອງ, ປະຕິບັດສິດໜ້າທີ່ເປັນເສນາທິການໃຫ້ແກ່ການນຳ 3 ດີ, 4 ມີ ແລະ 5 ສ ໃຫ້ດີຂຶ້ນກວ່າເກົ່າ, ພ້ອມກັນວາງແຜນແກ້ໄຂຈຸດຄົງຄ້າງ ແລະ ສູ້ຊົນຈັດຕັ້ງປະຕິບັດທິດທາງແຜນການ 6 ເດືອນທ້າຍປີ 2021 ໃຫ້ມີຜົນສຳເລັດຕາມຄາດໝາຍ.
ພາບ-ຂ່າວ: ຫ້ອງວ່າການແຂວງ