ມີເດຍລາວແຂວງໄຊສົມບູນ ຂ່າວ: ນາງ ຕູດ ຄໍາພໍໃຈ
ເພື່ອປະຕິບັດຕາມທິດຊີ້ນໍາຂອງຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດ ຂອງພະຍາດ ໂຄວິດ 19 ແຂວງໄຊສົມບູນ ສືບຕໍ່ຜັນຂະຫຍາຍຄໍາສັ່ງນາຍຍົກລັດຖະມົນຕີ ສະບັບເລກທີ 15/ນຍ, ລົງວັນທີ 21 ເມສາ 2021 ໃນການປະຕິບັດມາດຕະການທີ່ລັດຖະບານວາງອອກ ກ່ຽວກັບການສະກັດກັ້ນ ແລະ ຄວບຄຸມການແຜລະບາດ ຂອງພະຍາດໂຄວິດ 19 ຢ່າງຈິງຈັງ ບໍໃຫ້ມີການແຜລະບາດອອກເປັນວົງກວ້າງ ໂດຍສະເພາະມາຮອດແຂວງໄຊສົມບູນ.

ໃນມື້ທີ 6 ກໍລະກົດ ຜ່ານມາ ນີ້ ທ່ານ ສົມດາວີ ຄໍາເມືອງຄູນ, ຮອງຫົວໜ້າພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແຂວງ ແລະ ທ່ານ ຊົງ ໄຊຮົ່ວ, ຮອງຫົວໜ້າຄະນະໂຄສະນາອົບຮົມ ແຂວງ ພ້ອມດ້ວຍທິມງານ ໄດ້ລົງເຄື່ອນທີ່ ໂຄສະນາຢູ່ເຂດ 516 ເມືອງລ້ອງຊານ ແຂວງໄຊສົມບູນ ຈຸດປະສົງກໍເພື່ອຜັນຂະຫຍາຍເນື້ອໃນຄໍາສັ່ງນາຍຍົກລັດຖະມົນຕີ ສະບັບເລກທີ 15/ນຍ, ລົງວັນທີ 21 ເມສາ 2021 ແລະ ແຈ້ງການຫ້ອງວ່າການ ແຂວງ, ສະບັບເລກທີ 1815/ຫວຂ. ຊບ, ລົງວັນທີ 5 ກໍລະກົດ 2021 ໃນການສືບຕໍ່ມາດຕະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດຂອງຜະຍາດ ໂຄວິດ 19

ໃນໄລຍະແຕ່ວັນທີ 5-19 ກໍລະກົດ 2021 ໃຫ້ແກ່ພະນັກງານ-ລັດຖະກອນ, ທະຫານ-ຕໍາຫຼວດ, ກໍາມະກອນ, ນັກຮຽນ, ນັກສຶກສາ, ຜູ້ປະກອບການ, ຊາວຕ່າງດ່າວ ແລະ ຕ່າງປະເທດ ແລະ ປະຊາຊົນບັນດາເຜົ່າ ຢູ່ຂອບເຂດ 516 ເມືອງລ້ອງຊານ ໄດ້ຮັບຮູ້ຜົນຮ້າຍ ຂອງເຊື້ອພະຍາດໂຄວິດ 19 ແລະ ຮູ້ວິທີປ້ອງກັນ, ສິ່ງສໍາຄັນແມ່ນໃຫ້ເຂົ້າໃຈຕໍ່ການຈັດຕັ້ງ ປະຕິບັດມາດຕະການ ຂອງຄະນະສະເພາະກິດ ກໍຄືແຈ້ງການຂອງຫ້ອງວ່າການແຂວງ ແລະ ແຈ້ງການອື່ນໆ ທີ່ລັດວາງອອກຢ່າງເຂັ້ມງວດ. ທັ້ງນີ້ກໍເປັນການກະຕຸກສຸກຍູ້ໃຫ້ແກ່ພາກສ່ວນ ຕ່າງໆ ໄດ້ມີສະຕິລະວັງຕົວ ໂດຍສະເພາະເວລາ ອອກຈາກເຮືອນ ຫຼື ພົບປະສັງຄົມ ກໍເພື່ອຮັບປະກັນບໍ່ໃຫ້ມີໂອກາດຕິດເຊື້ອ ແລະ ນໍາເຊື້ອເຂົ້າມາແຂວງໄຊສົມບູນ ຂອງພວກເຮົາ.