ມີເດຍລາວແຂວງຫຼວງພະບາງ ຂ່າວ: ເມືອງຈອມເພັດ ກອງປະຊຸມ ຄົ້ນຄວ້າ ແລະ ປຶກສາຫາລື ກ່ຽວກັບວຽກງານ ການລົງກໍ່ສ້າງຮາກຖານການເມືອງ ໄດ້ຈັດຂຶ້ນໃນວັນທີ 2 ກໍລະກົດ 2021 ນີ້, ຢູ່ທີ່ສະໂມສອນຂອງເມືອງ, ໂດຍການ ເຂົ້າຮ່ວມຂອງສະຫາຍ ສາຍສະໝອນ ສາລິວົງ ເລຂາພັກເມືອງ, ເຈົ້າເມືອງຈອມເພັດ, ມີຄະນະພັກ, ຫົວໜ້າ-ຮອງຫົວໜ້າຫ້ອງການ ແລະ ຜູ້ຊ່ວຍວຽກຄະນະພັກເຂົ້າຮ່ວມ.

ໃນກອງປະຊຸມ ໄດ້ຜ່ານຂໍ້ຕົກລົງຂອງທ່ານ ເຈົ້າເມືອງຈອມເພັດ ວ່າດ້ວຍການແຕ່ງຕັ້ງຄະນະພັກ,ຫົວໜ້າ-ຮອງຫົວໜ້າຫ້ອງການ ແລະ ຜູ້ຊ່ວຍວຽກຄະນະພັກ ຮຮັບຜິດຊອບຢູ່ແຕ່ລະບ້າ. ຈາກນັ້ນ,ສະຫາຍ ສາຍສະໝອນ ສາລິວົງ ເລຂາພັກເມືອງ, ໄດ້ມີຄຳເຫັນຊີ້ນຳຕໍ່ກອງປະຊຸມວ່າ: ການລົງກໍ່ສ້າງຮາກຖານການເມືອງ ຊຸດນີ້, ແມ່ນມີຄວາມສຳຄັນຫຼາຍ ທີ່ຄະນະພັກ ແຕ່ລະສະຫາຍ ທີຖືກຮັບຜິດຊອບແຕ່ລະບ້ານ ຈະຕ້ອງໄດ້ເອົາໃຈໃສ່ຍົກສູງ ຄວາມຮັບຜິດຊອບຂອງຕົນ, ເພື່ອຊອກ ໃຫ້ເຫັນບັນຫາຕ່າງໆ, ກໍາໃຫ້ໄດ້ສະພາບຈຸດພິເສດຂອງບ້ານ, ຂອງທ້ອງຖິ່ນ, ກໍາແໜ້ນເນື້ອໃນຈິດບັນດາ ເອກະສານຕ່າງໆຢ່າງເລິກເຊິ່ງ, ເພື່ອລົງຈັດຕັ້ງເຊື່ອມຊຶມໃຫ້ປະຊາຊົນໄດ້ຮັບຮູ້ຢ່າງທົ່ວເຖິງ, ໂດຍຫັນເອົາມະຕິຕ່າງ ໆ ເປັນແຜນການ,ແຜນງານ, ໂຄງການຢ່າງລະອຽດ ເພື່ອຈັດຕັ້ງປະຕິບັດໃຫ້ແທດເໜາະ ກັບສະພາບຕົວຈິງຂອງບ້ານນັ້ນ, ທ້ອງຖິ່ນນັ້ນ.

ພ້ອມດຽວກັນບັນດາຜູ້ເຂົ້າຮ່ວມກອງປະຊຸມໃນຄັ້ງນີ້ຍັງໄດ້ປະກອບຄຳເຫັນຕ່າງໆເພື່ອໃຫ້ເຫັນແຈ້ງເຖິງຈຸດປະສົງແລະໝາກຜົນຂອງການລົງຮາກຖານໃນຄັ້ງນີ້ແລະນຳມາເປັນແນວທາງແລະຊອກຫາຊ່ອງທາງໃນການແກ້ໄຂທ້ອງຖິ່ນນັ້ນໃຫ້ໄດ້ຮັບການພັດທະນາແລະສົ່ງເສີມຢ່າງຖືກຕ້ອງກັບສະພາບຄວາມເປັນຈິງຂອງທ້ອງຖິ່ນ.

ສ່ວນເອກະສານຕ່າງໆ ທີ່ຈະນໍາໄປຈັດຕັ້ງເຊື່ອມຊຶມໃນຄັ້ງນີ້ ປະກອບມີ: ມະຕິກອງປະຊຸມໃຫຍ່ ຄັ້ງທີ Xl ຂອງພັກ ແລະຜົນສຳເລັດ ກອງປະຊຸມຂອງສະມາຊິກສະພາແຫ່ງຊາດຊຸດທີ 9 ແລະ ສະພາປະຊາຊົນຂັ້ນແຂວງ ຊຸດທີ 2, ມະຕິກອງປະຊຸມໃຫ່ຍຜູ້ແທນອົງຄະນະພັກແຂວງຫຼວງພະບາງ ຄັ້ງທີ VIII, ມະຕິກອງປະຊຸມ ຄັ້ງປະຖົມມະລຶກຂອງສະພາແຫ່ງຊາດ ຊຸດທີ IX, ແລະມະຕິກອງປະຊຸມໃຫຍ່ຂອງອົງຄະນະພັກເມືອງຈອມເພັດ ຄັ້ງທີ VII ແລະ ເອກະສານອື່ນໆອີກຈຳນວນໜື່ງ.