ມີເດຍລາວແຂວງ ຄຳມ່ວນ ໃນວັນທີ 5 ກໍລະກົດ 2021 ນີ້ ທ່ານ ນາງ ສູນທອນ ໄຊຍະຈັກ ເລຂາທິການສູນກາງພັກ, ຮອງປະທານສະພາແຫ່ງຊາດ ພ້ອມດ້ວຍຄະນະ ໄດ້ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຄຳມ່ວນ ເພື່ອຕິດຕາມ, ຊີ້ນຳການຈັດຕັ້ງເຊື່ອມຊຶມ ແລະ ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ. ເຂົ້າຮ່ວມຕ້ອນຮັບ ແລະ ເຮັດວຽກຮ່ວມນຳຄະນະໃນຄັ້ງນີ້ໂດຍມີ ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ, ທ່ານ ບຸນມີ ພິມມະສອນ ປະທານສະພາປະຊາຊົນແຂວງ, ມີບັນດາຫົວໜ້າ – ຮອງຫົວໜ້າພະແນກການ, ສະພາປະຊາຊົນແຂວງ ແລະ ພະນັກງານນຳພາຫຼັກແຫຼ່ງເຂົ້າຮ່ວມ.

ໂອກາດດັ່ງກ່າວ ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນໄດ້ກ່າວລາຍງານ ກ່ຽວກັບການຈັດຕັ້ງເຊື່ອມຊຶມຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ແຜນພັດທະນາເສດຖະກິດ – ສັງຄົມແຫ່ງຊາດ 05 ປີ ຄັ້ງທີ IX. ການຈັດຕັ້ງປະຕິບັດແຜນພັດທະນາເສດຖະກິດ – ສັງຄົມຂອງແຂວງ ແລະ ສະພາບການຈັດຕັ້ງປະຕິບັດມາດຕະການປ້ອງກັນ, ຄວບຄຸມ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ຢູ່ແຂວງຄຳມ່ວນ ໃນໄລຍະຜ່ານມາໂດຍສັງເຂບ.

ສະເພາະການຈັດຕັ້ງການເຜີຍແຜ່, ເຊື່ອມຊຶມ ມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະ ມະຕິກອງປະຊຸມໃຫຍ່ ຄັ້ງທີ X ຂອງອົງຄະນະພັກແຂວງແມ່ນໄດ້ຈັດຕັ້ງຜັນຂະຫຍາຍສໍາເລັດແລ້ວ ເຊິ່ງມີຜູ້ເຂົ້າຮ່ວມທັງໝົດ 6.235 ສະຫາຍ, ຍິງ 1.911 ສະຫາຍ. ຜ່ານການຄົ້ນຄວ້າ, ເຊື່ອມຊຶມມະຕິຂອງພັກ ໄດ້ເຮັດໃຫ້ຄະນະພັກທຸກຂັ້ນ, ສະມາຊິກພັກ – ພະນັກງານທຸກສະຫາຍ ມີຄວາມຮັບຮູ້ ແລະ ເຂົ້າໃຈແຈ້ງຕໍ່ໝາກຜົນສໍາເລັດໃນການຊີ້ນໍາ-ນໍາພາຂອງພັກ, ລັດຖະບານ – ອົງການປົກຄອງ ໃນການສືບຕໍ່ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະ ມະຕິກອງປະຊຸມໃຫຍ່ ຄັັ້ງທີ X ຂອງອົງຄະນະພັກແຂວງໄດ້ຢ່າງເລິກເຊິ່ງກວ່າເກົ່າ, ມີຄວາມເປັນເອກະພາບຕໍ່ແນວທາງຂອງພັກທີ່ວາງອອກເຫັນໄດ້ຄວາມຖືກຕ້ອງ, ປະດິດສ້າງ, ແທດຕົວຈິງກັບກາລະໂອກາດ ສະພາບຂອງໂລກປະຈຸບັນ ກໍ່ຄືທີ່ຕັ້ງພູມສາດຄວາມອຸດົມສົມບູນ, ຊັບພະຍາກອນ ທຳມະຊາດ ແລະ ມູນ ເຊື້ອປະຊາຊົນລາວບັນດາເຜົ່າເວົ້າລວມ, ເວົ້າສະເພາະຢູ່ພາຍໃນແຂວງຄຳມ່ວນ. ນອກນັ້ນ, ຍັງໄດ້ຮັບຟັງຜົນສຳເລັດກອງປະຊຸມຄັ້ງປະຖົມມະລືກຂອງ ສພຂ ຊຸດທີ II, ປະກາດການຈັດຕັ້ງ ຄະນະປະທານສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 12 ແຂວງຄຳມ່ວນ.

ຈາກນັ້ນ ທ່ານ ນາງ ສູນທອນ ໄຊຍະຈັກ ກໍ່ໄດ້ກ່າວສະແດງຂອບໃຈມາຍັງຄະນະນຳຂອງແຂວງຄຳມ່ວນທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ສະແດງຄວາມຊົມເຊີຍຕໍ່ຜົນສຳເລັດໂດຍພື້ນຖານໃນການຈັດຕັ້ງເຊື່ອມຊຶມ ແລະ ຜັນຂະຫຍາຍເນື້ອໃນສຳຄັນຂອງພັກຄັ້ງນີ້ ຄຽງຄູ່ກັນນັ້ນຍັງຕ້ອງໄດ້ເອົາໃຈໃສ່ຕື່ມບາງບັນຫາໃນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI, ສືບຕໍ່ຈັດຕັ້ງເຊື່ອມຊຶມກໍາແໜ້ນ ແລະ ຜັນຂະຫຍາຍບັນດາທິດຊີ້ນໍາ, ມະຕິ, ຄໍາສັ່ງ ຕ່າງໆ ຂອງພັກ, ລັດຖະບານ ກໍ່ຄືຂອງແຂວງ ໃຫ້ເລິກເຊິ່ງ ທົ່ວເຖິງ ແລະ ໜັກແໜ້ນ ສູ່ການຈັດຕັ້ງປະຕິບັດຕົວຈິງຢູ່ບັນດາຂະແໜງການ, ເພີ່ມທະວີການນໍາພາຮອບດ້ານຂອງອົງຄະນະພັກແຂວງຕໍ່ການ ເຄື່ອນໄຫວວຽກງານປ້ອງກັນຊາດ – ປ້ອງກັນຄວາມສະຫງົບຂອງແຂວງ ດ້ວຍການສຶກສາອົບຮົມການເມືອງ – ແນວຄິດ, ຍົກສູງສະຕິຮັກຊາດ, ສະຕິລະວັງຕົວຕໍ່ການເຄື່ອນໄຫວມ້າງເພທໍາລາຍຂອງອິດທິກໍາລັງປໍລະປັກ, ສ້າງ ແລະ ປັບປຸງກໍາລັງໃຫ້ປອດໃສ, ເຂັ້ມແຂງ, ໜັກແໜ້ນ, ມີຄວາມຈົງຮັກພັກດີຕໍ່ປະຊາຊົນ, ຕໍ່ລະບອບໃໝ່, ເອົາໃຈໃສ່ໃນການປົກປັກຮັກສາເຂດ ນໍ້າແດນດິນ, ຄວາມສະຫງົບຮຽບຮ້ອຍຕາມຊາຍແດນ, ເປັນພື້ນຖານໃຫ້ແກ່ການພັດທະນາເສດຖະກິດ-ສັງຄົມ.

ປັບປຸງລະບົບກົງຈັກການຈັດຕັ້ງ ແລະ ການເຄື່ອນໄຫວຂອງອົງການອໍານາດລັດ ໃຫ້ມີປະສິດທິພາບ, ແກ້ໄຂສະພາບການຊໍ້າຊ້ອນດ້ານພາລະບົດບາດ ໃຫ້ຈະແຈ້ງ ແລະ ຮັດກຸມ, ເຮັດໃຫ້ກົງຈັກກະທັດຮັດ ແຕ່ມີຄຸນນະພາບເພີ່ມຂຶ້ນ, ສະກັດກັ້ນການນໍາໃຊ້ສິດ, ອໍານາດໃນທາງທີ່ບໍ່ຖືກກົດໝາຍຂອງເຈົ້າໜ້າທີ່ຂອງລັດທຸກຂັ້ນ, ສ້າງເງື່ອນໄຂອໍານວຍຄວາມສະດວກໃຫ້ແກ່ປະຊາຊົນ ສາມາດເຂົ້າເຖິງຂະບວນການຍຸຕິທໍາ ເຮັດໃຫ້ຄວາມເຊື່ອໝັ້ນຂອງປະຊາຊົນ ຕໍ່ພັກ – ລັດດີຂຶ້ນເລື່ອຍໆ, ເສີມຂະຫຍາຍທຸກຄວາມອາດສາມາດ ແລະ ທ່າແຮງບົ່ມຊ້ອນ, ສ້າງຖານການຜະລິດ ແລະ ການບໍລິການໃຫ້ເຂັ້ມແຂງ, ຮັບປະກັນການພັດທະນາແບບຍືນຍົງ ນໍາໃຊ້ຊັບພະຍາກອນທໍາມະຊາດຢ່າງຄຸ້ມຄ່າ ເພື່ອຮັບປະກັນການເຕີບໂຕທີ່ມີຄຸນນະພາບ ຕາມທິດສີຂຽວ ແລະ ຍືນຍົງ, ສົ່ງເສີມວິສາຫະກິດພາຍໃນໃຫ້ຂະຫຍາຍຕົວ ແລະ ເຂັ້ມແຂງ.

ເອົາໃຈໃສ່ການພັດທະນາພື້ນຖານໂຄງລ່າງ ແລະ ການຈັດສັນອາຊີບຂອງປະຊາຊົນ ຢູ່ຊົນນະບົດໃຫ້ມີຈຸດສຸມ ແລະ ມີປະສິດທິພາບ ເຮັດໃຫ້ການພັດທະນາເສດຖະກິດຂອງແຂວງ ມີການຂະຫຍາຍຕົວຢ່າງຕໍ່ເນື່ອງ, ຊີວິດການເປັນຢູ່ຂອງປະຊາຊົນ ໄດ້ຮັບການປັບປຸງນັບມື້ດີຂຶ້ນ ແລະ ໃນຕອນບ່າຍຂອງວັນດຽວກັນທ່ານຮອງປະທານສະພາແຫ່ງຊາດ ພ້ອມດ້ວຍຄະນະ ຍັງໄດ້ເດີນທາງໄປຢ້ຽມຢາມພື້ນຖານການຜະລິດຢູ່ສວນປູກໝາກມ່ວງຂອງບໍລິສັດ ເຮີໜານຊາງຈິວ ເຕັກນິກ ກະສິກຳ ຈຳກັດຜູ້ດຽວ ແລະ ຢ້ຽມຢາມບໍລິສັດ ຫວຽດ – ລາວ ວີລາໂກ້ຈຳກັດຜູ້ດຽວ ຢູ່ເມືອງເຊບັ້ງໄຟ.