ມີເດຍລາວແຂວງເຊກອງ ຂ່າວ:ພຸດທະສອນ ໜ່ວຍພັກບໍລິຫານ, ກວດກາ ແລະແຜນການ-ການເງິນ, ໜ່ວຍພັກຂົນສົ່ງ, ຄຸ້ມຄອງພາຫະນະ, ເຄຫາ-ຜັງເມືອງ, ນໍ້າປະປາ ແລະໜ່ວຍພັກທາງບົກ-ທາງນໍ້າ ທີ່ຂຶ້ນກັບຄະນະພັກຮາກຖານພະແນກໂຍທາທິການ ແລະຂົນສົ່ງ (ຍທຂ) ແຂວງເຊກອງ ໄດ້ຮັບໃບຢັ້ງຢືນໜ່ວຍພັກປອດໃສ ເຂັ້ມແຂງ ໜັກແໜ້ນປະຈໍາປີ 2020 ໃນວັນທີ 5 ກໍລະກົດ 2021 ເປັນກຽດເຂົ້າຮ່ວມ ຂອງສະຫາຍ ບຸນຫຼາຍ ບຸດທິ ຄະນະປະຈໍາພັກແຂວງ, ຫົວໜ້າຄະນະຈັດຕັ້ງແຂວງ, ມີສະຫາຍ ບຸນທະວີ ນະຄອນສິດ ກໍາມະການພັກແຂວງ, ເລຂາຄະນະພັກຮາກຖານ, ຫົວໜ້າພະແນກ ຍທຂ, ບັນດາສະຫາຍຄະນະພັກຮາກຖານ, ຄະນະໜ່ວຍພັກ, ສະມາຊິກພັກ ທັງ 3 ໜ່ວຍພັກ ແລະແຂກຖືກເຊີນເຂົ້າຮ່ວມ.

ໃນພິທີ ບັນດາສະຫາຍເລຂາໜ່ວຍພັກ ທັງ 3 ໜ່ວຍພັກ, ກໍໄດ້ຂຶ້ນຜ່ານບົດສະຫຼຸບຕີລາຄາຜົນສໍາເລັດຂອງການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນປະຈໍາປີ 2020 ແລະຜ່ານທິດທາງແຜນການກໍ່ສ້າງໜ່ວຍພັກປອດໃສ , ເຂັ້ມແຂງ, ໜັກແໜ້ນ ປະຈໍາປີ 2021 ຂອງຕົນ, ເຊິ່ງຕະຫຼອດໄລຍະ 1 ປີຜ່ານມາ ຄະນະໜ່ວຍພັກແຕ່ລະໜ່ວຍພັກ ໄດ້ເອົາໃຈໃສ່ໃນການສຶກສາອົບຮົມການເມືອງ-ແນວຄິດໃຫ້ແກ່ບັນດາສະມາຊິກພັກ, ພະນັກງານລັດຖະກອນໃນຂົງເຂດຕົນຢ່າງເປັນປົກກຕິ, ໂດຍແນໃສ່ເຮັດໃຫ້ສະມາຊິກພັກຮັບຮູ້, ເຂົ້າໃຈຢ່າງເລິກເຊິ່ງຕໍ່ແນວທາງນະໂຍບາຍ, ມະຕິຄໍາສັງຕ່າງໆຂອງພັກ, ເປັນເຈົ້າການນໍາພາ-ຊີ້ນໍາ ສະມາຊິກພັກ, ພະນັກງານປະຕິບັດໜ້າທີ່ວຽກງານຂອງຕົນດ້ວຍຄວາມຮັບຜິດຊອບສູງ ແລະສາມາດຍາດໄດ້ຜົນສໍາເລັດໃນຫຼາຍດ້ານຄື: ວຽກງານດ້ານການເມືອງ, ດ້ານແນວຄິດ, ດ້ານການຈັດຕັ້ງ, ດ້ານແບບແຜນການນໍາພາ ແລະດ້ານການນໍາພາປະຕິບັດໜ້າທີ່ການເມືອງ.

ຫຼັງຈາກນັ້ນ ຕາງໜ້າຄະນະຈັດຕັ້ງແຂວງ ກໍໄດ້ຂຶ້ນຜ່ານມະຕິຕົກລົງຂອງຄະນະປະຈໍາພັກແຂວງ ວ່າດ້ວຍຮັບຮອງເອົາໜ່ວຍພັກບໍລິຫານ, ກວດກາ ແລະແຜນການ-ການເງິນ, ໜ່ວຍພັກຂົນສົ່ງ, ຄຸ້ມຄອງພາຫະນະ, ເຄຫາ-ຜັງເມືອງ, ນໍ້າປະປາ ແລະໜ່ວຍພັກທາງບົກ-ທາງນໍ້າ ທີ່ຂຶ້ນກັບຄະນະພັກຮາກຖານພະແນກ ຍທຂ ເປັນໜ່ວຍພັກ ປອດໃສ ເຂັ້ມແຂງ ໜັກແໜ້ນປະຈໍາປີ 2020 ແລະຮັບຮອງແຜນການກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນປະຈໍາປີ 2021.

ຕອນທ້າຍ ສະຫາຍ ບຸນຫຼາຍ ບຸດທິ ກໍໄດ້ມີຄໍາເຫັນໂອ້ລົມຕໍ່ຄະນະພັກຮາກຖານ, ຄະນະໜ່ວຍພັກ ເປັນຕົ້ນໃຫ້ຕິດຕາມ ກວດກາການປະເມີນທາບທາມການກໍ່ສ້າງພະນັກງານສືບທອດປ່ຽນແທນ, ການກໍ່ສ້າງພັກ-ພະນັກງານ, ການຂະຫຍາຍພັກ ໃຫ້ມີຄຸນນະພາບ ຕິດພັນກັບສະພາບຄວາມເປັນຈິງ, ພ້ອມທັງໄດ້ຊີ້ນໍາຫຼາຍບັນຫາໃຫ້ຄະນະພັກ, ສະມາຊິກພັກ-ພະນັກງານພະແນກ ຍທຂ ນໍາໄປຜັນຂະຫຍາຍ ແລະປະຕິບັດ ແນໃສ່ເຮັດໃຫ້ແຜນການກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈໍາປີ 2021 ຕິດພັນກັບການປະຕິບັດວຽກງານວິຊາສະເພາະ ທີ່ຢູ່ໃນຄວາມຮັບຜິດຊອບຂອງຕົນ ມີຜົນສໍາເລັດໃໝ່ທີ່ດີຂຶ້ນກວ່າເກົ່າ.