ມີເດຍລາແຂວງບໍ່ແກ້ວ ຂ່າວ: ອຸ່ນຄໍາ ຂັນວາລິດ ໃນຕອນເຊົ້າຂອງວັນທີ 7 ກໍລະກົດ 2021ນີ້ ຢູ່ທີຫ້ອງປະຊຸມພະລັງງານ ແລະ ບໍ່ແຮ່ເມືອງເມິງ ແຂວງບໍ່ແກ້ວ ໄດ້ເປີດຊຸດຝຶກອົບຮົມໃຫ້ແກ່ຄະນະຄຸ້ມຄອງບໍລິຫານກອງທືນພັດທະນາຂັ້ນບ້ານໃຫ້ເປັນຜູ້ນໍາ ຂອງແຜນງານ ລາວ/030 ໃນ 10 ບ້ານເປົ້າໝາຍຢູ່ພາຍໃນເມືອງເມິງ ໂດຍພາຍໃຕ້ການເປັນປະທານ ຂອງທ່ານ ນາງ ວັນ ເຈັນຕະພູມ ຄະນະປະຈໍາພັກເມືອງ, ຮອງເຈົ້າເມືອງໆເມິງ ຜູ້ຊີ້ນໍາວຽກງານຂົງເຂດເສດຖະກິດ ພ້ອມດ້ວຍບັນດາທ່ານຄະນະທີມງານສະຫະພັນແມ່ຍິງແຂວງ, ຜູ້ປະສານງານໂຄງການລາວ/030, ຄູຝຶກມາຈາກສະຫະພັນແມ່ຍິງເມືອງຫ້ວຍຊາຍ, ເມືອງປາກທາ, ເມືອງຜາອຸດົມ, ເມືອງເມິງ ແລະ ນັກສໍາມະນາກອນມາຈາກ 10 ບ້ານເປົ້າໝາຍເຂົ້າຮ່ວມຢ່າງພ້ອມພຽງ.

ໃນພິທີຄະນະຮັບຜິດຊອບໄດ້ຂຶ້ນຜ່ານຂໍ້ຕົກລົງຂອງປະທານສະຫະພັນແມ່ຍິງເມືອງ ສະບັບເລກທີ 135/ສຍມ ວ່າດ້ວຍການອານຸມັດດໍາເນີນແນະແນວຄວາມຄິດກ່ຽວກັບການເປັນຜູ້ນໍາ ດ້ານວຽກງານພັດທະນາ ໃຫ້ກັບຫົວໜ້າສະຫະພັນແມ່ຍິງ/ສະມາຊິກໃນບ້ານເປົ້າໝາຍຂອງແຜນງານລາວ/030 ການຝຶກອົບຮົມໃນຄັ້ງນີ້ ມີນັກສໍາມະນາກອນເຂົ້າຮ່ວມທັງໝົດ 20 ຄົນ, ມີ 10 ບ້ານເປົ້າໝາຍຄື: ບ້ານໄຊສະຫວ່າງ, ບ້ານລ້ອງພະບາດ, ບ້ານປຸ່ງເລາະ, ບ້ານຫ້ວຍສ້ານ, ບ້ານຈອມແຈ້ງ, ບ້ານຫ້ວຍອໍ, ບ້ານມອນແຫຼມ, ບ້ານໂພນຈະເລີນ, ບ້ານຕໍແລ ແລະ ບ້ານປຸ່ງຜາ ໃນການຝຶກອົບຮົມຜູ້ເຂົ້າຮ່ວມຈະໄດ້ຈັດຕັ້ງເປັນກຸ່ມຄົ້ນຄວ້າບັນດາເອກະສານຄື: ຄວາມໝາຍ ແລະ ຄວາມສໍາຄັນຂອງການເປັນຜູ້ນໍາ, ບົດບາດຍິງ-ຊາຍພື້ນຖານ ແລະ ຄວາມສະເໝີພາບຍິງ-ຊາຍ, ແນະນໍາວິຊາຊີບ, ແນະນໍາການແປຮູບວັດຖຸດິບ, ຕ້ອງໂສ້ການຕະຫຼາດ ແລະ ກຸ່ມທ້ອນເງີນ ການຝຶກອົບຮົມໃນຄັ້ງຈະໄດ້ດໍາເນີນໄປເປັນເວລາສາມວັນເຕັມຈິ່ງຈະສໍາເລັດ.

ໃນໂອກາດທີ່ໄດ້ເຂົ້າຮ່ວມເປີດຊຸດຝຶກອົບຮົມໃນຄັ້ງນີ້ ທ່ານ ນາງ ວັນ ເຈັນຕະພູມ ຄະນະປະຈໍາພັກເມືອງ, ຮອງເຈົ້າເມືອງໆເມິງ ໄດ້ມີຄວາມເຫັນໂອ້ລົມຕໍ່ນັກສໍາມະນາກອນ ໃຫ້ເອົາໃຈໃສ່ຕິດຕາມ, ຄົ້ນຄ້ວາ,ໃຫ້ຄວາມຮ່ວມໄມ້ຮ່ວມມືເຂົ້າຮ່ວມໃຫ້ສຸດກົກສຸດປາຍ, ປະຕິບັດໂມງເວລາ ແລະ ລະບຽບຂອງການຝຶກອົບຢ່າງເຂັ້ມງວດ ເພຶ່ອຮັບປະກັນໃຫ້ໄດ້ຄວາມຮູ້, ຄວາມສາມາດ ແລະ ໃຫ້ໄດ້ຮັບຄຸນນະພາບສູງ ເພຶ່ອນໍາເອົາຄວາມຮູ້ດັ່ງກ່າວທີ່ໄດ້ຝຶກອົບຮົມໃນຄັ້ງນີ້ນໍາໄປໝູນໄຊ້ໃຫ້ເກີດຜົນປະໂຫຍດສູງສຸດ ແລະ ພັດທະນາຢູ່ພາຍໃນທ້ອງຖິ່ນຂອງຕົນກໍ່ຄືເມືອງເມິງໃຫ້ໄດ້ຮັບຜົນດີ.