ຫຼາຍທ່ານສ່ອງແສງມາຄໍລໍາພວກເຮົາເລື່ອງຂໍ້ມູນຫຼາຍຢ່າງທີ່ເຫັນໃນໜ້າເຟສບຸກ ໂດຍສະເພາະແມ່ນຂໍ້ມູນ ກ່ຽວກັບພະຍາດໂຄວິດ-19 ສະນັ້ນ ຈື່ງຢາກແລກປ່ຽນກັບຜູ້ໃຊ້ເຟສບຸກທັງຫຼາຍວ່າ: ກ່ອນຈະໂພສຂໍ້ມູນຫັຍງກໍ່ຊ່າງ? ຕ້ອງເຂົ້າໃຈວ່າມັນໄປທົ່ວໂລກ ດັ່ງນັ້ນກ່ອນໂພສຕ້ອງຄິດຫງຳຄັກແນ່ວ່າ ສີ່ງນັ້ນມັນມີຜົນດີ-ຜົນຮ້າຍຫັຍງແດ່? ຕໍ່ສັງຄົມສາທາລະນະໃນໄລຍະສັ້ນ ແລະ ໄລຍະຍາວ.

ວິກິດການໃນຄັ້ງນີ້ມັນໜັກໜາກ່ວາຄາດໄວ້; ບັນດາຂໍ້ມູນທີ່ທ່ານໂພສອອກ ອັນສ້າງຜົນກະທົບໃນທາງບວກ ຫຼື ລົບ ຫາກແມ່ນທາງລົບມັນຈະເຮັດໃຫ້ຜູ້ຄົນໃນສັງຄົມເກີດຄວາມຕົກໃຈ; ຢ້ານກົວ; ໂກດແຄ້ນ; ຊີງຊັງ ແລະ ຫົດຫູ່ທາງຈິດໃຈ.. ອາລົມເຫຼົ່ານີ້ອາດຈະເກີດຂື້ນກັບບາງຄົນໃນສາທາລະນະແລ້ວສົ່ງຜົນຕໍ່ທັດສະນະຄະຕິ, ພຶດຕິກຳ ຂອງຜູ້ຄົນໃນສັງຄົມເຮັດໃຫ້ສັງຄົມປັ່ນປ່ວນ.

ເຫດການແຜ່ລະບາດຂອງພະຍາດໂຄວິດ-19 ມັນເປັນວິກິດການທົ່ວໂລກ ທີ່ຈະຕ້ອງມີວິທີການແກ້ໄຂສະຖານະການ ແລະ ການສື່ສານສາທາລະນະ (ສື່ອອນລາຍ) ເພື່ອໃຫ້ຄົນທົ່ວໄປໄດ້ຕິດຕາມສະຖານະການຢ່າງໃກ້ຊິດ ເພື່ອສາມາດລອດພົ້ນຈາກໄພອັນຕະລາຍໃນຄັ້ງນີ້ ສະນັ້ນ ສື່ອອນລາຍຕ້ອງນຳສະເໜີຂໍ້ມູນທີ່ເປັນຈີງ, ບໍ່ບິດເບືອນ, ບໍ່ຕົວະຍົວະຫຼອກລວງ, ຂໍ້ມູນນັ້ນຕ້ອງເອົາຈາກຄະນະສະເພາະກິດທໍ່ນັ້ນ ເຊັ່ນວ່າ: Timeline ຂອງຜູ້ຕິດເຊື້ອ, ການຕິດເຊື້ອເປັນຈຸ້ມ (Clusters) ຕ້ອງເວົ້າ ຕ້ອງສະເໜີໃຫ້ລະອຽດ-ຈະແຈ້ງ ເຊີ່ງຄະນະສະເພາະກິດເພີ່ນຖະແຫຼງໃຫ້ຊາບໃນແຕ່ລະມື້.

ດັ່ງກໍລະນີ ເພີ່ນປະກາດ Lock Down ຕໍ່ຕາມແຈ້ງການ ເລກທີ 745/ຫສນຍ ລົງວັນທີ 4 ກໍລະກົດ 2021 ກໍ່ມີມາດຕະການສືບຕໍ່ປະຕິບັດ ແລະ ມາດຕະການຜ່ອນຜັນ ໂດຍມີ 8 ຂໍ້ສືບຕໍ່ ແລະ ຜ່ອນຜັນ 13 ຂໍ້ ສະນັ້ນ ຕ້ອງອ່ານໃຫ້ລະອຽດໃຫ້ເຂົ້າໃຈຈື່ງໂພສຕໍ່ ຫຼື ຢາກມີຄຳເຫັນຫັຍງຕື່ມ ກໍ່ຕ້ອງອີງໃສ່ແຈ້ງການນີ້ເພື່ອໃຫ້ຄົນທົ່ວໄປເຂົ້າໃຈ ເວລານີ້ສັງຄົມຕ້ອງການຄວາມສາມັກຄີປອງດອງ; ຕ້ອງການກຳລັງໃຈ ສະນັ້ນ ຕ້ອງຮູ້ຖະໜອມນໍ້າໃຈເຊີ່ງກັນ ແລະ ກັນ; ໃຫ້ອະໄພກັນ; ສັງຄົມຈື່ງຈະຢູ່ເຢັນເປັນສຸກ.

ໃນແຈ້ງການສືບຕໍ່ Lock Down ນັ້ນທາງຫ້ອງວ່າການສຳນັກງານນາຍົກລັດຖະມົນຕີ ເພີ່ນກໍ່ຖືເປັນກຽດແຈ້ງໃຫ້ຊາບວ່າ: “ອີງຕາມຜົນການປະເມີນສະພາບການລະບາດຂອງພະຍາດໂຄວິດ-19 ໃນຄັ້ງວັນທີ 2 ກໍລະກົດ 2021 ແລະ ການຈັດຕັ້ງປະຕິບັດມາດຕະການຕ່າງໆ ໃນຄຳສັ່ງຂອງນາຍົກລັດຖະມົນຕີ ສະບັບເລກທີ 15/ນຍ ລົງວັນທີ 21 ເມສາ 2021 ແຈ້ງການສະບັບເລກທີ 67/ຫສນຍ ລົງວັນທີ 19 ມິຖຸນາ 2021 ແລະ ມາດຕະການຕ່າງໆ ທີ່ໄດ້ວາງອອກ ເຫັນວ່າພວກເຮົາສາມາດຄວບຄຸມການລະບາດໄດ້ໃນລະດັບໜື່ງ ເຮັດໃຫ້ຕົວເລກຜູ້ຕິດເຊື້ອພາຍໃນປະເທດຫຼຸດລົງ ໂດຍສະເພາະໃນນະຄອນຫຼວງວຽງຈັນ ແຕ່ເຖີງຢ່າງໃດກໍ່ຕາມບາງປະເທດອ້ອມຂ້າງ ກໍ່ຍັງປະເຊີນໜ້າກັບການລະບາດຮອບໃໝ່, ມີຈຳນວນຜູ້ຕິດເຊື້ອ ແລະ ຜູ້ເສຍຊີວິດເພີ່ມຂື້ນໃນແຕ່ລະວັນ ຍີ່ງໄປກ່ວານັ້ນຍັງພົບເຫັນສາຍພັນໃໝ່ ທີ່ສາມາດແຜ່ເຊື້ອໄດ້ໄວ ແລະ ປັດຈຸບັນກໍ່ພົບຜູ້ຕິດເຊື້ອສາຍພັນເດວຕາ ໃນ ສປປລາວ ຊື່ງເປັນກໍລະນີນຳເຂົ້າ. ຕໍ່ສະພາບການດັ່ງກ່າວເຫັນວ່າປະເທດເຮົາຍັງມີຄວາມສ່ຽງ ເນື່ອງຈາກວ່າບາງປະເທດໃກ້ຄຽງທີ່ມີການລະ ບາດໃນຊຸມຊົນ ມີມາດຕະການປິດກິດຈະການໃນບາງແຂວງ ເຮັດໃຫ້ແຮງງານລາວເດີນທາງກັບຫຼາຍປະເທດ ສະນັ້ນ ພວກເຮົາຕ້ອງສືບຕໍ່ກະກຽມຄວາມພ້ອມຮອບດ້ານເພື່ອຮອງຮັບ ແລະ ເຝົ້າລະວັງຕາມເຂດຊາຍແດນຢ່າງເຂັ້ມງວດ ເພື່ອສະກັດກັ້ນການລັກລອບເຂົ້າເມືອງ ພ້ອມກັນນັ້ນ ເພື່ອຫຼຸດຜ່ອນຜົນກະທົບດ້ານເສດຖະກິດ-ສັງຄົມ ແລະ ບັນລຸຄາດໝາຍໃນການຄວບຄຸມການລະບາດ ເຮັດໃຫ້ມີຜູ້ຕິດເຊື້ອພະຍາດໂຄວິດ-19 ແລະ ຜູ້ເສຍຊີວິດໜ້ອຍທີ່ສຸດ ແລະ ໃຫ້ສັງຄົມໄດ້ຫັນໄປສູ່ການດຳລົງຊີວິດປົກກະຕິ ພາຍໃຕ້ເງື່ອນໄຂວິຖີຊີວິດປົກກະຕິໃໝ່ (New Normal) ໄດ້ໄວ ແລະ ທົ່ວເຖີງລັດຖະບານ ຈຳເປັນຕ້ອງໄດ້ສືບຕໍ່ປະຕິບັດມາດຕະການທີ່ໄດ້ລະບຸໃນຄຳສັ່ງ ສະບັບເລກທີ 15/ນຍ ລົງວັນທີ 21 ເມສາ 2021 ແຈ້ງການ ສະບັບເລກທີ 671/ຫສນຍ ລົງວັນທີ 19 ມິຖຸນາ 2021 ແລະ ບັນດາຄຳແນະນຳຂອງຄະນະສະເພາະກິດຂັ້ນສູນກາງ ອອກໄປຕື່ມອີກ 15 ວັນ ໂດຍເລີ່ມແຕ່ເວລາ 00:00 ໂມງ ຂອງວັນທີ 5 ກໍລະກົດ ຫາເວລາ 24:00 ໂມງ ຂອງວັນທີ 16 ກໍລະກົດ 2021”.

ຂໍຮຽກຮ້ອງໃຫ້ຜູ້ໃຊ້ເຟສບຸກ; ເຈົ້າຂອງສື່ອອນລາຍທັງຫຼາຍຈົ່ງຍົກສູງມາລະຍາດໃນເວລາໃຊ້ຂໍ້ມູນຕ່າງໆ ເຖົ້າແກ່ບູຮານເຄີຍສັ່ງສອນໄວ້ວ່າ: “ກິລິຍາບອກຊາດ ມາລະຍາດບອກຕະກູນ” ສະນັ້ນ ສີ່ງທີ່ທ່ານໂພສຂື້ນມັນສະແດງໃຫ້ເຫັນຕົວຕົນທີ່ແທ້ຈີງຂອງທ່ານ; ວົງຕະກູນຂອງທ່ານ ຂໍສະເໜີແລກປ່ຽນ.

ທິດດີ