ເນື່ອງໃນໂອກາດ ສະເຫຼີມສະຫຼອງ ວັນປ່ອຍປາ ແລະ ອະນຸລັກສັດນ້ຳ-ສັດປ່າ ແຫ່ງຊາດ ຄົບຮອບ 24 ປີ ແລະ ວັນຄ້າຍວັນເກີດຂອງ ທ່ານ ສຸພານຸວົງ ຄົບຮອບ 112 ປີ. ທ່ານ ສົມຫວັງ ນາບຸນແພງ ຫົວ ຫນ້າພະແນກຊັບພະຍາກອນທຳມະຊາດ ແລະ ສິ່ງແວດລ້ອມ ແຂວງຫລວງນໍ້າທາໄດ້ຖະແຫຼງໃນວັນທີ 7 ກໍລະກົດ 2021 ນີ້ວ່າ: ເພື່ອປຸກລະດົມ ແລະ ຍົກລະດັບຈິດສໍານຶກຂອງປະຊາຄົມໂລກເວົ້າລວມ ເວົ້າສະເພາະປະ ຊາຊົນບັນດາເຜົ່າພາຍໃນປະເທດ ໃຫ້ມີການປະກອບສ່ວນເຂົ້າໃນວຽກງານຄຸ້ມຄອງ ປົກປັກຮັກສາ, ພັດທະ

ນາໃຫ້ສັດນ້ຳ-ສັດປ່າ ມີຄວາມອຸດົມສົມບຸນ ສະນັ້ນ ລັດຖະບານ ຈິ່ງໄດ້ກໍານົດເອົາ ວັນທີ່ 13 ກໍລະກົດ ເປັນວັນປ່ອຍປາ ແລະ ອະນຸລັກສັດນໍ້າ-ສັດປ່າແຫ່ງຊາດ ກໍ່ຄືການປົກປັກຮັກສາສິ່ງແວດ ລ້ອມ ແລະ ວັນຄ້າຍວັນເກີດຂອງ ທ່ານ ສຸພານຸວົງ ຄົບຮອບ 112 ປີ ເພື່ອເຮັດໃຫ້ວັນດັ່ງກ່າວນີ້ເຫັນໄດ້ຄວາມໝາຍຄວາມສໍາຄັນການສົ່ງເສີມ, ສ້າງຈິດສຳນຶກ ແລະ ຍົກລະດັບຄວາມຕື່ນຕົວຢູ່ໃນສັງຄົມໃນການປົກປັກຮັກສາ ອານຸລັກສັດນ້ຳ-ສັດປ່າ ໃຫ້ທົ່ວປວງຊົນຢ່າງແທ້ຈິງ. ແຂວງຫຼວງນ້ຳທາ ກຳລັງພ້ອມກັນກະກຽມສະເຫຼີມສະຫຼອງ ແລະ ປຸກລະດົມຮ່ວມແຮງຮ່ວມໃຈກັນ ປ່ອຍປາ ແລະ ອະນຸລັກສັດນ້ຳ-ສັດປ່າແຫ່ງຊາດ , ຖືເອົາໂອກາດອັນສຳຄັນ ດຳເນີນການໂຄສະນາເຜີຍແຜ່ ແລະ ປຸກລະດົມທົ່ວປວງຊົນ ເພື່ອພ້ອມກັນປົກປັກຮັກສາ, ຄຸ້ມຄອງການນຳໃຊ້ຊັບພະຍາກອນທຳມະຊາດແບບປະຢັດ, ສົມເຫດສົມຜົນ ແລະ ບູລະນະຟື້ນຟູທໍາມະຊາດໃຫ້ຄືນສູ່ຄວາມອຸດົມສົມບູນ ແລະ ເອື້ອອໍານວຍໃຫ້ທຸກສິ່ງທີ່ມີຊີວິດ ໄປພ້ອມໆກັບການຄຸ້ມຄອງລັດ ຄຸ້ມຄອງສັງຄົມ ດ້ວຍກົດໝາຍຢ່າງເຂັ້ມງວດ ເພື່ອຕ້ານແລະ ສະກັດກັ້ນການຄ້າ-ຂາຍສັດປ່າ, ຜະລິດຕະພັນຈາ
ກສັດປ່າແບບຊະຊາຍ ທີ່ຜິດກົດໝາຍ.

ທ່ານຍັງໃຫ້ຮູ້ຕື່ມວ່າ: ໃນປີນີ້ ພະແນກຊັບພະຍາກອນທຳມະຊາດ ແລະ ສິ່ງແວດ ລ້ອມ ໃນນາມເປັນພະແນກການທີ່ຄຸ້ມ ທາງດ້ານມະຫາພາກ ໄດ້ກະກຽມສະເຫຼີມສະຫຼອງວັນປ່ອຍປາ ແລະ ອະນຸລັກສັດນ້ຳ-ສັດປ່າແຫ່ງຊາດ ແບບກະທັດຮັດໂດຍປະຕິບັດຕາມຄຳສັ່ງ ເລກທີ 15/ສນຍ ເພື່ອສະກັດກັ້ນການແຜ່ລະບາດຂອງພະຍາດໂຄວິດ -19 ໂດຍໃຫ້ພະນັກງານພາຍໃນພະແນກ, ອົງການຈັດຕັ້ງທັງພາກລັດ – ເອກະຊົນ, ບັນດາຄູ່ຮ່ວມພັດທະນາ, ບໍລິສັດ, ພະແນກການຂັ້ນແຂວງ, ຂັ້ນເມືອງ ແລະ ບັນດາບ້ານ ພາຍໃນແຂວງຫຼວງນໍ້າທາ ຮ່ວມແຮງຮ່ວມໃຈ ໃນການປ່ອຍສັດນ້ຳ ແລະ ສັດປ່າ ໃນຂອບເຂດຮັບຜິດຊອບຂອງຕົນ ແລະ ພະແນກຊັບພະຍາກອນທຳມະຊາດ ແລະ ສິ່ງແວດລ້ອມ ຈະບໍ່ໄດ້ສ້າງຂະບວນການໂຮມຊຸມນຸມໃຫຍ່ ແລະ ຈະບໍ່ມີການປ່ອຍປ່າຄືປີຜ່ານໆມາ; ພຽງແຕ່ໂຄສະນາເຜີຍແຜ່ຂໍ້ມູນຂ່າວສານ ແລະ ປຸກລະດົມ ທົ່ວປວງຊົນ ກ່ຽວກັບການອະນຸລັກສັດນ້ຳ-ສັດປ່າ ໂດຍຜ່ານສື່ມວນຊົນຕ່າງໆຢ່າງເປັນເຈົ້າການດ້ວຍຮູບການອອກຂ່າວຜ່ານສື່ຕ່າງໆເຊັ່ນ: ໂທລະພາບ, ວິທະຍຸ ແລະ ສື່ສິ່ງພິມ.

ແລະ ຮັບປະກັນຊັບພະຍາກອນ ທຳມະຊາດ ແລະ ສິ່ງແວດລ້ອມ ໄດ້ປົກປັກຮັກສານຳໃຊ້ຢ່າງມີປະສິດທິຜົນ ແລະ ຍືນຍົງ, ພ້ອມກັນສະກັດກັ້ນການບຸກລຸກທຳລາຍຖິ່ນທີ່ຢູ່ອາໄສ ແລະ ເຂດທີ່ອະນຸມັດພັນສັດນ້ຳ – ສັດປ່າ ທີ່ໃກ້ຈະສູນພັນ. ໂອກາດນີ້ ທ່ານຍັງໄດ້ຮຽກຮ້ອງມາຍັງທຸກພາກສ່ວນທົ່ວສັງຄົມ ໃນທົ່ວແຂວງຫຼວງນ້ຳທາ ຈົ່ງພ້ອມກັນເຊື່ອມຊືມ, ເຂົ້າຮ່ວມຢ່າງຫ້າວຫັນ, ຫັນປ່ຽນພຶດຕິກໍາ ແລະ ຈິນຕະນາການ ຂອງຕົນໃຫ້ໄປສູ່ການເຄື່ອນໄຫວທີ່ກ່ຽວພັນກັບການປົກປັກຮັກສາ ອະນຸລັກຊີວະນາໆພັນໃຫ້ມີຄວາມຢືນຍົງ, ບົນພື້ນຖານການນຳໃຊ້ຊັບພະຍາ ກອນທຳມະຊາດຢ່າງປະຢັດ ແລະ ສ້າງຂີດຄວາມສາມາດຂອງຕົນ ໃນການຄຸ້ມຄອງລັດຄຸ້ມຄອງສັງຄົມ ດ້ວຍກົດໝາຍໃນວຽກງານຄຸ້ມຄອງຊັບພະຍາກອນທຳມະຊາດ ແລະ ສິ່ງແວດລ້ອມ, ຈົ່ງພ້ອມກັນປົກປັກຮັກສາຊັບພະຍາກອນທຳມະຊາດ, ຄືນຄວາມອຸດົມສົມບູນໃຫ້ແກ່ລະບົບນິເວດ ເພື່ອຫຼຸດຜ່ອນໄພພິບັດທາງທຳມະຊາດ, ບັນຫາການປ່ຽນແປງດິນຟ້າອາກາດ ເພື່ອປະກອບ ສ່ວນເຂົ້າໃນການພັດທະນາເສດຖະກິດ -ສັງຄົມ ຕາມທິດສີຂຽວ ສະອາດ ງາມຕາ ແລະ ຍືນຍົງ.
ຂ່າວ: ສົມພອນ ຂຸນດາວົງ