ມີເດຍລາວແຂວງເຊກອງ (ຂ່າວ-ພາບ: ອພສ ແຂວງ) ອົງການພຸດທະສາສະໜາສັມພັນລາວ (ອພສ) ແຂວງເຊກອງ ຮ່ວມກັບອົງການຈັດຕັ້ງທີ່ກ່ຽວຂ້ອງ ໄດ້ເປີດກອງປະຊຸມປຶກສາຫາລືລະດົມຄວາມຄິດເຫັນໃນການຈັດງານພິທີຖວາຍທີ່ດິນເປັນທໍລະນີສົງ ເພື່ອສ້າງວັດໃໝ່ຂຶ້ນໃນວັນທີ 6 ກໍລະກົດ 2021 ທີ່ໂຮງຮຽນມັດທະຍົມສົມບູນ ບ້ານຕິ້ວ ໂດຍເປັນກຽດເຂົ້າຮ່ວມເປັນຄະນະປະທານຂອງ ພຣະຫຼັກຄໍາທັມມະເພຣີສີສັງຄະນາຈານ (ບຸນໂຖ້ຍ ໄຊຍະບຸດ) ເຈົ້າຄະນະແຂວງເຊກອງ, ພຣະປຣີຊາຈິຣັດຖິຕິຄຸນ (ບຸນຍືນ ບັ້ງທອງ) ເຈົ້າຄະນະເມືອງລະມາມ ແລະທ່ານຄໍາຜອງ ເຜົ່າລະວີ ຄະນະປະຈໍາພັກເມືອງ ປະທານແນວລາວສ້າງຊາດເມືອງ, ພ້ອມນີ້ ກໍມີຄະນະບໍລິຫານງານ ອພສ ແຂວງ, ບັນດາຂະແໜງການທີ່ກ່ຽວຂ້ອງຂັ້ນເມືອງ ແລະອໍານາດການປົກຄອງບ້ານຕິ້ວເຂົ້າຮ່ວມ.

ໃນກອງປະຊຸມທ່ານ ແຜດ ເລຂາພັກ ນາຍບ້ານໆຕິ້ວ ໄດ້ລາຍງານກ່ຽວກັບຜົນສໍາເລັດກອງປະຊຸມຂັ້ນບ້ານ ການປຶກສາຫາລື ແລະຄວາມພ້ອມຂອງພໍ່ແມ່ປະຊາຊົນໃນການສ້າງຕັ້ງວັດເຊີ່ງທ່ານຍັງໄດ້ຍົກໃຫ້ເຫັນເຖີງຄວາມສະໝານສາມັກຄີຂອງປະຊາຊົນ ກໍ່ຄືອໍານາດການປົກຄອງທຸກຂັ້ນພາຍໃນບ້ານແມ່ນເຫັນໄດ້ຄວາມສໍາຄັນຕໍ່ວຽກງານ ພຸດທະສາສະໜາ ໂດຍມາຮອດປະຈຸບັນອໍານາດການປົກຄອງທຸກຂັ້ນກໍາລັງຂຸ້ນຂ້ຽວກະກຽມຄວາມພ້ອມດ້ານຕ່າງໆເປັນຕົ້ນແມ່ນສ້າງຂົວຂ້າມນໍ້າ, ເລື່ອຍໄມ້ ແລະອື່ນໆ ແມ່ນສໍາເລັດໄປແລ້ວເກືອບ 80% ໃຫ້ສໍາເລັດກ່ອນວັນເຂົ້າພັນສາ.

ນອກນີ້ ຜູ້ເຂົ້າຮ່ວມໄດ້ຄົ້ນຄ້ວາປຶກສາຫາລືແລກປ່ຽນຄໍາຄິດຄໍາເຫັນຢ່າງກົງໄປກົງມາກ່ຽວກັບການຈັດງານບຸນ ໂດຍເຫັນດີເປັນເອກະພາບກໍານົດເອົາວັນທີ 10-11 ກໍລະກົດ 2021 ເປັນມື້ກະກຽມປະດັບປະດາເອ້ຢ້ອງສະຖານທີ່ບ່ອນປະກອບພິທີກັມ ແລະວັນທີ 12 ກໍລະກົດ 2021 ຕອນເຊົ້າມີພິທີສູດຖອດທີ່ດິນວັດ, ສູດປະລິດຕະມຸງຄຸນ, ຮັບອຸໂປໂມທະນາທານຈາກສັດທາຍາດໂຍມ ພ້ອມທັງມີພິທີຕັກບາດຖວາຍສັງຄະທານ ແລະມອບໃບຕາດິນໃຫ້ແກ່ຄະນະສົງ.

ຫຼັງຈາກສໍາເລັດກອງປະຊຸມແລ້ວຄະນະເຂົ້າຮ່ວມກອງປະຊຸມຍັງໄດ້ລົງຕິດຕາມສໍາຫຼວດພື້ນທີ່ບ່ອນຈະປຸກສ້າງອາຄານກຸດຕິ ສາລາໂຮງທັມ ເຄີ່ງຖາວອນຕື່ມອີກ.