ເນື່ອງໃນໂອກາດວັນສ້າງຕັ້ງພັກຄອມມູນິດຈີນຄົບຮອບ100 ປີ(01 ກໍລະກົດ 1921-01 ກໍລະກົດ2021);ທ່ານສະຫວັນຄອນຣາຊມຸນຕີປະທານສະມາຄົມນັກຂ່າວແຫ່ງສປປລາວໄດ້ສົ່ງສານຊົມເຊີຍໄປຍັງຄູ່ຮ່ວມຕໍາແໜ່ງ ທ່ານຊາງຢັນນອງປະທານສະມາຄົມນັກຂ່າວແຫ່ງປະເທດຈີນ ໂດຍມີເນື້ອໃນວ່າ: ຕາງໜ້າໃຫ້ສະມາຄົມນັກຂ່າວແຫ່ງສປປລາວແລະໃນນາມສ່ວນຕົວຂ້າພະເຈົ້າ ຂໍຖືເປັນກຽດສົ່ງຄວາມຊົມເຊີຍຢ່າງອົບອຸ່ນແລະອວຍພອນໄຊອັນປະເສີດມາຍັງທ່ານແລະສົ່ງຜ່ານທ່ານໄປຍັງສະມາຊິກສະມາຄົມນັກຂ່າວລວມທັງປະຊາຊົນຈີນທຸກທົ່ວໜ້າຈົ່ງມີສຸຂະພາບເຂັ້ມແຂງແລະມີຄວາມຜາສຸກ.

ນັບແຕ່ມື້ສ້າງຕັ້ງພັກກອມມູນິດຈີນ, ພັກໄດ້ເຕີບໃຫຍ່ເຂັ້ມແຂງຢ່າງຍໍ່ຢຸດຢັ້ງແລະນໍາພາປະຊາຊົນຈີນຜ່ານຜ່າການທົດສອບທີ່ດຸເດືອດຂ້ຽວຂາດໃນແປວໄຟປະຕິວັດ, ສ້າງວິລະກຳອັນລໍ້າເລີດແລະຍາດໄດ້ໄຊຊະນະອັນໃຫຍ່ຫຼວງ, ມີຄວາມໝາຍປະຫວັດສາດ, ເຮັດສໍາເລັດການປະຕິວັດປົດປ່ອຍຊາດແລະສະຖາປະນາສາທາລະນະລັດປະຊາຊົນຈີນຢ່າງສະຫງ່າຜ່າເຜີຍໃນປີ 1949, ອັນນີ້ໄດ້ເປີດສັງກາດໃໝ່ແຫ່ງການສ້າງສາພັດທະນາປະເທດຊາດຕາມເສັ້ນທາງສັງຄົມນິຍົມ.

      ບົນພື້ນຖານອັນໜັກແໜ້ນເຫຼົ່ານີ້ແມ່ນໄດ້ສືບຕໍ່ພັດທະນາລະບອບສັງຄົມນິຍົມຕາມລັກສະນະສີສັນຂອງຈີນ, ພາຍໃຕ້ການນໍາພາຂອງພັກກອມມູນິດຈີນແລະການຊີ້ນໍາບັນຊາໂດຍກົງຂອງເລຂາທິການໃຫຍ່ແລະປະທານປະເທດແຫ່ງສປຈີນ,ທ່ານສີຈີ້ນຜິງໄດ້ເຮັດໃຫ້ປະເທດຈີນມີການພັດທະນາຢ່າງຮອບດ້ານດ້ວຍຄຸນນະພາບໃໝ່ແລະເຮັດໃຫ້ບົດບາດອິດທິພົນຂອງຈີນນັບມື້ສູງເດັ່ນຂຶ້ນໃນເວທີພາກພື້ນແລະສາກົນ.

ຕະຫຼອດຫຼາຍປີຜ່ານມາ;ວຽກງານສື່ມວນຊົນພາຍໃຕ້ການນໍາພາຂອງທ່ານ, ອົງການສື່ມວນຊົນຂອງພວກເຮົາທັງສອງໄດ້ຮັບໝາກຜົນດ້ວຍຄວາມປິຕິຍິນດີໃນການຮ່ວມມືໃນຖານະເພື່ອນມິດສະຫາຍເກົ່າ. ສະນັ້ນ, ຂ້າພະເຈົ້າເຊື່ອໝັ້ນວ່ານີ້ຈະຊ່ວຍຜູກແໜ້ນແລະພັດທະນາພັດທະນາຮ່ວມກັນໃນອະນາຄົດຕໍ່ໄປ ແລະ ຫວັງວ່າຈະໄດ້ຮ່ວມກິດຈະກໍາຕ່າງໆລວມທັງການແລກປ່ຽນການຢ້ຽມຢາມ, ການຝຶກອົບຮົມພາຍຫຼັງທີ່ບໍ່ມີການລະບາດຂອງພະຍາດໂຄວິດ.

ຕາມແຫຼ່ງຂ່າວຈາກວິທະຍຸສາກົນແຫ່ງ ປະເທດຈີນ(CRI)ປະຈໍາລາວ ເມື່ອບໍ່ດົນມານີ້ວ່າ: ທ່ານປະທານສະມາຄົມນັກຂ່າວແຫ່ງສປປລາວຍັງໄດ້ຢ້ຽມຢາມສໍານັກງານCRI ປະຈໍາລາວ ທີ່ນະຄອນຫຼວງວຽງຈັນ ແລະ ໄດ້ໃຫ້ການສໍາພາດຕໍ່ນັກຂ່າວ CRI ປະຈໍາລາວວ່າ: ພາຍໃຕ້ການນໍາພາຂອງພັກກອມມູນິດຈີນ, ການພັດທະນາຊົນນະບົດຂອງຈີນໄດ້ຮັບຜົນສໍາເລັດອັນໃຫຍ່ຫຼວງທຸກດ້ານ. ສໍາຄັນສປຈີນມີຄວາມເຕີບໃຫຍ່ເຂັ້ມແຂງນໍາໜ້າຂອງໂລກໃນຫຼາຍໆດ້ານພາຍໃຕ້ການນໍາພາຂອງພັກກອມມູນິດຈີນທີ່ມີອາຍຸຄົບຮອບ 100 ປີ. ອັນນີ້ສະແດງເຖິງຄວາມເຂັ້ມແຂງຂອງການນໍາພາຂອງພັກທີ່ມີທ່ານສີຈິ້ນຜິງເປັນເລຂາທິການໃຫຍ່,ປະທານປະເທດ. ແນວຄິດຂອງເພິ່ນມີຄວາມມຸ້ງຫວັງຢາກໃຫ້ໂລກມີສັນຕິພາບ,ມີຄວາມວັດທະນາຖາວອນ,ມີການພັດທະນາແບບຍືນຍົງ, ມີຄວາມຮຸ່ງເຮືອງແລະມີການເປີດກວ້າງໃຫ້ມີການຮ່ວມມືກັນຫຼາຍໆດ້ານ.

ຕໍ່ການພົວພັນລາວ-ຈີນ, ທ່ານສະຫວັນຄອນຣາຊມຸນຕີກ່າວວ່າ: ການພົວພັນລາວ-ຈີນນັບມື້ຂະຫຍາຍຕົວເຂົ້າສູ່ລວງເລິກ,ການພົວພັນໃນດ້ານພັກ-ລັດແລະປະຊາຊົນກໍ່ມີການພົວພັນທີ່ກວ້າງຂວາງ,ການໄປມາຫາສູ່ກໍ່ຖືວ່ານັບມື້ນັບເພີ່ມຂຶ້ນເປັນຕົ້ນໃນໄລຍະທີ່ສປປລາວກໍ່ຄືໂລກທີ່ມີການແຜ່ລະບາດຂອງພະຍາດໂຄວິດ-19 ກໍ່ຍັງແມ່ນສປຈີນທີ່ຢູ່ຄຽງຂ້າງປະຊາຊົນລາວ, ໄດ້ຊ່ວຍເຫຼືອປະຊາຊົນລາວໃນການຕ້ານກັບພະຍາດໂຄວິດ-19 ດ້ວຍຜົນສໍາເລັດໂດຍສະເພາະໃນປີ 2021,ສປຈີນຍັງໄດ້ສຸມໃສ່ໃຫ້ການຊ່ວຍເຫຼືອຕໍ່ສປປລາວໂດຍດ່ວນ.

ໃນດ້ານການຮ່ວມມືລະຫວ່າງສື່ມວນຊົນລາວແລະສື່ມວນຊົນຈີນກໍ່ເຊັ່ນດຽວກັບຂະແໜງການອື່ນໆ. ທ່ານສະຫວັນຄອນຣາຊມຸນຕີໄດ້ກ່າວວ່າ: ສື່ມວນຊົນລາວ-ຈີນໂດຍສະເພາະ CRI ປະຈໍາລາວກໍ່ໄດ້ເຮັດໜ້າທີ່ຕິດຕາມທຸກການປ່ຽນແປງໃນການພັດທະນາຢູ່ລາວແລະລາຍງານໃຫ້ປະຊາຊົນຢູ່ພາຍໃນກໍ່ຄືຕ່າງປະເທດຮັບຮູ້ຜົນສໍາເລັດຂອງການພັດທະນາສປປລາວຜ່ານວິທະຍຸ CRI ຂອງຈີນໄດ້ເຮັດໜ້າທີ່ລາຍງານທຸກການປ່ຽນແປງຂອງສປປລາວໃຫ້ຊາວຈີນແລະຊາວໂລກໄດ້ຮັບຮູ້ໂດຍຜ່ານພາສາລາວອັນນີ້ເປັນການປະກອບສ່ວນບົນຈິດໃຈຄູ່ຮ່ວມຊາຕາກໍາດ້ານວຽກງານສື່ສານມວນຊົນ.

Medialaos MMD (ແຫຼ່ງຂໍ້ມູນຈາກ: ສຂລ)