ມີເດຍລາວແຂວງສາລະວັນ ກອງປະຊຸມລັດຖະບານ ຊຸດທີ IX ເປີດກ້ວາງ ຄັ້ງທີ I ປີ 2021 ຜ່ານລະບົບທາງໄກ (Video Confidence) ໄດ້ອັດລົງດ້ວຍຜົນສໍາເລັດອັນຈົບງາມ ເຊິ່ງໄດ້ດໍາເນີນມາເປັນເວລາ 3 ວັນ ແຕ່ວັນທີ 6-8 ກໍລະກົດ 2021 ຢູ່ທີ່ຫ້ອງວ່າການສໍານັກງານນາຍົກລັດຖະມົນຕີ ໂດຍພາຍໃຕ້ການເປັນປະທານຂອງ ທ່ານ ພັນຄໍາ ວິພາວັນ ນາຍົກລັດຖະມົນຕີແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ມີບັນດາທ່ານລັດຖະມົນຕີ, ຮອງລັດຖະມົນຕີ, ເຈົ້າຄອງນະຄອນ, ເຈົ້າແຂວງທົ່ວປະເທດ, ຄະນະສະເພາະກິດປ້ອງກັນ, ຄວບຄຸມການແຜ່ລະບາດຂອງພະຍາດໂຄວິດ-19ຂັ້ນສູນກາງ ແລະ ທ້ອງຖິ່ນເຂົ້າຮ່ວມ, ສໍາລັບ ແຂວງສາລະວັນ ເຂົ້າຮ່ວມໂດຍ ທ່ານ ປອ ໂພໄຊ ໄຊຍະສອນ ກໍາມະການສູນກາງພັກເຈົ້າແຂວງສາລະວັນ ພ້ອມຄະນະ ຢູ່ທີ່ສະໂມສອນຂອງແຂວງ.

ກອງປະຊຸມຄັ້ງນີ້ໄດ້ຮ່ວມກັນປຶກສາ-ຫາລື ໃນ 3 ວາລະຕົ້ນຕໍເປັນຕົ້ນ ສະຫຼຸບຕີລາຄາການຈັດຕັ້ງປະຕິບັດວຽກງານລັດຖະບານ 6 ເດືອນຕົ້ນປີ ແລະທິດທາງແຜນວຽກຈຸດສຸມ 6 ເດືອນທ້າຍປີ 2021, ຕີລາຄາການຈັດຕັ້ງປະຕິບັດ ມາດຕະການປ້ອງກັນ, ຄວບຄຸມ ແລະ ສະກັດກັ້ນ ການແຜ່ລະບາດຂອງພະຍາດໂຄວິດ-19 ແລະ ວຽກງານການຕ້ານໄພພິບັດ, ສະຫລຸບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ, ນອກນັ້ນຍັງໄດ້ຮັບຟັງການລາຍງານ ການປະຕິບັດລາຍຮັບ-ລາຍຈ່າຍ, ການກະກຽມຄວາມພ້ອມຮອບດ້ານໃນການປັບປຸງ, ສ້າງກົດໝາຍ ແລະ ນິຕິກໍາໃນປີ 2021, ການປັບປຸງກົນຈັກການຈັດຕັ້ງ, ປັບປຸງດໍາລັດວ່າດ້ວຍພາລະບົດບາດຂອງກະຊວງ ແລະ ຂະແໜງການ ເພື່ອເປັນທິດທາງໃຫ້ແກ່ການປະຕິ ບັດໜ້າທີ່ຂອງລັດຖະບານ ກໍຄືຂະແໜງການ ແລະ ທ້ອງຖິ່ນ ແຕ່ນີ້ເຖິງທ້າຍປີ 2021, ໃຫ້ສືບຕໍ່ຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ, ແຜນພັດທະນາເສດຖະກິດສັງຄົມແຫ່ງຊາດ ແລະ ແຜນດໍາເນີນງານຂອງລັດຖະບານ ປະຈໍາປີ 2021 ໃຫ້ປະສົບຜົນສໍາເລັດຕາມລະດັບຄາດໝາຍ ໂດຍສະເພາະແມ່ນຈັດຕັ້ງປະຕິບັດເນື້ອໃນ 2 ວາລະແຫ່ງຊາດວ່າດ້ວຍການແກ້ໄຂຄວາມຫຍຸງຍາກທາງດ້ານເສດຖະກິດ-ການເງິນ ແລະ ແກ້ໄຂບັນຫາຢາເສບຕິດໃຫ້ເປັນຮູບປະທຳເປັນກ້າວໆ ໄປຄຽງຄູ່ກັບເພີ່ມທະວີການຈັດຕັ້ງປະຕິບັດ ບັນດາມາດຕະການປ້ອງກັນ, ຄວບຄຸມ ແລະສະກັດກັ້ນການແຜ່ລະບາດຂອງພະຍາດໂຄວິດ-19 ໃນໄລຍະ 6 ເດືອນທ້າຍປີ ໃຫ້ມີປະສິດທິຜົນດີຂຶ້ນ.

ໂອກາດດຽວກັນນີ້ ທ່ານ ພັນຄໍາ ວິພາວັນ ນາຍົກລັດຖະມົນແຫ່ງ ສປປ ລາວ ກໍໄດ້ເນັ້ນໃຫ້ສືບຕໍ່ຈັດຕັ້ງປະຕິບັດວຽກງານປ້ອງກັນຊາດປ້ອງກັນຄວາມສະຫງົບ, ຮັກສາສະຖຽນລະພາບທາງດ້ານການເມືອງ ແລະ ຄວາມເປັນລະບຽບຮຽບຮ້ອຍຂອງສັງຄົມ, ສືບຕໍ່ຄຸ້ມຄອງເສດຖະກິດມະຫາພາກໃຫ້ໝັ້ນທ່ຽງ, ແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ໃຫ້ມີທິດຫັນປ່ຽນໃໝ່ທີ່ໜັກແໜ້ນ ໃຫ້ຕິດພັນກັບບັນດາມາດຕະການປະຢັດງົບປະມານ, ຄຸ້ມຄອງການນໍາໃຊ້ລົດລັດ, ປັບປຸງກົນໄກສົ່ງເສີມການລົງທຶນ, ການຫັນເປັນທັນສະໄໝ ເພື່ອຕິດຕາມການຈັດເກັບລາຍຮັບ, ການຄຸ້ມຄອງລາຍຈ່າຍ, ການນໍາເຂົ້າ-ສົ່ງອອກສິນຄ້າ ແລະແຮ່ທາດ ຢູ່ດ່ານຊາຍແດນ ແລະ ອື່ນໆ, ສືບຕໍ່ກະກຽມເນື້ອໃນ ແລະເຂົ້າຮ່ວມກອງປະຊຸມວິສາມັນ ສະພາແຫ່ງຊາດຊຸດທີIX ທີ່ຈະຈັດຂຶ້ນໃນເດືອນສິງຫາ 2021 ເພື່ອຜ່ານຮ່າງວາລະແຫ່ງຊາດ ວ່າດ້ວຍແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ, ສືບຕໍໍ່ຜັນຂະຫຍາຍ ແລະ ຈັດຕັ້ງປະຕິບັດຂໍ້ຕົກລົງວ່າດ້ວຍລະບຽບການ ແລະກົນໄກການເຮັດວຽກຂອງລັດຖະບານ,

ພ້ອມນັ້ນຍັງໃຫ້ສືບຕໍ່ຈັດຕັ້ງປະຕິບັດຄໍາສັ່ງ ເລກທີ 15/ນຍ ວ່າດ້ວຍການເພີ່ມທະວີມາດຕະການສະກັດກັ້ນ, ຄວາມຄຸມຢ່າງເຂັ້ມງວດ ແລະ ກະກຽມຄວາມພ້ອມຮອບດ້ານ ເພື່ອຕ້ານພະຍາດໂຄວິດ-19, ສືບຕໍຮ່ວມມືກັບບັນດາປະເທດເພື່ອນມິດຍຸດທະສາດ, ເສີມຂະຫຍາຍສາຍພົວພັນກັບບັນດາປະເທດໃກ້ຄຽງ, ປະເທດອາຊຽນ ແລະປະເທດອື່ນໆ ໃຫ້ສະມາຊິກລັດຖະບານ, ບັນດາຂະແໜງການສູນກາງ ແລະອົງການປົກຄອງທ້ອງຖິ່ນ ຫັນເປັນແຜນປະຕິບັດງານອັນລະອຽດ, ລວມທັງມີການກວດກາ, ຕິດຕາມການຈັດຕັ້ງປະຕິບັດແຜນວຽກຈຸດສຸມດັ່ງກ່າວຢ່າງເປັນປົກກະຕິ ເພື່ອນໍາໄປຜັນຂະຫຍາຍຈັດຕັ້ງປະຕິບັດ ຕາມເງື່ອນໄຂຄວາມສາມາດຕົວຈິງຂອງຕົນໃຫ້ມີປະສິດທິພາບສູງຂຶ້ນ.