ມີເດຍລາວແຂວງບໍ່ແກ້ວ ພາບ-ຂ່າວ: ຄໍາຜົງ ຟອງສະຫວ່າງ
ໃນວັນທີ 05 ກໍລະກົດ 2021 ນີ້. ຄະນະບໍລິຫານງານຊາວໜຸ່ມແຂວງ ບໍ່ແກ້ວ ຮ່ວມກັບສະມາ ຄົມນັກທຸລະກິດໜຸ່ມແຂວງ ບໍ່ແກ້ວ ໄດ້ລົງເຄື່ອນໄຫວມອບເຄື່ອງຊ່ວຍເຫຼືອຜູ້ປະສົບໄພພິບັດ (ນໍ້າຖ້ວມ) ຢູ່ເມືອງ ຜາອຸດົມ ໃນກາງເດືອນ ມິຖຸນາ ທີ່ຜ່ານມາ. ເຊິ່ງນໍາໂດຍທ່ານ ນາງ ດວງຕາ ໄຊຍະຫົງ ຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ ກຳມະການພັກແຂວງ ເລຂາຄະນະບໍລິຫານງານຊາວໜຸ່ມແຂວງ ບໍ່ແກ້ວ, ມີທ່ານ ເກັ່ງ ຢ່າງ ຄະນະສະມາຄົມນັກທຸລະກິດໜຸ່ມ, ໂດຍການຕ້ອນຮັບຂອງທ່ານ ພັທ ຄໍາເພັດ ຮັກຂັນສາ ຄະນະປະຈໍາພັກເມືອງ ຫົວໜ້າກອງບັນຊາການທະຫານເມືອງ ພ້ອມດ້ວຍທີມງານຂອງເມືອງ.

ເຄື່ອງອຸປະໂພກ ບໍລິໂພກ ທີນໍາມາມອບໃນຄັ້ງນີ້ລວມມີ ເຂົ້າສານ-ອາຫານແຫ້ງ, ຜ້າອັດປາກ-ດັງ, ເຄື່ອງນຸ່ງຫົ່ມ, ປະເພດເຄື່ອງໃຊ້ໃນຄົວເຮືອນ ແລະ ອື່ນໆ. ເຊິ່ງລວມເປັນມູນຄ່າທັງໝົດ 6.874.000 ກີບ. ເຄື່ອງດັງກ່າວແມ່ນນໍາມາມອບໃຫ້ແກ່ວຽງພັດທະນາ ແລະ ໂຮມສຸກ ເມືອງ ຜາອຸດົມ. ທັງນີ້, ກໍເພື່ອເປັນຂວັນກໍາລັງໃຈ ແລະ ບັນເທົ່າທຸກໃນເບື້ອງຕົ້ນໃຫ້ກັບພໍ່ແມ່ປະຊາຊົນຜູ້ທີຖືກຜົນກະທົບຈາກໄພພິບັດດັງກ່າວ.

ໂອກາດນີ້, ທ່ານ ພັທ ຄໍາເພັດ ຮັກຂັນສາ ຄະນະປະຈໍາພັກເມືອງ ໄດ້ກ່າວຄໍາຂອບໃຈມາຍັງຄະນະບໍລິຫານງານຊາວໜຸ່ມແຂວງ ແລະ ສະມາຄົມນັກທຸລະກິດໝຸ່ມທຸກທ່ານ ທີມີຄວາມເປັນຫວງເປັນໃຍຕໍ່ກັບຊີວິດຂອງປະຊາຊົນ ເວົ້າລວມເວົ້າສະເພາະກໍ່ຄືປະຊາຊົນຜູ້ທີຖືກເຄາະຮ້າຍດັ່ງກ່າວ ແລະ ຈະນໍາເອົາການຊ່ວຍເຫຼືອໃນຄັ້ງນີ້ໄປໜູນໃຊ້ເຂົ້າໃນຊີວິດປະຈໍາວັນໃຫ້ເກີດຜົນປະໂຫຍດສູງສຸດ.