ມີເດຍລາວແຂວງບໍ່ແກ້ວ ພາບ-ຂ່າວ: ພອນສະຫວັນ ມະນີສີ.
ຕອນເຊົ້າວັນທີ 6 ກໍລະກົດ 2021ນີ້ ເມືອງປາກທາ ໄດ້ເປີດຝຶກອົບຮົມການນຳໃຊ້ ລະບົບຄຸ້ມຄອງຂໍ້ມູນລັດຖະກອນ ແບບເອເລັກໂຕຼນິກ ໃຫ້ພະນັກງານຫຼັກແຫຼ່ງອ້ອມຂ້າງເມືອງ ຊຸດຝຶກອົບຮົມໄດ້ຈັດຂື້ນທີ່ຫ້ອງປະຊຸມຫ້ອງວ່າການເມືອງ ເປັນກຽດເຂົ້າຮ່ວມຂອງ ທ່ານ ສາລີ ວັນນະສານ ຮອງເລຂາພັກເມືອງ ຜູ້ຊີ້ນຳຂົງເຂດພັກ-ພະນັກງານ ມີຄູຝຶກຈາກພະແນກພາຍໃນແຂວງ ຄະນະຮັບຜິດຊອບຫ້ອງການພາຍໃນເມືອງ ແລະ ພະນັກຫຼັກແຫຼງອ້ອມຂ້າງເມືອງເຂົ້າຮ່ວມ.

ທ່ານ ສາລີ ວັນນະສານ ຮອງເລຂາພັກເມືອງ ຜູ້ຊີ້ນຳຂົງເຂດພັກ-ພະນັກງານ ໄດ້ກ່າວເປີດຊຸດຝຶກອົບຮົມຄັ້ງນີ້ວ່າ: ຊຸດຝຶກອົບຮົມຄັ້ງນີ້ ສຸດທີ່ມີຄວາມໝາຍຄວາມສຳຄັນ ເຊິງຈະໄດ້ພ້ອມກັນປະຕິບັດຕົວຈິງ ໃນການຝຶກອົບຮົມລະບົບຄຸ້ມຄອງ ຖານຂໍ້ມູນລັດຖະກອນ ແບບເອເລັກໂຕຼນິກ ເພື່ອກຽມອອກບັດລັດ ຖະກອນ ແລະ ເພື່ອຕອບສະໜອງໃນໜ້າທີວຽກງານໃຫ້ມີຄວມາກ້າວໜ້າ ແລະ ມີຄວາມວ່ອງໄວທັນສະໄໝຂື້ນເປັນກ້າວໆ ພ້ອມທັງຮຽກຮ້ອງໃຫ້ຄະນະຮັບຜິດຊອບຈັດຝຶກອົບຮົມ ແລະ ສຳມະນາກອນທຸກສະຫາຍ ຈົ່ງພ້ອມກັນເປັນເຈົ້າການ ແລະ ເອົາໃຈໃສ່ຄົ້ນຄ້ວາ-ແລກປ່ຽນຄຳຄິດ-ຄຳເຫັນ ປຶກສາຫາລືໃນເວລາຝຶກອົບ ຮົມຄັ້ງນີ້ເພື່ອໃຫ້ໄດ້ຮັບຜົນດີ.

ຊຸດຝຶກອົບຮົມ ສຳມະນາກອນແມ່ນຈະໄດ້ຮຽນຮູ້ ການນຳໃຊ້ລະບົບຄຸ້ມຄອງຖານຂໍ້ມູນລັດຖະກອນຢູ່ຂັ້ນເມືອງເຊັ່ນວ່າ: ສະເໜີຕົວເລກລັດຖະກອນ, ລາຍຊື່ລັດຖະກອນ, ເລື່ອນຝຶກງານຂື້ນສົມບູນ, ເລື່ອນຊັ້ນ-ຂັ້ນເງີນເດືອນປົກກະຕິ, ການໂຍກຍ້າຍເຂົ້າ-ອອກພາຍໃນກົມກອງ, ການໂຍກຍ້າຍລະດັບ, ການປ່ຽນຕຳແໜ່ງໃໝ່, ການອອກຈາກເປັນລັດຖະກອນ, ການດັດແກ້ຊັ້ນ-ຂັ້ນຕາມໃບປະກາສະນີຍະບັດ, ການດັດແກ້ປີການ, ການປະຕິບັດວິໄນ, ການເລື່ອນປີການ, ການໄດ້ຮັບອູດໜູນຕ່າງໆ, ການແຈ້ງເພີ່ມ ແລະ ການແຈ້ງຫຼຸດ ຈຳນວນລັດຖະກອນ ຊຸດຝຶກອົບຮົມແມ່ນຈະດຳເນີນໄປເປັນເວລາ 3 ວັນຈຶງສໍາເລັດ.